COVID-19
ជាតិ
ម្ចាស់រថយន្តឈ្នួល និងពលរដ្ឋជាង១០០នាក់ដែលចេញពីតំបន់ក្រហម ត្រូវបានដាក់ឱ្យធ្វើចត្តាឡីស័ក
× ភ្នំពេញ៖ អ្នករត់រថយន្តឈ្នួលនិងពលរដ្ឋចំនួន ១០៤នាក់ ត្រូវបានអាជ្ញាធរខណ្ឌពោធិ៍សែនជ័យ ឃាត់ខ្លួនដើម្បីយកសំណាក និងធ្វើចត្តាឡីស័កចំនួន១៤ថ្ងៃបន្ទាប់ពីព្យាយាមធ្វើដំណើរចេញពីតំបន់ក្រហម ក្នុងសង្កាត់ចោមចៅទី២ខណ្ឌពោធិ៍សែនជ័យ រាជធានីភ្នំពេញ។
ប្រជាពលរដ្ឋនិងអ្នករត់រថយន្តឈ្នួល ចំនួន ១០៤នាក់ បានល្មើសនូវវិធានការហាមឃាត់ការធ្វើដំណើរចេញចូលនិងឆ្លងកាត់តំបន់ក្រហម។ កាលពីរសៀលថ្ងៃទី៨ ឧសភា លោក ឃួង ស្រេងអភិបាលរាជធានីភ្នំពេញ បានដាក់បទបញ្ជឱ្យឃាត់ខ្លួន អ្នកល្មើសចំនួន ១០៤នាក់នៅសង្កាត់ចោមចៅទី២ ខណ្ឌពោធិ៍សែនជ័យ ដែលព្យាយាមធ្វើដំណើរចេញពីតំបន់ក្រហម។
លោក ម៉េត មាសភក្ដី អ្នកនាំពាក្យសាលារាជធានីភ្នំពេញបានប្រាប់សារព័ត៌មានថ្មីៗតាមទូរសព្ទថា អ្នករត់រថយន្តឈ្នួល និងពលរដ្ឋទាំង១០៤នាក់ ត្រូវបានអាជ្ញាធរយកសំណាក និងធ្វើចត្តាឡីស័កនៅអនុវិទ្យាល័យគោកបញ្ជាន់។ ទាក់ទងនឹងលទ្ធផលនៃការយកសំណាក លោក ម៉េត មាសភក្ដី បញ្ជាក់ថា មិនទាន់ចេញលទ្ធផលនោះទេ។ក្នុងចំណោមមនុស្សទាំង១០៤នាក់ខាងលើ មាន៤៩នាក់ ជាពលរដ្ឋដែលជាអ្នកដំណើរ និង៥៥នាក់ទៀតជាអ្នករត់រថយន្តឈ្នួល។ ក្រៅពីឃាត់ខ្លួនមនុស្សទៅធ្វើចត្តាឡីស័ក និងយកសំណាកអាជ្ញាធរក៏ឃាត់បានរថយន្តចំនួន៤២គ្រឿងផងដែរ។
បើតាមអ្នកនាំពាក្យខាងលើអ្នករត់រថយន្តឈ្នួល និងពលរដ្ឋចំនួន ១០៤នាក់បានព្យាយាមធ្វើដំណើរចាកចេញពីតំបន់ក្រហមដែលជាតំបន់មានការឆ្លងរាលដាលធ្ងន់ធ្ងរ។ លោក ម៉េត មាសភក្ដី អំពាវនាវដល់ពលរដ្ឋនិងអ្នករត់រថយន្តឈ្នួលផ្សេងទៀត សូមកុំយកតម្រាប់តាមអ្នករត់រថយន្តឈ្នួលនិងពលរដ្ឋចំនួន ១០៤នាក់នោះ។ លោក ម៉េត មាសភក្ដី បន្តថាក្នុងករណីមិនបានចាត់ការទាន់ពេលវេលាទេ អាចបង្កហានិភ័យយ៉ាងខ្លាំងដល់បណ្ដាខេត្តនានា ដែលពលរដ្ឋទាំងនោះបានធ្វើដំណើរទៅ៕
Tag:
ពោធិ៍សែនជ័យ
រថយន្តឈ្នួល
តំបន់ក្រហម
COVID-19
© រក្សាសិទ្ធិដោយ thmeythmey.com