«យើងបានបញ្ជូនទៅចៅក្រមចំនួន២នាក់ ដោយម្នាក់ជាអ្នកបិតស្រា និងម្នាក់ទៀតជាអ្នកយកស្រាទៅលាយជាថ្នាំខ្មែរ ដែលមានសារធាតុមេតាណុលខ្ពស់ ដែលបណ្តាលឲ្យមនុស្សស្លាប់»។ នេះជាការលើកឡើងរបស់លោក ឯក ឆេងហួត ព្រះរាជអាជ្ញាអមសាលាដំបូងខេត្តកំពត ដែលបញ្ជាក់មកសារព័ត៌មានថ្មីៗតាមទូរសព្ទ នាថ្ងៃទី២៨ ខែឧសភា។ 

 

ករណីពុលស្រានៅស្រុកកំពង់ត្រាច ខេត្តកំពតកន្លងមកនេះ បានធ្វើឲ្យមនុស្សចំនួន១០នាក់បានស្លាប់ និងមានអ្នកជំងឺចំនួន៤៦នាក់។ បច្ចុប្បន្នអ្នកជំងឺទាំងនោះបានជាសះស្បើយ និងត្រឡប់ទៅផ្ទះវិញអស់ហើយ។ នេះបើតាមលោក ញា ប៊ុនថន ប្រធានមន្ទីរសុខាភិបាលខេត្តកំពត។

 

ក្រសួងសុខាភិបាល បានអំពាវនាវដល់ពលរដ្ឋ បញ្ឈប់ពិសាស្រាដែលបិត និងផលិត គ្មានបច្ចេកទេសត្រឹមត្រូវ។ ជាមួយគ្នានេះក្រសួងអំពាវនាវដល់អ្នកបិតស្រាបញ្ឈប់ផលិតស្រាដែលដាក់សារធាតុមេតាណុលខ្ពស់ ដើម្បីជៀសវាងករណីពុលស្រា៕