កីឡាករបាល់ទាត់ល្បីៗ និងលេចធ្លោមួយចំនួនបានទទួលរងការរើសអើងជាតិសាសន៍យ៉ាងខ្លាំងក្លានៅប៉ុន្មានខែចុងក្រោយនេះនៅលើបណ្តាញសង្គម។ ដោយសារទង្វើមិនសមរម្យកើនឡើង បានជំរុញឱ្យមានការអំពាវនាវឱ្យក្រុមហ៊ុនអ៊ីនធឺណិត បង្កើតសកម្មភាពតឹងរឹងជាងមុន។
 

សម្ព័ន្ធសហព័ន្ធកីឡាបាល់ទាត់ជាច្រើន រួមមានអង់គ្លេស និង Premier League នឹងមិនចុះផ្សាយ ឬបង្ហោះអ្វីលើបណ្តាញសង្គមរបស់ពួកគេទេនៅចុងសប្តាហ៍នេះ។ របៀបធ្វើពហិការដើម្បីប្រឆាំងការរសើអើងដូច្នេះ ទទួលបានការគាំទ្រពីស្ថាប័នកីឡា អ្នកឧបត្ថម្ភ និងប្រព័ន្ធផ្សព្វផ្សាយរហូតពួកគេចូលរួមអនុវត្តតាម។
 

UEFA បានប្រកាសលើវេបសារបស់ខ្លួនថា នឹងចូលរួមប្រឆាំងសកម្មភាពរើសអើង ដោយមិនផ្សាយអ្វីទេនៅចុងសប្តាហ៍នេះ ពោលគឺចាប់ពីថ្ងៃសុក្រទី៣០ ខែមេសា រហូតដល់ថ្ងៃច័ន្ទទី២ ខែឧសភា។
 

លោក Aleksander Ceferin ប្រធាន UEFA អះអាងជុំវិញការសម្រេចចូលរួមយុទ្ធនាការនេះថា៖ «មានការរំលោភបំពានទាំងនៅលើទីលាន និងនៅលើបណ្តាញសង្គម។ នេះមិនអាចទទួលយកបានទេហើយចាំបាច់ត្រូវបញ្ឈប់ដោយមានជំនួយពីអាជ្ញាធរសាធារណៈ និងស្ថាប័ននីតិប្បញ្ញត្តិ និងក្រុមហ៊ុនប្រព័ន្ធផ្សព្វផ្សាយសង្គមយក្ស។ ការអនុញ្ញាតិឱ្យវប្បធម៌ស្អប់ខ្ពើមរីកដុះដាលជាមួយនិទណ្ឌភាព នឹងបង្កឱ្យមានគ្រោះថ្នាក់ មិនត្រឹមតែសម្រាប់បាល់ទាត់ប៉ុណ្ណោះទេ ប៉ុន្តែសម្រាប់សង្គមទាំងមូលផងដែរ»។
 

កន្លងមក Thierry Henry អតីតខ្សែប្រយុទ្ធក្រុម Arsenal និងជម្រើសជាតិបារាំង ធ្លាប់បានអនុវត្តរួចមកហើយ ដោយប្រកាន់ជំហរដាច់ខាតក្នុងការប្រឆាំងនឹងការរើសអើងពូជសាសន៍នៅលើប្រព័ន្ធផ្សព្វផ្សាយសង្គម។ Henry ដែលមើលឃើញពីការរំលោភបំពានលើអ៊ីនធឺណិតកើនឡើងកាន់តែខ្លាំងនាពេលបច្ចុប្បន្ន រហូតលុបគណនីបណ្តាញសង្គមរបស់ខ្លួនទៀតផង៕