ក្នុងចំណោមផ្ទះបណ្តែតទឹក និងបែចិញ្ចឹមត្រី រួមទាំងសំណង់មិនរៀបរយសរុបប្រមាណ១,៧០០ទីតាំង ដែលមាននៅតាមដងទន្លេក្នុងខណ្ឌមួយចំនួននៃភូមិសាស្ត្ររាជធានីភ្នំពេញនោះ គឺមានជិត១,៤០០ទីតាំងហើយបានរើចេញពីផ្ទៃទន្លេ។ នេះជាការលើកឡើងរបស់លោក សាន សុខសីហា អ្នកនាំពាក្យស្នងការរាជធានីភ្នំពេញ។
ពលរដ្ឋជាជនជាតិខ្មែរ-ឥស្លាម និងជនជាតិវៀតណាម ដែលរស់នៅលើផ្ទៃទឹកក្នុងខណ្ឌច្បារអំពៅ ខណ្ឌព្រែកព្នៅ ខណ្ឌជ្រោយចង្វារ និងខណ្ឌឬស្សីកែវជាដើមនោះ បានស្ម័គ្រចិត្តរុះរើផ្ទះបណ្តែតទឹក និងបែចិញ្ចឹមត្រីខ្លួនជាបន្តបន្ទាប់ចាប់តាំងពីមានសេចក្តីសម្រេចរបស់សាលារាជធានីភ្នំពេញ នៅថ្ងៃទី២មិថុនា ឆ្នាំ២០២១មក។
«គិតដល់ថ្ងៃនេះ មានផ្ទះបណ្តែតទឹក និងបែចិញ្ចឹមត្រីជិត១,៤០០ទីតាំងហើយ ត្រូវបានរើចេញពីទន្លេ»។ លោក សាន សុខសីហា បន្តប្រាប់សារព័ត៌មានThmeyThmeyតាមទូរសព្ទនារសៀលថ្ងៃទី១៥មិថុនាដូច្នេះ៖«ពលរដ្ឋដែលបានចេញពីទន្លេក្នុងភូមិសាស្ត្ររាជធានីភ្នំពេញយើង គឺមានមួយចំនួនបានឡើងគោក និងមួយចំនួនទៀត បានបណ្តែតខ្លួនតាមក្បូន ឬក៏ផ្ទះបណ្តែតទឹកហ្នឹង ទៅមូលដ្ឋានក្នុងខេត្តនានា»។
បើតាមអ្នកនាំពាក្យស្នងការរាជធានីភ្នំពេញរូបនេះ ចំពោះផ្ទះបណ្តែតទឹក និងបែចិញ្ចឹមត្រីប្រមាណ៣០០ទីតាំងទៀតដែលមិនទាន់បានរុះរើចេញពីទេនោះ កងកម្លាំងប៉ូលិសកំពុងបន្តសហការជាមួយអាជ្ញាធរតាមខណ្ឌនីមួយៗ ដើម្បីចុះណែនាំដល់ពលរដ្ឋទាំងនោះ ឱ្យរើសំណង់របស់ខ្លួនចេញពីផ្ទៃទន្លេ។
ជាមួយគ្នានេះ លោក ផៃ ស៊ីផាន ដែលជាអ្នកពាក្យរាជរដ្ឋាភិបាល បានលើកឡើងថា ផ្ទះបណ្តែតទឹក បែចិញ្ចឹមត្រី និងសំណង់នានាដែលមិនទាន់រុះរើសចេញពីទន្លេក្នុងភូមិសាស្ត្ររាជធានីភ្នំពេញនោះ គឺដាច់ខាតត្រូវតែរើចេញឱ្យអស់ដើម្បីកែលម្អបរិស្ថាន និងរៀបចំសណ្តាប់តាមដងទន្លេឱ្យស្របទៅតាមច្បាប់បរិស្ថានដែលអនុម័តដោយរដ្ឋសភាជាតិកម្ពុជា។ ប៉ុន្តែលោកបានបញ្ជាក់ថា ការុះរើសំណង់ទាំងនេះឱ្យអស់ពីទន្លនៅក្នុងរយៈពេលណាមួយនោះ គឺអាស្រ័យទៅតាមលទ្ធភាពជាក់ស្តែង។
«សំណង់នៅតាមទន្លេ[ក្នុងភូមិសាស្ត្ររាជធានីភ្នំពេញ]ទាំងអស់ ត្រូវតែរើចេញពីផ្ទៃទន្លេ»។ លោក ផៃ ស៊ីផាន មានប្រសាសន៍ប្រាប់សារព័ត៌មានThmeyThmeyតាមទូសព្ទដូច្នេះ ដោយបានបន្តរៀបរាប់ថា៖«ក្នុងករណីជាក់ស្តែងណាមួយដែលសំណង់មិនទាន់អាចរុះរើសំណង់ចេញពីទន្លេភ្លាមៗបាន គឺយើងទុកពេលឱ្យគេមួយរយៈពេលសិន ប៉ុន្តែពលរដ្ឋទាំងអស់ត្រូវតែចាកចេញពីកន្លែងដែលយើងអនុវត្ត ដោយអាចស្នាក់នៅម្តុំមួយណាសិន»។
បើតាមលោក ផៃ ស៊ីផាន ពលរដ្ឋដែលបានចាកចេញពីទន្លេ មានមួយចំនួនបានជួលផ្ទះគេស្នាក់នៅ ហើយចំពោះពលរដ្ឋដែលរស់នៅកម្ពុជាខុសច្បាប់ គឺដាច់ខាតបណ្តេញចេញពីទឹកដីកម្ពុជា។ អ្នកនាំពាក្យរាជរដ្ឋាភិបាលរូបនេះ បានបញ្ជាក់បន្ថែមថា ការអនុវត្តវិធានការរបស់រដ្ឋបាលរាជធានីភ្នំពេញ គឺធ្វើឡើងក្នុងគោលដៅកែលម្អបរិស្ថាន និងរៀបចំសោភ័ណភាពតាមដងទន្លេ ដោយមិនមានពាក់ព័ន្ធនឹងរឿងច្បាប់អន្តោប្រវេសន៍ ហើយក៏មិនលាយឡំជាមួយរឿងនយោបាយនិងការរើសអើងពូជសាសន៍ណាមួយដែរ។
កាលពីថ្ងៃទី២មិថុនា ឆ្នាំ២០២១ លោក ឃួង ស្រេង អភិបាលរាជធានីភ្នំពេញ បានចេញលិខិតជូនដំណឹង ដល់អ្នកមានផ្ទះបណ្ដែតទឹកលើផ្ទៃទន្លេទាំងអស់ ឱ្យរុះរើចេញជាបន្ទាន់ ត្រឹមថ្ងៃទី៩មិថុនា។ ក្រោយផុតឱសានវាទនេះ អាជ្ញាធរ បានសម្រេចឲ្យមានការរុះរើមិនដោយមិនកំណត់ថ្ងៃឡើយ ព្រោះចង់ឲ្យអ្នកពាក់ព័ន្ធទាំងនោះរុះរើដោយខ្លួនឯង ប៉ុន្តែអាជ្ញាធរ ក៏បានព្រមានអនុវត្តវិធានការរដ្ឋបាល ប្រសិនសំណង់មិនរៀបរយទាំងនោះ នៅបន្តត្រៀបត្រាលើដងទន្លេ។
កាលពីថ្ងៃទី៩មិថុនា លោកម៉េត មាសភក្តី អ្នកនាំពាក្យសាលារាជធានីភ្នំពេញ បាននិយាយប្រាប់សារព័ត៌មានThmeyThmeyដូច្នេះ៖«រហូតដល់ថ្ងៃយើងផុតឱសានវាទនេះ(ថ្ងៃទី៩មិថុនា) យើងចង់ទុកពេលឱ្យពួកគាត់បន្តិចទៀត ព្រោះដោយសារតែយើងឃើញពលរដ្ឋទាំងនោះ កំពុងតែរុះរើចេញទៅហើយ។ អ៊ីចឹង! យើងអត់ចង់ចុះអនុវត្តវិធានការរដ្ឋបាល ភ្លាមទេដែលនាំឱ្យខូចខាតទ្រព្យសម្បត្តិ និងខូចខាតសម្ភារផ្សេងៗជាដើមទេ»៕