បញ្ញវន្ត និងអ្នកនិពន្ធចិនដ៏ល្បីឈ្មោះមួយចំនួន បានរងការរិះគន់ខ្លាំងកាលពីសប្តាហ៍មុន។ រឿងរ៉ាវនេះបានកើតឡើងបន្ទាប់ពីក្រុមអ្នកជាតិនិយមបានរកឃើញឈ្មោះពួកគេក្នុងចំណោមបញ្ជីឈ្មោះបញ្ញវន្តចិនចំនួន១៤៤នាក់ ដែលត្រូវបានឧបត្ថម្ភដោយមូលនិធិរដ្ឋាភិបាលជប៉ុន ដើម្បីឱ្យបញ្ញវន្តទាំងអស់នោះធ្វើទស្សនកិច្ច និងចែករំលែកបទពិសោធនៅជប៉ុនពីឆ្នាំ២០០៨ ដល់ឆ្នាំ២០១៦ ។

 

អ្នកនិយមលេងអ៊ីនធឺណិត២នាក់ដែលប្រើប្រាស់ឈ្មោះ Diguaxiong Laoliu និងលោក Guyan Muchan ដែលមានអ្នកគាំទ្រជាង៦លាននាក់នៅលើគណនី បានចោទថា បញ្ញវន្តទាំងនោះបានចាប់ដៃជាមួយជប៉ុនដើម្បីទទួលបានជំនួយហិរញ្ញវត្ថុពីទីក្រុងតូក្យូ។ មួយវិញទៀត ពួកគេបានចូលរួមក្នុងយុទ្ធនាការមួយ ដោយបានចែកចាយលើឈ្មោះបញ្ញវន្តទាំងនេះជាជាជនក្បត់ជាតិទៀតផង។

 

ទាក់ទងរឿងចម្រូងចម្រាសនេះ ក្រសួងការបរទេសចិន ចេញមុខការពារបញ្ញវន្តទាំងនោះ។ ក្នុងសន្និសីទសារព័ត៌មានថ្ងៃទី៩ ខែមិថុនា អ្នកនាំពាក្យក្រសួងការបរទេសចិន លោក Wang Wenbin បានបញ្ជាក់ថា ទំនាក់ទំនងរវាងប្រជាជន និងប្រជាជនដែលគាំទ្រដោយរដ្ឋាភិបាល បានរួមចំណែកជាវិជ្ជមានដល់ទំនាក់ទំនងការទូតរវាងចិន និងជប៉ុន។ 

 

«យើងសង្ឃឹមថានឹងទទួលបានការយល់ដឹង ការទុកចិត្ត និងមិត្តភាពកាន់តែស៊ីជម្រៅតាមរយៈទំនាក់ទំនងប្រកបដោយភាពល្អប្រសើរ និងស្ថិរភាពឥតឈប់ឈរក្នុងចំណោមប្រជាជនចិននិងជប៉ុន»។ លោក Wang បញ្ជាក់បែបនេះ។ 

 

គួររំលឹកថា ក្នុងរយៈពេលប៉ុន្មានឆ្នាំនេះ អ្នកនិយមលេងអ៊ិនធឺណិតចិន តែងតែប្រើពាក្យរិះគន់ធ្ងន់ៗលើទំនាក់ទំនងជាមួយបណ្តាប្រទេសលោកខាងលិច និងប្រទេសអាស៊ីខ្លះ ជាពិសេសជប៉ុនដែលធ្លាប់ធ្វើទុក្ខបុកម្នេញជនជាតិចិនកាលពីអតីតកាល។ បើតាមការបញ្ជាក់របស់មន្ត្រីក្រសួងការបទេសចិន ពួកគេទាំងនោះគឺជ្រុលជាតិនិយម៕