នាវាមុជទឹក KRI Nanggala 402 បានបាត់ការទាក់ទងនៅព្រឹកថ្ងៃទី២១ ខែមេសាកន្លងទៅអំឡុងពេលលំហាត់មួយក្បែរកោះបាលី។ នាវាមុជទឹកដែលផលិតនៅអាល្លឺម៉ង់នេះ មិនអាចទាក់ទងបានភ្លាមៗក្រោយសុំការអនុញ្ញាតមុជចុះក្រោមសមុទ្រ។ អាជ្ញាធរឥណ្ឌូណេស៊ីបញ្ជាក់ថា នាវានេះបំពាក់អុកស៊ីសែនដែលប្រើបាន៣ថ្ងៃប៉ុណ្ណោះក្រោយការរលត់ថាមពល។

 

គិតត្រឹមថ្ងៃទី២៤ ខែមេសា ការរុករកនៅមិនទាន់មានលទ្ធផលអ្វី។ នាវាចម្បាំង យន្តហោះរុករក និងយោធារាប់រយនាក់ចូលក្នុងការប្រតិបត្តិការសង្រ្គោះនេះ។ អាមេរិក សិង្ហបុរី ម៉ាឡេស៊ី និងអូស្ត្រាលី ក៏បញ្ជូនកម្លាំងរបស់ខ្លួនទៅជួយផងដែរ។ អំឡុងការរុករកនៅក្បែរកោះបាលី ក្រុមអ្នកជួយសង្រ្គោះប្រទះឃើញប្រេងនៅត្រង់ទីតាំងដែលនាវាមុជចុះក្រោម ដែលនាំឱ្យមានការសន្និដ្ឋានថា ធុងប្រេងរបស់នាវាទំនងមានបញ្ហា។

 

យ៉ាងណាមិញ ឥណ្ឌូណេស៊ី មិនទាន់បកស្រាយអ្វីឡើយទាក់ទងមូលហេតុនៃការបាត់នាវានេះ។ KRI Nanggala 402 ជានាវាមុជទឹកមួយក្នុងចំណោមនាវាមុជទឹក៥គ្រឿងដែលឥណ្ឌូណេស៊ីមាននៅពេលបច្ចុប្បន្ន។ ឥណ្ឌូណេស៊ី មាននាវានេះពីរគ្រឿង ឯបីគ្រឿងទៀតទិញពីកូរ៉េខាងត្បូង។

 

ក្រុមមន្ត្រីឥណ្ឌូណេស៊ីបញ្ជាក់ថា ប្រសិននាវាមុជទឹកមិនទាន់ខូចខាត ហើយប្រព័ន្ធមុខងារនានានៅដំណើរការ ខ្យល់អាចមានគ្រប់នៅត្រឹមព្រឹកថ្ងៃទី២៤ ខែមេសា។ ប៉ុន្តែ អ្នកនាំពាក្យកងទ័ពឥណ្ឌូណេស៊ី Achmad Riad និយាយក្នុងសន្និសីសារព័ត៌មានមួយថា បើទោះមិនទាន់រកឃើញក្ដី ជាមួយឧបករណ៍ដែលមាន ក្រុមរុករកអាចកំណត់ទីតាំងនាវាបាន៕