អាជ្ញាធរជាតិអប្សរា បានបញ្ជាក់ថា ការការលក់សំបុត្រ និងការចូលទស្សនាប្រាសាទនានា នៅរមណីយដ្ឋានអង្គរ នឹងបន្តរហូតដល់ថ្ងៃទី ២៨ មេសា ស្របតាមសេចក្តីសម្រេចថ្មីមួយរបស់រដ្ឋាភិបាល ដែលបានប្រកាសបន្តហាមឃាត់ការធ្វើដំណើរ និងបិទរមណីយដ្ឋានទេសចរណ៍ទូទាំងប្រទេសបណ្ដោះអាសន្ន ដើម្បីទប់ស្កាត់ការឆ្លងរាលដាលនៃជំងឺកូវីដ-១៩។
 

គិតមកដល់ពេលនេះ កម្ពុជាមានករណីកូវីដ-១៩ ៧៤៤៤នាក់ ក្នុងនោះ ៦៨៩៩នាក់ពាក់ព័ន្ធសហគមន៍២០កុម្ភៈ។ អ្នកសះស្បើយមាន២៥៥៥នាក់ និងស្លាប់៤៩នាក់។ ព្រឹត្តិការណ៍២០កុម្ភៈ រាលដាលនៅក្នុងរាជធានីភ្នំពេញ ខេត្តកណ្តាល ព្រះសីហនុ ព្រៃវែង ស្វាយរៀង សៀមរាប ត្បូងឃ្មុំ កំពង់ធំ កំពង់ចាម កែប តាកែវ បាត់ដំបង កំពង់ស្ពឺ កំពត កំពង់ឆ្នាំង ពោធិ៍សាត់ និងខេត្តប៉ៃលិន។
 

សម្រាប់ខេត្តសៀមរាប បានរកឃើញ ករណីវិជ្ជមានកូវីដ-១៩ ចំនួន ២០នាក់ ក្នុងនោះបានជាសះស្បើយចំនួន ៧នាក់។  ការរកឃើញជាបន្តបន្ទាប់នៃអ្នកតេស្តវិជ្ជមានកូវីដ-១៩ ជាប់ពាក់ព័ន្ធនឹងព្រឹត្តិការណ៍សហគមន៍ ២០កុម្ភៈនេះ បានបង្ខំឱ្យ   អាជ្ញាធរសៀមរាប សម្រេចបិទខ្ទប់ សង្កាត់ចំនួន៣ គឺសង្កាត់ដង្គំ សាលាកំរើក និងសង្កាត់សៀមរាប ចាប់ពីថ្ងៃទី ១៥ ដល់ថ្ងៃទី២៩ មេសាផងដែរ៕