សហភាពសហព័ន្ធយុវជនកម្ពុជារាជធានីភ្នំពេញ កាលពីសប្តាហ៍មុន បានប្រមូលទិញល្ពៅ និងត្រឡាច សរុប ១២.៥តោន ពីកសិករ ដើម្បីយកមកចែកជូនពលរដ្ឋមួយចំនួន ដែលកំពុងជួបបញ្ហាខ្វះខាតស្បៀងអាហារ ក្នុងរាជធានីភ្នំពេញ។ សហភាពសហព័ន្ធយុវជនកម្ពុជារាជធានីភ្នំពេញ ចាត់ទុកសកម្មភាពនេះថា ជាការសម្រួលដល់កសិករមួយចំនួនដែលកំពុងជួបបញ្ហាទីផ្សារផង និងជាការជួយមួយផ្នែកទៀតដល់ពលរដ្ឋដែលកំពុងត្រូវការស្បៀង​ចាំបាច់ផង​។

 

កសិផល ដែលសហភាពសហព័ន្ធយុវជនកម្ពុជារាជធានីភ្នំពេញ បានប្រមូលទិញពីកសិករ ជាបន្តបន្ទាប់កាលពីសប្តាហ៍មុននោះ មានល្ពៅ​ចំនួន ៨តោន និងត្រឡាច ចំនួន ៤,៥តោន។ កសិផលទាំងនោះ នឹងត្រូវចែកទៅពលរដ្ឋ ដែលមានតម្រូវការ នៅតាមគោលដៅមួយចំនួន ក្នុងរាជធានីភ្នំពេញ​។ សហភាពសហព័ន្ធយុវជនកម្ពុជារាជធានីភ្នំពេញ បានសរសេរនៅទំព័រហ្វេសប៊ុករបស់ខ្លួនកាលពីយប់ថ្ងៃទី៧ ឧសភាថា៖ «នេះគឺជាសិល្បៈនៃការចែករំលែកដ៏សំខាន់ ក្នុងស្ថានភាពដែលប្រទេសកំពុងជួបការលំបាកដោយការរីករាលដាលនៃជំងឺកូវីដ-១៩​។ មួយផ្នែកគឺសម្រួលការលំបាកដែលបងប្អូនកសិករ និងមួយផ្នែកទៀតគឺបងប្អូនដែលមានជីវភាពខ្វះខាត ហើយមានតម្រូវការស្បៀង»។ ​
 

ទោះយ៉ាងណាក៏ដោយការប្រមូលទិញកសិផលពីកសិករ របស់សហភាពសហព័ន្ធយុវជនកម្ពុជា រាជធានីភ្នំពេញ ជាផ្នែកមួយតិចតួចនៅឡើយ ខណៈដែលកសិករដែលដាំដុះបន្លែ អ្នកចិញ្ចឹមសត្វ អ្នកចិញ្ចឹមត្រី ជាច្រើននៅកម្ពុជា ​បានជួបបញ្ហាទីផ្សារដោយសារវិបត្តិកូវីដ-១៩។ ពួកគេ កំពុងព្រួយបារម្ភពីការបាត់បង់ចំណូល ដោយសារកសិផល និងទិន្នផលសត្វចិញ្ចឹមរបស់ខ្លួនគ្មានអ្នកទិញ ខណៈការអំពាវនាវជាបន្តបន្ទាប់របស់ក្រុមកសិករ ​ឲ្យក្រសួង និងស្ថាប័នពាក់ព័ន្ធ​ជួយរកទីផ្សារ ហាក់មិនបានផលជាដុំកំភួន៕