COVID-19
ជាតិ
សេដ្ឋកិច្ច
រដ្ឋាករទឹកស្វយ័តភ្នំពេញ មិនយកថ្លៃទឹក៣ខែ ពីកម្មករ និងសិស្សនៅតំបន់ក្រហម
× ភ្នំពេញ៖ រដ្ឋាករទឹកស្វយ័តក្រុងភ្នំពេញ(PPWSA) សម្រេចមិនយកថ្លៃទឹកចំនួន ៣ខែ ពីកម្មករ-កម្មការិនី និងសិស្ស-និស្សិត ដែលកំពុងរស់នៅតំបន់ក្រហម ក្នុងភូមិសាស្ត្ររាជធានីភ្នំពេញ និងក្រុងតាខ្មៅ។ នេះបើតាមសេចក្ដីជូនដំណឹង របស់រដ្ឋាករទឹកស្វយ័តក្នុងភ្នំពេញ នៅថ្ងៃទី៨ ខែឧសភា។
ការលើកលែងថ្លៃទឹកចំពោះពលរដ្ឋនៅតំបន់ក្រហម របស់ PPWSAនេះ ធ្វើឡើងបន្ទាប់ពីមានអំពាវនាវពីសម្តេច ហ៊ុន សែន នាយករដ្ឋមន្ត្រី កាលពីថ្ងៃទី៨ ខែឧសភា។ នៅក្នុងសេចក្ដីជូនដំណឹងដដែល PPWSA បានរៀបរាប់ដូច្នេះ៖«រដ្ឋាករទឹកស្វយ័តក្រុងភ្នំពេញ នឹងចូលរួមជួយសម្រួលបន្ទុក ដោយជួយបង់ថ្លៃប្រើប្រាស់ទឹកស្អាតរយៈពេល ៣ខែ គឺខែមីនា មេសា និងឧសភា ឆ្នាំ២០២១ សម្រាប់មូលដ្ឋានផ្ទះជួល ដែលកម្មករ កម្មការិនី សិស្ស និស្សិត កំពុងស្នាក់នៅចំនួន ៨៧០ទីតាំង ស្ថិតក្នុងតំបន់ក្រហម នៃភូមិសាស្រ្តរាជធានីភ្នំពេញ និងក្រុងតាខ្មៅ អំឡុងបិទខ្ទប់»។
គួររំឭកដែរថា ក្រៅពីរដ្ឋាករទឹកស្វយ័តក្រុងភ្នំពេញមិនយកថ្លៃទឹក នៅក្នុងសារសំឡេងជិត៣០នាទីកាលពីថ្ងៃទី៨ ឧសភា សម្តេច ហ៊ុន សែន ក៏បានស្នើទៅអគ្គិសនីកម្ពុជា (EDC) ឱ្យជួយសម្រួលថ្លៃភ្លើង ដល់កម្មករ-កម្មការិនី ដែលកំពុងស្នាក់នៅតំបន់ក្រហម និងដែលពុំទាន់បានបើកប្រាក់ឈ្នួលពីថៅកែនៅឡើយដែរ។ ទន្ទឹមនឹងនេះ ប្រមុខរដ្ឋាភិបាល ក៏សំណូមពរដល់ម្ចាស់ផ្ទះជួលដែលមានលទ្ធភាពពិចារណាបញ្ចុះថ្លៃផ្ទះ ឬលើកលែងការយកថ្លៃផ្ទះ ឬពន្យារពេលការយកថ្លៃផ្ទះ ពីកម្មករកម្មការិនី នៅក្នុងតំបន់ក្រហមទាំងនៅរាជធានីភ្នំពេញ និងនៅតាមបណ្តាខេត្តផ្សេងៗទៀតដែរ។
ទាក់ទងនឹងការលើកលែង ឬពន្យារពេលបង់ថ្លៃអគ្គិសនីសម្រាប់កម្មករ-កម្មការិនីនៅតំបន់ក្រហម អគ្គិសនីកម្ពុជា (EDC) នៅមិនទាន់ឆ្លើយតបយ៉ាងណានឹងសំណើរបស់នាយករដ្ឋមន្ត្រីនៅឡើយ គិតត្រឹមព្រឹកថ្ងៃទី៩ ឧសភានេះ។ ប៉ុន្តែកាលពីថ្ងៃទីអង្គារ ទី៤ឧសភា លោក កែវ រតនៈ អគ្គនាយក EDC បានអះអាងប្រាប់សារព័ត៌មានថ្មីៗថា EDC គ្មានគោលការណ៍លើកលែង ពន្យារពេលបង់ថ្លៃភ្លើង ២ទៅ៣ខែនោះទេ ព្រោះបើធ្វើដូច្នេះនឹងប៉ះពាល់ខ្លាំងដល់លំហូរហិរញ្ញវត្ថុ របស់ស្ថាប័នខ្លួន។ មូលហេតុដែលមិនអាចពន្យារពេល ឬលើកលែងថ្លៃអគ្គិសនីបាន ត្រូវបានអគ្គនាយក EDC ពន្យល់ថា ដោយសារកម្ពុជា ទិញអគ្គិសនីពីប្រទេសជិតខាង ដែលគេមានសិទ្ធិកាត់ផ្ដាច់ភ្លើងពីកម្ពុជាភ្លាមៗ បើរដ្ឋគ្មានប្រាក់បង់ទៅគេ។ មិនតែប៉ុណ្ណោះ គេនឹងពិន័យជាការប្រាក់ នូវលុយដែលជំពាក់ ថែមទៀត ដែលទៅជាមហន្តរាយសម្រាប់ជាតិទាំងមូល។ យ៉ាងណាក៏ដោយ អគ្គនាយក EDC ទទួលស្គាល់ថាពលរដ្ឋនៅតំបន់ក្រហមពិតជាមានបញ្ហាហិរញ្ញវត្ថុ ហើយការសម្របសម្រួលគឺភាកិច្ចរបស់អាជ្ញាធរមូលដ្ឋាន និងអគ្គលេខាដ្ឋានផ្នែកគាំពារសង្គមរបស់ក្រសួងសេដ្ឋកិច្ចនិងហរិញ្ញវត្ថុ៕
Tag:
ទឹក
ភ្លើង
PPWSA
EDC
កម្មករ
តំបន់ក្រហម
© រក្សាសិទ្ធិដោយ thmeythmey.com