អន្តរជាតិ
អ៊ុយក្រែននិងសហរដ្ឋអាមេរិកធ្វើសមយុទ្ធយោធាក្នុងសមុទ្រខ្មៅ ក្រោយឧបទ្ទវហេតុនាវាចម្បាំងអង់គ្លេស
នាវាពិឃាដ HMS របស់អង់គ្លេស បានមកដល់កំពង់ផែ Batumi នៅប្រទេស Georgia ថ្ងៃសៅរ៍ ទី២៦ ខែមិថុនា ឆ្នាំ២០២១។
×![]()
ដោយ: VOA
ប្រទេសអ៊ុយក្រែន និងសហរដ្ឋអាមេរិកបានធ្វើសមយុទ្ធយោធារួមគ្នាមួយនៅក្នុងសមុទ្រខ្មៅកាលពីថ្ងៃចន្ទម្សិលមិញដើម្បីបង្ហាញកិច្ចសហប្រតិបត្តិការរវាងរដ្ឋាភិបាលក្រុងវ៉ាស៊ីនតោន និងរដ្ឋាភិបាលទីក្រុងកៀវ ខណៈដែលប្រទេសអ៊ុយក្រែនកំពុងប្រឈមជាមួយប្រទេសរុស្សី។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។
សមយុទ្ធយោធានេះកើតមានឡើងតែប៉ុន្មានថ្ងៃប៉ុណ្ណោះ បន្ទាប់ពីនាវាចម្បាំងរបស់កងទ័ពជើងទឹកអង់គ្លេស បានឆ្លងកាត់ជិតតំបន់គ្រីមមៀ(Crimea)ដែលជាតំបន់រណបមួយរបស់រុស្សីក្នុងសមុទ្រខ្មៅនោះ ដោយរដ្ឋាភិបាលទីក្រុងមូស្គូនិយាយថា ខ្លួនបានបាញ់គ្រាប់ព្រមានលើនាវាចម្បាំងអង់គ្លេសនោះឲ្យចាកចេញពីតំបន់នេះ។
សមយុទ្ធយោធាអាមេរិកនិងអ៊ុយក្រែនក្នុងតំបន់សមុទ្រខ្មៅនេះ បានកើតមានឡើងចំនួន២១លើករួចមកហើយ ចាប់តាំងពីឆ្នាំ១៩៩៧មក ដោយនៅពេលនេះមានបុគ្គលិកយោធាចូលរួមប្រមាណ៥.០០០នាក់មកពីប្រទេសចំនួនជាង៣០។
សមយុទ្ធយោធានេះមានរយៈពេល២សប្តាហ៍ និងមាននាវាចម្បាំងចូលរួមប្រមាណ៣០គ្រឿងដែលក្នុងនោះក៏រួមមាននាវា USS Ross ដែលបំពាក់ទៅដោយកាំជ្រួចមីស៊ីលផងដែរ។
មេបញ្ជាការកងទ័ពជើងទឹកអ៊ុយក្រែនលោក Oleksiy Neizhpapaបាននិយាយក្នុងពិធីបើកសមយុទ្ធយោធាក្នុងទីក្រុងកំពង់ផែ Odessa នៃប្រទេសអ៊ុយក្រែនថា សមយុទ្ធនេះនឹងផ្ញើ«សារដ៏មានឥទ្ធិពលមួយក្នុងការថែរក្សាស្ថិរភាព និងសន្តិភាពនៅក្នុងតំបន់របស់យើង»។
ប្រទេសរុស្សីបាននិយាយថា ខ្លួនបានបាញ់គ្រាប់ព្រមានទៅលើនាវាចម្បាំងអង់គ្លេសកាលពីថ្ងៃពុធសប្តាហ៍មុន ដោយសារតែនាវាចម្បាំងនេះបានរំលោភទៅលើអធិបតេយ្យភាពដែនទឹករបស់ខ្លួន។
ដោយឡែកប្រទេសអង់គ្លេសវិញលើកឡើងថា «នាវាចម្បាំងរបស់ខ្លួនបានឆ្លងកាត់តំបន់អធិបតេយ្យ ភាពដែនទឹកប្រទេសអ៊ុយក្រែនដោយស្របទៅតាមច្បាប់អន្តរជាតិ»។
ប្រទេសរុស្សីបានដាក់តំបន់គ្រីមមៀ ដែលធ្លាប់ស្ថិតក្រោមការគ្រប់គ្រងរបស់អ៊ុយក្រែន មកស្ថិតក្រោមការគ្រប់គ្រងរបស់ខ្លួនវិញក្នុងឆ្នាំ២០១៤ ហើយបានអះអាងថា ដែនទឹកជុំវិញតំបន់នោះ ជាផ្នែកមួយនៃអធិបតេយ្យភាពរបស់ខ្លួន។ ប្រទេសជាច្រើនមិនបានទទួលស្គាល់ការគ្រប់គ្រងរបស់រុស្សីនៅក្នុងតំបន់នោះទេ ហើយបានគាំទ្រការទាមទាររបស់អ៊ុយក្រែនលើអធិបតេយ្យភាពដែនទឹកក្នុងតំបន់នោះផងដែរ។
រដ្ឋាភិបាលក្រុងវ៉ាស៊ីនតោនជាសម្ព័ន្ធមិត្តដ៏សំខាន់របស់ប្រទេសអ៊ុយក្រែននៅក្នុងជម្លោះជាមួយប្រ ទេសរុស្សី ជុំវិញបញ្ហាតំបន់គ្រីមមៀ និងតំបន់បំបែកខ្លួនភាគខាងកើតអ៊ុយក្រែន ដែលគាំទ្ររុស្សីនោះ៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com
