COVID-19
ជាតិ
ក្រសួងព័ត៌មាន បន្តអនុញ្ញាតឱ្យអ្នកកាសែត ធ្វើដំណើរនៅតំបន់បិទខ្ទប់ លើកលែងតំបន់ក្រហម ដល់ថ្ងៃទី៥ ឧសភា
អាជ្ញាធរអនុវត្តវិធានការបិទខ្ទប់របស់រដ្ឋាភិបាល ខណៈអ្នកសារព័ត៌មាន ចុះផ្ដិតយករូបភាពបិទខ្ទប់ព្រំប្រទល់រាជធានីភ្នំពេញ និងក្រុងតាខ្មៅ ខេត្តកណ្ដាល កាលពីថ្ងៃទី១៥ មេសា ២០២១
×![]()
ដោយ: ធឿន បញ្ញាឬទិ្ធ
ភ្នំពេញ៖ អ្នកកាសែត អាចធ្វើដំណើរនៅតំបន់បិទខ្ទប់ លើកលែងតែតំបន់ក្រហម រហូតដល់ថ្ងៃទី៥ ឧសភា។ នេះបើតាមលិខិតរបស់ក្រសួងព័ត៌មាន កាលពីថ្ងៃទី២៨ មេសា។
អ្នកកាសែតនៅតាមស្ថាប័នផ្សព្វផ្សាយ ភាគច្រើនទទួលបានលិខិតអនុញ្ញាតរបស់ក្រសួងព័ត៌មាន ក្នុងការធ្វើដំណើរឆ្លងកាត់ទីតាំងបិទខ្ទប់ នៅក្នុងរាជធានីភ្នំពេញ និងទីក្រុងតាខ្មៅ ខេត្តកណ្ដាលហើយ។ ប៉ុន្តែក្នុងលិខិតរបស់ក្រសួងព័ត៌មាននោះ បានកំណត់កាលបរិច្ឆេទ ចាប់ពីថ្ងៃទី១៨ ដល់ថ្ងៃទី៣០ មេសាប៉ុណ្ណោះ។
ប៉ុន្តែដោយសាររដ្ឋាភិបាល ក៏ដូចជាអាជ្ញាធររាជធានីភ្នំពេញ និងក្រុងតាខ្មៅ ខេត្តកណ្ដាល បន្តពន្យាបិទខ្ទប់មួយសប្ដាហ៍ទៀត រហូតដល់ថ្ងៃទី៥ ឧសភា នោះ ទើបក្រសួងព័ត៌មានសម្រេចបន្តសុពលភាពឱ្យអ្នកសារព័ត៌មាន ប្រើប្រាស់លិខិតដែលទទួលអនុញ្ញាតពីក្រសួង រហូតដល់ថ្ងៃកំណត់បិទខ្ទប់របស់រដ្ឋដែរ។
លិខិតរបស់ក្រសួងព័ត៌មាន បានបញ្ជាក់ដូច្នេះថា៖«រាជរដ្ឋាភិបាលកម្ពុជា បានសម្រេចបន្តការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ ខេត្តកណ្ដាល សម្រាប់រយៈពេល៧ថ្ងៃបន្តទៀត រហូតដល់ថ្ងៃទី៥ ឧសភា ២០២១ ដូច្នេះអង្គភាពប្រព័ន្ធផ្សព្វផ្សាយ និងមន្ត្រីព័ត៌មានទាំងអស់ ដែលបានទទួលលិខិតអនុញ្ញាតធ្វើដំណើរពីក្រសួងព័ត៌មាន អាចបន្តសុពលភាព និងប្រើប្រាស់លិខិតអនុញ្ញាតធ្វើដំណើរ រហូតដល់ការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ នៃខេត្តកណ្ដាលបានបិទបញ្ចប់»។
ដ្បិតក្រសួងព័ត៌មាន បន្តសុពលភាពដល់ការធ្វើដំណើររបស់កាសែតពិតមែន ប៉ុន្តែអ្នកកាសែតដែលមានលិខិតអនុញ្ញាតរបស់ក្រសួងនេះ អាចឆ្លងកាត់ត្រឹមតែតំបន់លឿង និងលឿងទុំប៉ុណ្ណោះ ដោយមិនអាចឆ្លងកាត់តំបន់ក្រហមបានឡើយ។ នេះបើតាមលោក ផុស សុវណ្ណ អគ្គនាយកនៃអគ្គនាយកដ្ឋានព័ត៌មាន និងសោតទស្សន៍ និងជាអ្នកនាំពាក្យក្រសួងព័ត៌មាន។
អ្នកនាំពាក្យរូបនេះ បានសរសេរលើហ្វេសប៊ុកខ្លួន ដូច្នេះថា៖«ក្រសួងព័ត៌មានបន្តសុពលភាពលិខិតធ្វើដំណើរដែលបានចេញរួចហើយជូនមន្ត្រីរាជការក្រសួងព័ត៌មាន និងអ្នកសារព័ត៌មានជាតិនិងអន្តរជាតិរហូតដល់រាជធានីភ្នំពេញ និងក្រុងតាខ្មៅដក បម្រាមរាំងខ្ទប់។ ប៉ុន្តែលិខិតនេះមិនអាចប្រើប្រាស់បានទេសម្រាប់ការធ្វើដំណើរក្នុងតំបន់ក្រហម»។
រដ្ឋាភិបាល សម្រេចចេញវិធានការបិទខ្ទប់រាជធានីភ្នំពេញ និងទីក្រុងតាខ្មៅ ខេត្តកណ្ដាលនេះ ក្នុងគោលបំណង ហាមពលរដ្ឋដែលគ្មានភារកិច្ចចាំបាច់នោះ ចេញក្រៅពាសវាលពាសកាល ដែលនាំឱ្យឆ្លងនូវជំងឺកូវីដ-១៩។ វិធានការរបស់រដ្ឋបែបនេះ ក្នុងទិសដៅទប់ស្កាត់ និងកាត់ផ្ដាច់ការចម្លងរបស់មេរោគដ៏កាចសាហាវមួយនេះ។
ក្រៅពីចេញវិធានការបិទខ្ទប់ រដ្ឋាភិបាល ក៏ដូចជាអាជ្ញាធរភ្នំពេញ និងខេត្តកណ្ដាល ក៏ចេញកំណត់តំបន់លឿង លឿងទុំ និងក្រហម ដើម្បីងាយស្រួលគ្រប់គ្រងស្ថានការណ័ទៀតផង។ តំបន់ដែលត្រូវបានកំណត់ជាតំបន់ក្រហម គឺសំដៅដល់ភូមិសាស្ត្រដែលមានការរាលដាលកូវីដ-១៩ ធ្ងន់ធ្ងរ តំបន់លឿងទុំក្នុងកម្រិតមធ្យម និងលឿងសម្រាប់កម្រិតស្រាល។
អត្ថបទទាក់ទង
គិតមកដល់ពេលនេះ កម្ពុជាមានអ្នកជំងឺកូវីដ-១៩ ចំនួន១៣,៧៩០ករណី ក្នុងនោះ១៣,២៣៧នាក់ពាក់ព័ន្ធព្រឹត្តិការណ៍សហគមន៍។ ចំណែកអ្នកជាសះស្បើយ៥,២០០នាក់ និងស្លាប់៩៦នាក់៕
Tag:
អ្នកសាព័ត៌មាន
COVID-19
© រក្សាសិទ្ធិដោយ thmeythmey.com
