របាយការណ៍ទាំងពីរ បានបង្ហាញថា គិតដល់ត្រឹមទី៩ឧសភា ឆ្នាំ២០២១  ក្នុងចំណោមពលរដ្ឋទូទាំងជិត១,៨លានដែលបានចាក់វ៉ាក់សាំងកូវីដ-១៩នោះ គឺមានជិត៤០ម៉ឺននាក់ ជាពលរដ្ឋរស់នៅក្នុងតំបន់ក្រហម នៃរាជធានីភ្នំពេញ។ ក្រសួងការពារជាតិ បានបើកយុទ្ធនាការចាក់វ៉ាក់ឱ្យពលរដ្ឋនៅតំបន់ក្រហម ក្នុងខណ្ឌ ខណ្ឌមានជ័យ ខណ្ឌដង្កោ ខណ្ឌកំបូល ខណ្ឌពោធិ៍សែនជ័យ និងខណ្ឌឫស្សីកែវ ចាប់តាំងពីថ្ងៃទី១ឧសភា ឆ្នាំ២០២១។  

 

យុទ្ធនាការចាក់វ៉ាក់សាំងកូវីដ-១៩ ស្ថិតក្នុងវិធានការផ្សេងៗរបស់រាជរដ្ឋាភិបាល ដូចជា ការបិទខ្ទប់តំបន់ដែលប្រឈមឆ្លងខ្លាំង និងបម្រាមគោចរជាដើម ដើម្បីកាត់ផ្ដាច់ការចម្លងជំងឺកូវីដ-១៩។ ដើម្បីជោគជ័យលើការងារនេះ រដ្ឋាភិបាល បានកំណត់ផែនការជាជំហានៗ ដោយជំហានទី១ ពីខែឧសភា ដល់ពាក់កណ្តាលខែកក្កដា ឆ្នាំ២០២១ ចាក់វ៉ាក់សាំងឱ្យពលរដ្ឋនៅភ្នំពេញ និងខេត្តកណ្តាល ឱ្យអស់ដែលមានជិត២,៥លាននាក់។

 

សម្រាប់ជំហានទី២ នៃផែនការរបស់រដ្ឋាភិបាល នឹងបន្តចាក់វ៉ាក់សាំងកូវីដ-១៩ ជូនពលរដ្ឋរស់នៅក្នុងខេត្តតាកែវ កំពង់ស្ពឺ កំពង់ឆ្នាំង កំពង់ចាម ព្រៃវែង ព្រះសីហនុ ស្វាយរៀង សៀមរាប បន្ទាយមានជ័យ កែប និងខេត្តកំពត។  ជំហាននេះ នឹងអនុវត្តឡើងចាប់ពីពាក់កណ្តាលខែកក្កដា ដល់ខែកញ្ញា ឆ្នាំ២០២១។ ប្រជាជនរស់នៅក្នុងខេត្តទាំង១១ មានជាង២លាននាក់ ដែលត្រូវទទួលបានការចាក់វ៉ាក់សាំងបង្ការជំងឺកូវីដ-១៩ប្រមាណ៤លានដូស។

 

ចំពោះជំហានទី៣ នឹងអនុវត្តពីខែតុលា ដល់ខែវិច្ឆិកា ឆ្នាំ២០២១ ទៅលើប្រជាជនជាង៤,៤លាននាក់ រស់នៅក្នុងខេត្តចំនួន១២។ ក្នុងនោះ មានខេត្តកោះកុង បន្ទាយមានជ័យ ប៉ៃលិន ពោធិ៍សាត់ បាត់ដំបង ស្ទឹងត្រែង ត្បូងឃ្មុំ រតនៈគិរី មណ្ឌលគិរី ព្រះវិហារ កំពង់ធំ និងក្រចេះ។

 

បើតាមប្រសាសន៍សម្តេច ហ៊ុន សែន វ៉ាក់សាំងរបស់សាធារណៈប្រជានិតចិន ចំនួន១លានដូសទៀត នឹងមកដល់កម្ពុជា ក្នុងសប្តាហ៍នេះ ខណៈកម្ពុជាមានវ៉ាក់សាំង ជាង៤លានដូសដែលបាននិងកំពុង ចាក់ជូនពលរដ្ឋសព្វថ្ងៃ៕