ជាតិ
បទយកការណ៍ / បទសម្ភាសន៍
តើការខ្លាចអ្នកធ្លាប់កើតជំងឺកូវីដ-១៩ អាចជារូបភាពនៃការរើសអើងឬទេ?
×
ភ្នំពេញ៖ ទូទាំងពិភពលោក នៅពុំទាន់អាចគ្រប់គ្រងស្ថានការណ៍នៃការរីករាលដាលជំងឺកូវីដ-១៩ ក៏ដូចជារកថ្នាំព្យាបាលជំងឺនេះបាននៅឡើយទេ។ មនុស្សគ្រប់គ្នាសុទ្ធតែខ្លាចរអាមេរោគនេះ ហើយការពារខ្លួនរៀងៗខ្លួន។ តើការការពារខ្លួនពីជំងឺកូវីដ-១៩ និងការភ័យខ្លាចខ្លាំងពេក ចំពោះអ្នកធ្លាប់មានប្រវត្តិកើតជំងឺនេះ អាចមានរូបភាពជាការរើសអើងទេ?
កុំថាឡើយតែមនុស្សដែលធ្លាប់មានជំងឺកូវីដ-១៩ ហើយបានព្យាបាលជាសះស្បើយ សូម្បីតែមនុស្សធម្មតា ដែលពុំមានជំងឺអ្វីសោះនោះ ក៏ត្រូវបានគេខ្លាច និងរក្សាគម្លាតជានិច្ចដែរ។ ក្នុងស្ថានភាពបច្ចុប្បន្ននេះ ក្រសួងសុខាភិបាលកម្ពុជា តម្រូវឱ្យប្រជាជនគ្រប់រូប អនុវត្តវិធានការ៣ការពារ៣កុំ ឱ្យបានខ្ទាប់ខ្ជួនជានិច្ច ដើម្បីធានាថា ពួកគេមិនបានឆ្លងជំងឺដ៏កាចសាហាវនេះ។ ការណ៍នេះ ធ្វើឱ្យគេពិបាកសន្និដ្ឋានបន្តិច ថាការខ្លាចមនុស្សធ្លាប់មានប្រវត្តិកើតជំងឺកូវីដ-១៩ខ្លាំងពេក អាចជារូបភាពនៃការរើសអើងឬយ៉ាងណានោះ។
ទោះជាយ៉ាងណា ករណីរបស់កញ្ញា សុភាព ដែលធ្លាប់បានជួបប្រទះកន្លងមក ក៏គួរឱ្យមានការពិចារណាដែរ។ សុភាព គឺជាឈ្មោះថ្មី របស់នារីម្នាក់សុំមិនបញ្ចេញឈ្មោះ ដែលនាងត្រូវបានគេខ្លាចរអាខ្លាំង ក្រោយពីនាងចេញពីមណ្ឌលចត្តាឡីស័កភ្លាមៗ។
ក្រោយពីធ្វើចត្តាឡីស័កក្នុងមណ្ឌលរួម ចំនួន១៤ថ្ងៃ នាអំឡុងខែមេសា ឆ្នាំ២០២១ កន្លងទៅ កញ្ញា សុភាព តម្រូវឱ្យធ្វើចត្តាឡីស័កនៅក្នុងផ្ទះរបស់ខ្លួន រយៈពេល១៤ថ្ងៃបន្តទៀត ដើម្បីប្រាកដថា នាងពុំមានផ្ទុកជំងឺកូវីដ-១៩។ អះអាងថាខ្លួនមិនមានផ្ទុកជំងឺកូវីដ-១៩ នារីរាងតូចស្គមរូបនេះ ថានាងទៅធ្វើចត្តាឡីស័ក ក៏ព្រោះតែនាងមានអាការក្ដៅខ្លួនខ្លាំង បន្ទាប់ពីនាងចាក់វ៉ាក់សាំងការពារជំងឺកូវីដ-១៩រួច។ ទោះជាយ៉ាងណា នារីវ័យ២២ឆ្នាំរូបនេះ ពុំបានដឹងពីមូលហេតុដែលនាំឱ្យនាងក្ដៅខ្លួនខ្លាំងនោះឡើយ។
លោក ប៉ា ចាន់រឿន
សុភាព បញ្ជាក់៖«ក្រោយពីគ្រូពេទ្យពិនិត្យសំណាករួច គាត់ថាខ្ញុំស្ថិតក្នុងកម្រិតសង្ស័យ គាត់ឱ្យខ្ញុំនៅតាមដានអាការនៅផ្ទះខ្លួនឯង ប៉ុន្តែខ្ញុំខ្លាចហើយអត់ហ៊ាននៅផ្ទះតែម្នាក់ឯង ខ្ញុំក៏សុំឱ្យពេទ្យយកឡានមកដឹងខ្ញុំ។ ក្រោយពីធ្វើចត្តាឡីស័ក១៤ថ្ងៃហើយ ខ្ញុំអត់មានជំងឺកូវីដ-១៩ទេ»។
កាលពីបិទបញ្ចប់ការធ្វើចត្តាឡីស័កដោយខ្លួនឯងភ្លាមៗ សុភាព បានកត់សម្គាល់ឃើញថា មនុស្សនៅជុំវិញខ្លួន ហាក់មានការខ្លាចរអាខ្លួនយ៉ាងខ្លាំង ដោយមានអ្នកខ្លះគ្រាន់តែឃើញនាង ពួកគេនាំគ្នារត់គេចទៅឆ្ងាយភ្លាម។ នាងមិនប្រាកដថា នេះគឺជាទម្រង់នៃការរើសអើងឬយ៉ាងណាឡើយ ប៉ុន្តែសម្រាប់នាង បានប្រកដថាខ្លួនអន់ចិត្ត។
«ខ្ញុំចាំបានថ្ងៃមួយខ្ញុំទៅទិញទំនិញនៅផ្ទះចាប់ហួយមួយ កូនស្រីអ្នកលក់២នាក់ ដែលមានអាយុស្របាលនឹងខ្ញុំដែរ គេគ្រាន់តែឃើញខ្ញុំ គេនាំគ្នារត់ចូលផ្ទះបាត់ ហើយហៅម្ដាយគេឱ្យមកលក់ឱ្យខ្ញុំ។ ខ្ញុំអត់ខឹងទេ ប៉ុន្តែខ្ញុំអន់ចិត្ត។ បើគេចង់ការពារខ្លួន គេអាចពាក់ម៉ាស និងរក្សាគម្លាត ប៉ុន្តែនេះគ្រាន់តែឃើញខ្ញុំភ្លាម គេនាំគ្នារត់ចែកជើងគ្នាអស់ ទាំងដែលខ្ញុំមិនផ្ទុកកូវីដផង ខ្ញុំគ្រាន់តែទៅធ្វើចត្តាឡីស័កសោះ»។
ក្រៅពីអ្នកជិតខាង ប្រវត្តិនៃការធ្វើចត្តាឡីស័ក ក៏បានធ្វើឱ្យមិត្តរបស់នារីកើតនៅរាជធានីភ្នំពេញរូបនេះ មួយចំនួនខ្លាចរអានាងដែរ។ សុភាព បានបង្ហាញអារម្មណ៍របស់ខ្លួនថា នាងបានបាត់បង់ភាពស្និទ្ធស្នាលជាមួយពួកគេ។ នារីសម្ដីមួយៗរូបនេះ អះអាងថា គ្រានោះនាងពិតជាពិបាកទទួលយកស្ថានភាពនោះណាស់។
សុភាព ដែលមានសម្បុរស ពន្យល់បន្ថែមដូច្នេះ៖«បើមនុស្សច្រើនគ្នា ធ្វើបែបនេះ(បង្ហាញភាពភ័យខ្លាចខ្លាំង រហូតរត់គេច) ពេលគេឃើញអ្នកធ្លាប់មានជំងឺកូវីដ-១៩ ឬអ្នកធ្លាប់ធ្វើចត្តាឡីស័ក វានឹងបង្កើតឱ្យពួកគេអន់ចិត្ត ឬបាក់ទឹកចិត្តបាន»។
រីឯលោក ឧត្តម គឺជាឈ្មោះថ្មីរបស់បុរសម្នាក់ ដែលសុំមិនបញ្ចេញឈ្មោះដែរ។ លោក ឧត្តម ធ្លាប់មានផ្ទុកជំងឺកូវីដ-១៩ ហើយត្រូវបានក្រុមគ្រូពេទ្យនាំយកទៅព្យាបាលនៅក្នុងមណ្ឌលរួមមួយ កាលពីពេលកន្លងទៅ។ បុរសម្នាក់នេះ បានជាសះស្បើយពីជំងឺកូវីដ-១៩ ជិត២ខែហើយ។
ខុសពី សុភាព លោក ឧត្តម មិនត្រូវបានគេខ្លាចរអាឡើយ ហើយក្រោយជាពីជំងឺកូវីដ-១៩ គាត់បានបើកអាជីវកម្មម៉ាសា នៅប៉ុន្មានថ្ងៃមុននេះ។ ឧត្តម ដែលជាជនមានពិការភាពភ្នែកទាំងសងខាងពីកំណើតនោះ ពន្យល់បន្ថែម៖«ខ្ញុំអត់បានចេញទៅណាទេ គឺខ្ញុំនៅតែក្នុងផ្ទះប៉ុណ្ណោះ។ មិនមានអ្នកណាខ្លាចខ្ញុំទេ។ មានភ្ញៀវចូលមកម៉ាសាកន្លែងរបស់ខ្ញុំតាមធម្មតា»។
សម្រាប់លោក ប៉ា ច័ន្ទរឿន នាយកប្រតិបត្តិវិទ្យាស្ថានប្រជាធិបតេយ្យកម្ពុជា មើលឃើញថា ស្ថានភាពដែលកញ្ញា សុភាព បានជួបប្រទះ អាចមានពីរទម្រង់។ មួយជាការខ្លាចព្រោះតែប្រវត្តិធ្លាប់មានជំងឺ ហើយមួយទៀត អាចជាការរើសអើង។
លោក ច័ន្ទរឿន បញ្ជាក់ថា ករណីខាងលើអាចគេនៅខ្លាចថា សុភាព នៅមានផ្ទុកជំងឺនៅឡើយ ទើបបានជាគេរត់គេច។ ប៉ុន្តែបើក្នុងករណីដែលគេបានដឹងថា សុភាព ឬមនុស្សដទៃទៀតដែលធ្លាប់កើតជំងឺកូវីដ-១៩ បានព្យាបាលជាសះស្បើយហើយ ប៉ុន្តែគេនៅតែរត់គេច ឬបង្ហាញការខ្លាចរអាខ្លាំងជ្រុលពេកទៀត នោះគឺស្ថិតក្នុងទម្រង់នៃការរើសអើងហើយ។
«នៅពេលគាត់យកការភ័យខ្លាចដាក់មុខពេក ហើយគាត់មិនផ្ដល់សេវាកម្ម ឬលក់ទំនិញឱ្យអ្នកដែលធ្លាប់មានប្រវត្តិកើតជំងឺកូវីដ-១៩ នោះក្លាយជាការរើសអើងហើយ។ វាបង្ហាញពីភាពអយុត្តិធម៌ អសីលធម៌ ចំពោះអ្នកដែលធ្លាប់ឈឺ តែគេព្យាបាលជាហើយនោះ។ ពលរដ្ឋគ្រប់រូប គួរឈ្វេងយល់ថា អ្នកកើតជំងឺនេះគឺជាជនរកគ្រោះ ដូច្នេះពួកយើងគួរតែសារទរ លើកទឹកចិត្ត ហើយភ្ជាប់ទំនាក់ទំនងដដែលនៅពេលដែលពួកគេជា ដោយគ្រាន់តែរក្សាគម្លាត និងពាក់ម៉ាស ដើម្បីការពារខ្លួន»។
ចំណែកអ្នកនាង ធន ស្រីពៅ ប្រធានផ្នែកពិគ្រោះយោបល់ នៃបណ្ដាញទូរសព្ទជំនួយកុមារកម្ពុជា បានលើកឡើងថា ករណីអ្នកធ្លាប់មានជំងឺកូវីដ-១៩ ឬអ្នកធ្លាប់ធ្វើចត្តាឡីស័ក ជួបបញ្ហាដូចខាងលើ ហើយពួកគេគិតថាអន់ចិត្ត ឬបាក់ទឹកចិត្តពួកគេគួរតែរកសេវាពិគ្រោះផ្លូវចិត្ត។
អ្នកនាង ស្រីពៅ ពន្យល់បន្ថែម៖«អ្វីដែលយើងអាចធ្វើបាន គឺគាំទ្រផ្លូវចិត្តគាត់ និងលើកទឹកចិត្តគាត់។ បើសួរថាធ្វើម៉េច ខ្ញុំមិនអាចឆ្លើយបានទេ ព្រោះវាជាជំនាញនៃការពិគ្រោះយោបល់ ហើយនឹងការលើកទឹកចិត្ត។ ការគាំទ្រអារម្មណ៍គឺស្ថិតក្នុងការពិគ្រោះយោបល់»។
ក្រសួងសុខាភិបាល បានប្រកាសថា ជំងឺកូវីដ-១៩ អាចឆ្លងទៅមនុស្សគ្រប់គ្នាបានគ្រប់ពេល ប្រសិនបើពួកគេពុំបានការពារ។ ទោះបីជាពួកគេបានចាក់វ៉ាក់សាំង ការពារបានគ្រប់ចំនួនហើយក៏ដោយ ក៏នៅតែអាចឆ្លងបាន ប្រសិនបើពួកគេពុំបានការពារខ្លួនត្រឹមត្រូវ។ អ្នកធ្លាប់កើតជំងឺនេះម្ដងហើយ ក៏អាចកើតទៀតដែរ។ ក្រសួងបានណែនាំដល់ប្រជាពលរដ្ឋគ្រប់រូប គោរពវិធានការ៣ការពារ និង៣កុំ ឱ្យបានខ្ជាប់ខ្លួន ដើម្បីបញ្ចៀសខ្លួនពីការឆ្លងជំងឺកូវីដ-១៩៕
© រក្សាសិទ្ធិដោយ thmeythmey.com