លោក ស៊ុយ លីនប៉ាវ ជាអ្នកនិពន្ធរឿងបែបប្រលោមលោក និងរឿងអប់រំកុមារ។ តាមពិតទៅពីដំបូង លីនប៉ាវ មិនដែលប៉ង ចង់ក្លាយជាអ្នកនិពន្ធឡើយ។ គឺលោកចង់ធ្វើជាស្ថាបត្យករ ដែលត្រូវនឹងជំនាញកំពុងសិក្សានៅសកលវិទ្យាល័យ។ ប៉ុន្តែអ្វីដែលធ្វើឲ្យយុវជនរូបនេះ ក្លាយជាអ្នកនិពន្ធ គឺផ្តើមចេញពីការអានសៀវភៅមួយក្បាលរបស់អ្នកនិពន្ធ សុខ ចាន់ផល ក្រោមចំណងជើងថា«ខែរងា»។ ជាសិស្សពូកែខាងផ្នែកវិទ្យាសាស្រ្ត ក្រោយអានរឿងប្រលោមលោកជាលើកដំបូង លីនប៉ាវ បានស្ញប់ស្ញែងនឹងស្នាដៃកវីនិពន្ធដ៏ល្បីរូបនេះ ក៏សាកល្បងរៀននិពន្ធប្រលោមលោកដោយខ្លួនឯងដែលមានចំណងជើងថា «ដំបូលផ្ទះស្រី»។ កាលណោះស្នាដៃនេះ លីនប៉ាវ បានយកបង្ហោះតាមគណនីហ្វេសប៊ុកខ្លួន ដើម្បីឱ្យមិត្តភក្តិក្នុងបណ្ដាញសង្គមអានកម្សាន្ត។


 

នៅចុងឆ្នាំ២០១៧ ដោយមានការជំរុញពីមិត្តភក្តិ លីនប៉ាវ បានយករឿងប្រលោមលោកដំបូងដែលខ្លួនបាននិពន្ធលេង ដាក់ពាក្យចូលរួម ដើម្បីបានចូលរៀនវគ្គបណ្ដុះបណ្ដាលតែងនិពន្ធមួយ។ ជាឱកាស គណៈកម្មការ បានជ្រើសរើសលីនប៉ាវ ជាសិក្ខាកាមរៀនវគ្គតែងនិពន្ធរយៈពេល៩ខែ។ ក្រោយបញ្ចប់វគ្គបណ្ដុះបណ្ដាល លីនប៉ាវ និងសិក្ខាកាមរួមជំនាន់ ចំនួន៩នាក់ទៀត បានបង្កើត ក្រុមតែងនិពន្ធវ័យក្មេងមួយឈ្មោះ «ទសប៉ាកកា» ដោយមានការជួយជ្រោមជ្រែងពីគ្រូបង្រៀនតែងនិពន្ធក្នុងវគ្គបណ្ដុះបណ្ដាលនោះផងដែរ។ «ខ្ញុំគិតថា នេះជាការបើកផ្លូវមួយ ដើម្បីឱ្យខ្ញុំឈានជើងទៅវិស័យតែងនិពន្ធ»។ នេះជាការបញ្ជាក់របស់លោក លីនប៉ាវ។
 

ប្រឡូកក្នុងវិស័យនេះកាន់តែជ្រៅ ធ្វើឱ្យនិស្សិតវ័យ២២ឆ្នាំរូបនេះ កាន់តែដក់ចិត្តស្រលាញ់ការតែងនិពន្ធ។ លោកជឿថាការងារនេះបានជួយអភិវឌ្ឍន៍ដល់សង្គមកម្ពុជា តាមរយៈការជួយបង្កើនការអាន។ «បើសង្គមមួយសម្បូរអ្នកអាន សង្គមមួយនោះសម្បូរដោយបញ្ញវន្ត»។ 
 

លីនប៉ាវ បានចាប់យកអាជីពតែងនិពន្ធអស់រយៈពេល៣ឆ្នាំមកហើយ។ ស្នាដៃនិពន្ធរឿងសម្រាប់កុមារ និងរឿងប្រលោមលោក របស់លោករួមមាន កូនអ្នករើសសំរាម, សារិកាតូច, បណ្ដឹងគីង្គក់, មានលុយបាត់ម៉ែ, ចរិយាយក្សកំណាច, កូនស្វាតូចនិងហ្មដំរី និងបឹងអតីតជាដើម។ ក្រៅពីរឿងបោះពម្ភផ្សាយ លីនប៉ាវ ក៏មានស្នាដៃរឿងប្រលោកលោកខ្លីៗ ជាច្រើនបង្ហោះតាមហ្វេកប៊ុក។  ភាគច្រើនជារឿងបែបកំប្លែង ដែលឲ្យអ្នកអានហើយសប្បាយចិត្តកាត់បន្ថយអារម្មណ៍ស្មុគស្មាញពីការសិក្សានិងការងារ។
 

ទោះបីចាប់ផ្ដើម អាជីពនេះដោយចៃដន្យក៏ពិតមែន ប៉ុន្តែលីនប៉ាវ មិនបានធ្វើដោយចុងដៃចុងជើងឡើយ។  អ្នកនិពន្ធរូបនេះ បានអះអាងថា ខ្លួនបានប្រឹងរៀនសូត្រ ស្រាវជ្រាវចំណេះដឹងបន្ថែម និងសម្ភីដុសខាត់សមត្ថភាពតាមរយៈការចូលរួមប្រកួតតែងនិពន្ធក្នុងកម្មវិធីជាច្រើន ដើម្បីទទួលបានបទពិសោធន៍ អភិវឌ្ឍន៍ចំណេះតែងនិពន្ធរបស់ខ្លួន។
 

ជាមួយគ្នានេះ ក្នុងនាមជា អ្នកនិពន្ធ និងជាយុវជនជំនាន់ក្រោយ លោក លីនប៉ាវ ចង់ឱ្យយុវជន ងាកមកស្រលាញ់ការអាន ព្រោះមានតែការអានទេ ទើបធ្វើឲ្យមនុស្សអាចអភិវឌ្ឍន៍គំនិតនិងសមត្ថភាព។ យុវជនមកពីខេត្តកំពង់ធំរូបនេះបានអះអាងដូច្នេះ៖ «ការអានទាំងអស់សុទ្ធតែល្អ មិនថាជាការអានកាសែត ប្រលោមលោក បែបទស្សនៈវិទ្យា។ ខ្ញុំរាប់ថា ពិតជាមានសារសំខាន់ និងចាំបាច់បំផុត ដោយលើសពីការជួយឱ្យចេះសរសេរខ្មែរត្រឹមត្រូវ រាល់ការអានទាំងអស់ យើងតែងតែទទួលបានអ្វីមួយមកវិញ ដែលជាតម្លៃអប់រំ បទពិសោធន៍ជីវិត ការកម្សាន្ត ឬក៏ជាផ្លូវមួយធ្វើឱ្យយើងឆ្ពោះទៅភាពល្អប្រសើរ»។ 
 

ងាកមកការសិក្សារបស់និស្សិតផ្នែកស្ថាបត្យកម្មនេះវិញ សល់ពេលមិនយូរប៉ុន្មានលោកនឹងត្រូវបញ្ចប់ថ្នាក់បរិញ្ញាបត្រ ដែលត្រូវរៀនរយៈពេល៥ឆ្នាំ។ ក្រោយរៀនចប់ លីនប៉ាវ នឹងចាប់ផ្តើមការងារជាស្ថាបត្យករ ដែលត្រូវនឹងជំនាញដែលខ្លួនកំពុងសិក្សា ប៉ុន្តែលោកសន្យាថា នៅតែបន្តអាជីពតែងនិពន្ធ ដើម្បីជួយលើកកម្ពស់ការអាននៅកម្ពុជាឲ្យកាន់តែរីកចម្រើន៕