ជាតិ
អាជ្ញាធរ បិទផ្សារទឹកថ្លា និងការលក់ដូរជុំវិញផ្សារ មួយទៀត ផ្សារទឹកថ្លា រូបភាពពីរដ្ឋបាលខណ្ឌសែនសុខ
× ភ្នំពេញ៖ រដ្ឋបាលខណ្ឌសែនសុខ សម្រេចបិទផ្សារទឹកថ្លា និងការលក់ដូរជុំវិញផ្សារទឹកថ្លា ដែលស្ថិតនៅសង្កាត់ទឹកថ្លា ខណ្ឌសែនសុខ រយៈពេល១៤ថ្ងៃ ចាប់ពីថ្ងៃទី ២២ ដល់ថ្ងៃទី៥ ឧសភា ដើម្បីទប់ស្កាត់ការរាលដាលនៃជំងឺកូវីដ-១៩ ដល់អាជីវករ និងពលរដ្ឋដែលចេញចូលផ្សារ។
រដ្ឋបាលខណ្ឌសែនសុខ បញ្ជាក់ក្នុងសេចក្តីជូនដំណឹង នៅថ្ងៃទី២២ ខែមេសាថា នារយៈប៉ុន្មានថ្ងៃចុងក្រោយនេះ មានអាជីវករ និងពលរដ្ឋបានឆ្លងជំងឺកូវីដ-១៩ ដែលស្ថានភាពនេះ បានឆ្លងរាលដាលកាន់តែរហ័ស ធ្វើឲ្យមានការព្រួយបារម្ភ និងចាំបាច់ត្រូវមានវិធានការសុខាភិបាល ដើម្បីទប់ស្កាត់ជាបន្ទាន់។
រដ្ឋបាលខណ្ឌសែនសុខ បានអំពាវនាវដល់ពលរដ្ឋ អាជីវករ សន្តិសុខ បុគ្គលិក កម្មកររបម្រើនៅក្នុងផ្សារ ដែលមានអាការសង្ស័យ ប្រញាប់ទៅធ្វើតេស្តជំងឺកូវីដ-១៩ នៅផ្លូវA ខាងត្បូងផ្សារពិភពថ្មីឈូកមាស សង្កាត់ក្រាំងធ្នង់ ខណ្ឌសែនសុខ នៅព្រឹកថ្ងៃទី ២៣ ខែមេសា។
សូមជម្រាបថា បច្ចុប្បន្នមានផ្សារចំនួន១៥ នៅរាជធានីភ្នំពេញ ដូចជាផ្សារអូរឬស្សី, ផ្សារចាស់ ផ្សារដើមគរ,ផ្សារនាគមាស, ផ្សារធំទួលសង្កែ, បឹងត្របែកផ្លាហ្សា, សិនជូរីផ្លាហ្សា, ដេប៉ូ, ស្ទឹងមានជ័យ, ត្រពាំងថ្លឹង, ឯករាជ្យមួយ ,ទួលពង្រ, ឈូកមាស,ផ្សាររីករាយ និងផ្សារពោធិ៍ចិនតុង ដែលបានផ្ទុះជំងឺកូវីដ-១៩ ត្រូវបានបិទជាបណ្តោះអាសន្ន រួមទាំងបិទរាជធានីភ្នំពេញ និងក្រុងតាខ្មៅ ដើម្បីទប់ស្កាត់ជំងឺកូវីដ-១៩៕
© រក្សាសិទ្ធិដោយ thmeythmey.com