លោក ហុក គឹមចេង បានបញ្ជាក់ថា មន្ទីរឯកជននានា ដែលអាចទទួលបានការអនុញ្ញាតពីក្រសួងសុខាភិបាល ក្នុងការព្យាបាលអ្នកជំងឺកូវីដ-១៩ គឺត្រូវមានទីតាំងមន្ទីរពេទ្យ ផ្លូវ និងចំណតរថយន្តត្រឹមត្រូវ។ ជាពិសេសត្រូវមានរថយន្តគិលាន និងបរិក្ខាពេទ្យសង្រ្គោះអ្នកជំងឺគ្រប់គ្រាន់, មានបន្ទប់សង្គ្រោះបន្ទាន់ដោយបំពាក់បរិក្ខាពេទ្យឱ្យសមស្រប សម្រាប់ព្យាបាលអ្នកជំងឺកូវីដ-១៩, គ្រូពេទ្យនិងបុគ្គលិកពេទ្យគ្រប់គ្រាន់ ដោយឆ្លងកាត់នូវវគ្គបណ្តុះបណ្តាលត្រឹមត្រូវ...។

 

ក្រៅពីមន្ទីរពេទ្យឯកជន២កន្លែង ដែលបានស្នើសុំទទួលព្យាបាលអ្នកជំងឺកូវីដ-១៩ ពីក្រសួងសុខាភិបាលនោះ ក៏មានមន្ទីរពេទ្យចំនួន១០កន្លែងទៀត បានស្នើសុំប្រើប្រាស់នូវឧបករណ៍ Rapid Antigen test Covid-19 ផងដែរ ដើម្បីចូលរួមវិស័យសុខាភិបាលសាធារណៈ ក្នុងការទប់ស្កាត់ការឆ្លងរាលដាលនៃជំងឺកូវីដ-១៩។ បើតាមលោក ហុក គឹមចេង មន្ទីរពេទ្យ១០កន្លែង ដែលបានស្នើសុំធ្វើតេស្តរកមេរោគកូវីដ-១៩នោះ គឺមានមន្ទីរពេទ្យ៣កន្លែងហើយ ដែលទទួលបានការអនុញ្ញាត ពីក្រសួងសុខាភិបាល។ 

 

កាលពីថ្ងៃទី២២មេសា ឆ្នាំ២០២១ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល  បានអនុញ្ញាតឱ្យសេវាសុខាបាលឯកជនស្របច្បាប់(មន្ទីរពេទ្យឯកជន មន្ទីរពហុព្យាបាល មន្ទីរសម្រាកព្យាបាល និងសម្ពព) ប្រើប្រាស់ Rapid Antigen test Covid-19  ក្នុងក្របខណ្ឌទូទាំងប្រទេស។ 

 

កម្ពុជាបានរកឃើញអ្នកវិជ្ជមាន ១១០៦៣នាក់ ក្នុងនោះអ្នកពាក់ព័ន្ធនឹងព្រឹត្តិការណ៍សហគមន៍ ២០កុម្ភៈ មានចំនួន១០៥១៣ នាក់។ អ្នកសះស្បើយសរុបមាន៣ ៧០៤នាក់ ក្នុងនោះអ្នកស្លាប់សរុបឡើងដល់៨២នាក់៕