អាចថាជាលើកដំបូង ក្រុមហ៊ុនផលិតវ៉ាក់សាំងបង្ការជំងឺកូវីដ-១៩ ត្រូវបានប្ដឹងដោយអ្នកទិញព្រោះតែការប្រគល់វ៉ាក់សាំងយឺតយ៉ាវ ខណៈដែលជំងឺនេះកំពុងអុកឡុកខ្លាំង។ លោក Stefan De Keersmaecker អ្នកនាំពាក្យសហភាពអឺរ៉ុប បានប្រកាសនៅថ្ងៃទី២៦ ខែមេសា ថា គណៈកម្មការអឺរ៉ុប បានចាប់ផ្ដើមនីតិវិធីផ្លូវច្បាប់ប្រឆាំងក្រុមហ៊ុនផលិតវ៉ាក់សាំង AstraZeneca ចំពោះការបំពានកិច្ចព្រមព្រៀងទិញលក់វ៉ាក់សាំង។

 

«លក្ខខណ្ឌខ្លះនៃកិច្ចព្រមព្រៀង មិនត្រូវបានគោរព ហើយក្រុមហ៊ុនក៏មិនអាចផ្ដល់យុទ្ធសាស្រ្តទុកចិត្តដើម្បីធានាការដឹកជញ្ជូនវ៉ាក់សាំងទាន់ពេល។» លោក De Keersmaecker លើកឡើងបែបនេះ មុនបន្តថា គណៈកម្មការអឺរ៉ុប ធ្វើសកម្មភាពតំណាងឱ្យរដ្ឋសមាជិកទាំង២៧ ដែលគាំទ្របណ្ដឹងនេះ។ អឺរ៉ុបចង់ឱ្យក្រុមហ៊ុន AstraZeneca ដឹកជញ្ជូនវ៉ាក់សាំងឱ្យប្រជាជនអឺរ៉ុបឱ្យបានគ្រប់តាមអ្វីដែលបានសន្យាកន្លងមក។

 

នីតិវិធីប្ដឹងប្ដល់ នឹងធ្វើនៅតុលាការទីក្រុងព្រុចសែល ព្រោះបែលហ្ស៊ិកជាទីតាំងដែលភាគីទាំងពីរឯកភាពគ្នាដោះស្រាយបញ្ហា។ 

 

AstraZeneca ដែលជាក្រុមហ៊ុនចម្រុះអង់គ្លេស-ស៊ុយអែត បានបដិសេធសកម្មភាពផ្លូវច្បាប់របស់សហភាពអឺរ៉ុប តែស្វាគមន៍ដំណើរការនេះដើម្បីដោះស្រាយបញ្ហាឱ្យបានឆាប់។ ក្នុងសេចក្ដីថ្លែងការណ៍របស់ខ្លួន ក្រុមហ៊ុនផលិតឱសថអះអាងថា ខ្លួនគោរពកិច្ចព្រមព្រៀងជាមួយគណៈកម្មការអឺរ៉ុប ហើយនឹងការពារខ្លួននៅតុលាការ។

 

បើតាមក្រុមហ៊ុន វ៉ាក់សាំងចំនួន៥០លានដូស ត្រូវដឹកឱ្យអឺរ៉ុបនៅត្រឹមដំណាច់ខែមេសា ប៉ុន្តែសហភាពអឺរ៉ុបអះអាងថា ចំនួននេះតិចជាងអ្វីដែលខ្លួនត្រូវបាន។ មកទល់ពេលនេះ អឺរ៉ុបបញ្ជាក់ថា ខ្លួនទើបទទួលបានវ៉ាក់សាំងចំនួន៣១លានដូសនៃចំនួនសរុប១២០លានដូសដែលរំពឹងទទួលបាននៅបីខែដំបូងនៃឆ្នាំ២០២១ ។ ក្រុមហ៊ុនក៏ព្រមានដែរថា ខ្លួនអាចផ្ដល់វ៉ាក់សាំង៧០លានដូសប៉ុណ្ណោះក្នុងចំណោមវ៉ាក់សាំង១៨០លានដូសដែលត្រូវដឹកឱ្យអឺរ៉ុបនៅខែមិថុនា៕