និន្នាការជំរុញឱ្យព្យួរវ៉ាក់សាំងប្រឆាំងកូវីដ-១៩ ហាក់ចាប់ផ្តើមទទួលបានគាំទ្រខ្លាំង ជាពិសេសពីបណ្តាប្រទេសធំៗ។ ក្នុងនោះ អាមេរិកក៏បានប្តូរជំហររបស់ខ្លួន មកគាំទ្រឱ្យព្យួរវ៉ាក់សាំងជាសកល ដើម្បីជួយប្រទេសក្រីក្រផងដែរ។   សហភាពអឺរ៉ុបបានបង្ហាញពីឆន្ទៈចរចាលុបចោលប៉ាតង់វ៉ាក់សាំងកូវីដ-១៩។ 

 

ថ្លែងនៅក្នុងសន្និសីទតាមប្រព័ន្ធវីដេអូដែលរៀបចំដោយសកលវិទ្យាល័យ European University Institute លោកស្រី Ursula von der Leyen ប្រធានគណៈកម្មការអឺរ៉ុប បានលើកឡើងថា អឺរ៉ុប បើកចំហរក្នុងការពិភាក្សាលើវិបត្តិប្រកបដោយប្រសិទ្ធភាព និងភាពជាក់ស្តែង។ 

 

«អឺរ៉ុប បានត្រៀមខ្លួនរួចហើយ ក្នុងការពិភាក្សា ជុំវិញការបោះបង់ចោលកម្មសិទ្ធិបញ្ញាលើវ៉ាក់សាំងប្រឆាំងកូវីដ-១៩ អាចជួយបានរបៀបណា»។ លោកស្រី Ursula von der Leyen បានបន្ថែមបែបនេះ។ 

 

ចំណែករដ្ឋមន្រ្តីការបរទេសអាមេរិក លោក អាន់តូនី ប្ល៊ីងខិន ក៏បញ្ជាក់ជាថ្មីជំហររបស់អាមេរិកដែលចង់ឃើញវ៉ាក់សាំងត្រូវបានចែកចាយទូលំទូលាយ។ បើតាមប្រមុខការទូតអាមេរិក បញ្ហាសំខាន់នៅពេលនេះ គឺបង្កើនការផលិតវ៉ាក់សាំងប្រឆាំងកូវីដ-១៩ ប្រសិនបើមនុស្សជាច្រើនមិនទាន់ទទួលបានវ៉ាក់សាំងប្រឆាំងកូវីដ-១៩ទេ មនុស្សជាច្រើនផ្សេងទៀត នឹងមិនទាន់មានសុវត្ថិភាពពេញលេញនៅឡើយ។ 

 

ប៉ុន្តែសំណើខាងលើត្រូវបានប្រទេសមួយចំនួន និងក្រុមហ៊ុនផលិតឱសថបដិសេធ។ ក្រុមហ៊ុនផលិតឱសថមួយចំនួននិយាយការពារថា ការលុបចោលប៉ាតង់កូវីដ-១៩ ជារឿងងាយស្រួល ប៉ុន្តែដំណើរការផលិត ជាបញ្ហាស្មុគស្មាញ។ ក្រុមហ៊ុនផលិតឱសថ Pfizer ដែលផលិតវ៉ាក់សាំងបង្ការកូវីដ-១៩ អះអាងថា ប្រទេសជាច្រើន នឹងបន្តទិញវ៉ាក់សាំងប្រឆាំងកូវីដ-១៩ ព្រោះក្រុមហ៊ុនផ្សេងទៀត ដែលមានសិទ្ធិផលិតវ៉ាក់សាំង មិនអាចបង្កើនការផលិតវ៉ាក់សាំងដូចការគ្រោងទុក ខណៈនីតិវិធីក៏ស្មុគស្មាញថែមទឿត។ 

 

លោក Michael Yee អ្នកវិភាគមួយរូប បានបញ្ជាក់ថា បញ្ហានៅពេលនេះ មិនមែនប៉ាតង់ឡើយ ប៉ុន្តែវាជាការខ្វះធាតុកម្រ និងសម្ភារសម្រាប់ផលិត។ 

 

នៅអាល្លឺម៉ង់វិញ កំពុងមានការខ្វែងគំនិតគ្នានៅក្នុងជួររដ្ឋាភិបាល ជុំវិញប៉ាតង់វ៉ាក់សាំងកូវីដ-១៩។ រដ្ឋមន្រ្តីសុខាភិបាល លោក Jens Spahn បានប្រកាសគាំទ្រគោលដៅរបស់លោកប្រធានាធិបតីអាមេរិក ក្នុងការផ្តល់វ៉ាក់សាំងទៅប្រទេសផ្សេងទៀត។ ប៉ុន្តែអ្នកនាំពាក្យរដ្ឋាភិបាលអាល្លឺម៉ង់ បានលើកឡើងនៅក្នុងសេចក្តីថ្លែងការណ៍មួយ នៅថ្ងៃទី៦ ខែឧសភា ថា ការការពារកម្មសិទ្ធិបញ្ញា ជាប្រភពនៃគំនិតឆ្នៃប្រឌិត និងត្រូវតែការពារ នៅពេលអនាគត។  

 

ការចរចាលើការលុបចោលប៉ាតង់កូវីដ-១៩ អាចនឹងចំណាយពេលយូរ ព្រោះនៅក្នុងប្រព័ន្ធអង្គការពាណិជ្ជកម្មពិភពលោក (WTO) វាទាមទារឱ្យមានការឯកភាពពីប្រទេសចំនួន១៦៤ដែលជាសមាជិក។ ម្យ៉ាងវិញទៀត ការចរចា គឺមានលក្ខណៈស្មុគស្មាញច្រើនតទៅទៀត។ 

 

គួររំលឹកថា សំណើឱ្យបោះបង់ប៉ាតង់វ៉ាក់សាំងប្រឆាំងកូវីដ-១៩ ត្រូវបានស្នើដោយឥណ្ឌា និងអាហ្រ្វ៊ិកខាងត្បូង រួមទាំងប្រទេសជាច្រើនផ្សេងទៀត នៅអង្គការពាណិជ្ជកម្មពិភពលោក (WTO)។ ការព្យួរចោលប៉ាតង់ មានន័យថា ប្រទេសផ្សេងទៀត អាចផលិតវ៉ាក់សាំងប្រឆាំងកូវីដ-១៩ បាន តាមរយៈការចែករំលែករូបមន្តផលិតវ៉ាក់សាំងពីក្រុមហ៊ុនផលិតវ៉ាក់សាំង៕