COVID-19
ជាតិ
ជប៉ុន ផ្ដល់រថយន្តគិលានសង្រ្គោះ ៣៥គ្រឿងដល់កម្ពុជា លោកស្រី យក់ សម្បត្តិ និង លោក ការិម៉ាតា អាត្សឹស៊ី ឧបទូតនៃស្ថានទូតជប៉ុនប្រចាំកម្ពុជា។ រូបភាព៖ហ្វេសប៊ុកស្ថានទូតជប៉ុននៅកម្ពុជា
× ភ្នំពេញ៖ រដ្ឋាភិបាលជប៉ុន បានផ្ដល់រថយន្តគិលានសង្រ្គោះចំនួន ៣៥គ្រឿង ដល់រដ្ឋាភិបាលកម្ពុជា ដើម្បីប្រើប្រាស់ក្នុងវិស័យសុខាភិបាល ពិសេសក្នុងការប្រយុទ្ធប្រឆាំងនឹងជំងឺកូវីដ-១៩។ រថយន្តគិលានសង្រ្គោះ ទាំង ៣៥គ្រឿងនេះ ត្រូវបានផ្ដល់ដោយលោក ការិម៉ាតា អាត្សឹស៊ី ឧបទូតនៃស្ថានទូតជប៉ុនប្រចាំកម្ពុជា កាលពីថ្ងៃទី៧ ឧសភា នាឃ្លាំងឱសថកណ្តាលនៃក្រសួងសុខាភិបាល។
បើតាមសេខចក្ដីប្រកាសរបស់ស្ថានទូតជប៉ុន ជំនួយនេះ ផ្អែកលើកិច្ចសហប្រតិបត្តិការជាមួយបណ្តាប្រទេសអាស៊ាន ដែលបានប្រកាសដោយអតីតនាយករដ្ឋមន្រ្តីជប៉ុន លោក ស៊ីនហ្សូ អាបិ នៅក្នុងកិច្ចប្រជុំកំពូលអាស៊ានបូកបី កាលពីខែមេសាឆ្នាំមុន។ គំនិតផ្តួចផ្តើមនេះ ជាផ្នែកមួយនៃការងារជាច្រើនរបស់រដ្ឋាភិបាលជប៉ុនក្នុងការប្រយុទ្ធប្រឆាំងនឹងជំងឺកូវីដ១៩ លើកម្រិតសកល។
ក្រៅពីផ្ដល់រថយន្តគិលានសង្រ្គោះ រដ្ឋាភិបាលជប៉ុន ក៏បានផ្ដល់គ្រឿងបរិក្ខារវេជ្ជសាស្រ្តជាច្រើន ដូចជាឧបករណ៍ត្រួតពិនិត្យកាំរស្មីអ៊ិច ឧបករណ៍ធ្វើរោគវិនិច្ឆ័យអ៊ុលត្រាសោន ឧបករណ៍ផលិតអុកស៊ីសែន និងគ្រែសង្គ្រោះបន្ទាន់ជូនដល់កម្ពុជា។ ជាមួយគ្នានេះ ជប៉ុន នឹងបន្តកិច្ចសហប្រតិបត្តិការជាមួយរាជរដ្ឋាភិបាលកម្ពុជា ក្នុងការផ្តល់នូវឧបករណ៍ចាំបាច់ដល់កម្ពុជា។
រដ្ឋាភិបាលជប៉ុន សង្ឃឹមថាការ ផ្គត់ផ្គង់ទាំងនេះ នឹងអាចជួយដល់ភាគីពាក់ព័ន្ធផ្នែកសុខាភិបាលនៅកម្ពុជា ដែលកំពុងប្រយុទ្ធប្រឆាំងជាមួយនឹងជំងឺកូវីដ-១៩៕
Tag:
ជប៉ុន
covid-19
រថយន្តគិលានសង្រ្គោះ
© រក្សាសិទ្ធិដោយ thmeythmey.com