COVID-19
ជាតិ
សម្ដេច ហ៊ុន សែន ចេញទៅប្រជុំកំពូលអាស៊ាន នៅឥណ្ឌូណេស៊ី ខណៈមេដឹកនាំ២រូបអវត្តមាន
× ភ្នំពេញ៖ ដូចការគ្រោងទុក នាយករដ្ឋមន្ត្រី ហ៊ុន សែន បានដឹកនាំប្រតិភូកម្ពុជា ទៅចូលរួមកិច្ចប្រជុំកំពូលអាស៊ានពិសេស នៅទីក្រុងហ្សាកាតា ប្រទេសឥណ្ឌូណេស៊ី នាថ្ងៃទី២៣ មេសានេះ។
តាមគម្រោងនោះ សម្ដេច ហ៊ុន សែន ចូលរួមប្រជុំក្រៅផ្លូវការមេដឹកនាំអាស៊ាន រួមទាំងជួបមេដឹកនាំអាស៊ានផ្សេងទៀត នៅថ្ងៃទី២៤ មេសា។ «ក្រោយពីចប់កិច្ចប្រជុំពេញមួយថ្ងៃហើយ ខ្ញុំនឹងវិលត្រឡប់មកកម្ពុជាវិញនៅល្ងាចថ្ងែទី២៤ មេសា ដដែលនេះ»។ នេះបើតាមប្រមុខរដ្ឋាភិបាល ដែលបានសរសេរលើហ្វេសប៊ុកថា ពេលមកដល់កម្ពុជា សម្ដេច និងគណៈប្រតិភូ នឹងផ្ដល់សំណាក ពិនិត្យរកកូវីដ១៩ នៅអាកាសយានដ្ឋានអន្តរជាតិភ្នំពេញ ដើម្បីធានាសុវត្ថិភាពសុខភាពទាំងអស់គ្នា។ ក្រៅពីនេះ ក៏មានការធ្វើចត្តាឡីស័ក១៤ថ្ងៃទៀតផង។
ស្របពេលដែលនាយករដ្ឋមន្ត្រីកម្ពុជា កំពុងធ្វើដំណើរទៅប្រជុំនៅឥណ្ឌូណេស៊ីនេះ លោកនាយករដ្ឋមន្ត្រីថៃ ប្រាយុទ្ធ ចន្ទអ៊ូចា និងប្រធានាធិបតីហ្វីលីពីន លោក រ៉ូឌ្រីហ្គោ ឌូទើតេ សុទ្ធតែប្រកាសមិនចូលរួមកិច្ចប្រជុំមេដឹកនាំអាស៊ាន។ មេដឹកនាំទាំងពីរសុទ្ធតែអះអាងថា ខ្លួនរវល់តាមដាន និងគ្រប់គ្រងស្ថានភាពរីករាលដាលនៃជំងឺកូវីដ-១៩ នៅក្នុងប្រទេស។
កិច្ចប្រជុំមេដឹកនាំអាស៊ាន នៅឥណ្ឌូណេស៊ី នឹងត្រូវជជែកពីស្ថានការណ៍នយោបាយនៅមីយ៉ាន់ម៉ា។មេដឹកនាំសិង្ហបុរី កម្ពុជា ម៉ាឡេស៊ី វៀតណាម ឡាវ ព្រុយណេ រូមទាំងមេដឹកនាំយោធាមីយ៉ាន់ម៉ា នឹងមានវត្តមានក្នុងកិច្ចប្រជុំនេះ៕
© រក្សាសិទ្ធិដោយ thmeythmey.com