ការប្រកាសបញ្ចប់តួនាទីរបស់លោក Woodward ធ្វើឡើងនៅចំពោះមុខក្រុម Man Utd រួមជាមួយក្រុម៥ទៀតនៅ Premier League រួមមាន Manchester City, Liverpool, Arsenal, Chelsea និង Tottenham Hotspure ដែលគាំទ្រគម្រោងពានរង្វាន់អឺរ៉ុបថ្មី ESL ហើយក៏ដកខ្លួនចេញវិញនោះ។ ក្លិប ដែលគាំទ្រការបង្កើតពាន ESL ត្រូវទទួលការថ្កោលទោសយ៉ាងធ្ងន់ធ្ងរពីសំណាក់ FIFA និងបណ្តាសហព័ន្ធកីឡាបាល់ទាត់នៅអឺរ៉ុបផ្សេងទៀត។
 

លោក Woodward វ័យ៤៩ឆ្នាំ ដែលជាឥស្សរជននាំមុខគេម្នាក់ក្នុងចំណោមច្រើននាក់ដែលគាំទ្រការបង្កើតពាន ESL បានចូលរួមជាមួយ Man Utd កាលពីឆ្នាំ ២០០៥ និងបានកាន់តួនាទីជាអនុប្រធានក្លិបចាប់តាំងពីឆ្នាំ ២០១២ រហូតសព្វថ្ងៃ។ 
 

យ៉ាងណាក៏ដោយ បន្ទាប់ពីផែនការសម្រាប់គម្រោង ESL ត្រូវបានប្រកាសថាមានក្រុមពាក់កណ្តាលបញ្ចប់វិញ លោក Woodward បានលាឈប់ពីតួនាទីរបស់លោកនៅក្នុងក្រុមប្រឹក្សាយុទ្ធសាស្ត្រអាជីពបាល់ទាត់របស់ UEFA ពោលគឺមុនបញ្ចប់តំណែងខ្លួននៅ Man Utd។
 

អ្នកជំនួញសញ្ជាតិអង់គ្លេសរូបនេះ ត្រូវកំណត់ចាកចេញពីតំណែងរបស់លោកជាមួយបិសាចក្រហមនៅចុងឆ្នាំ២០២១ឯណោះ ប៉ុន្តែលោកបានសម្រេចប្រកាសពីការចែកផ្លូវនេះភ្លាមៗដោយខ្លួនឯងតែម្តង។
 

ក្រោយការប្រកាស លោក Woodward អះអាងថាលោកពិតជាមានមោទកភាពខ្លាំងណាស់ដែលបានបម្រើ Man Utd និងជាកិត្តិយសដែលបានធ្វើការឱ្យក្លិបបាល់ទាត់ដ៏អស្ចារ្យបំផុតរបស់ពិភពលោកអស់រយៈពេល១៦ឆ្នាំ៕