ឯកអគ្គរដ្ឋទូតសាធារណរដ្ឋឥណ្ឌូណេស៊ីប្រចាំកម្ពុជា លោក ស៊ូរឌើរមាន់ ហាសាំង (Sudirman Haseng) បានបង្ហាញសុទិដ្ឋិនិយមចំពោះកម្មវិធីជិះកង់នៅពេលនោះថា វានឹងក្លាយជាគំរូដ៏ល្អមួយដើម្បីស្ដារឱ្យមានសកម្មភាពទេសចរណ៍ឡើងវិញនៅតំបន់អង្គរ។ លោកបន្តថា គេមិនត្រូវផ្ដេកផ្តួលជាមួយស្ថានការណ៍ដ៏លំបាកនេះទេ ផ្ទុយទៅវិញ ចាំបាច់ត្រូវធ្វើអ្វីមួយ ដើម្បីឱ្យចរន្តសេដ្ឋកិច្ចងើបឡើងវិញ។ លោកបន្ថែមថា៖« យើងបានរង់ចាំឱកាសនេះជាងមួយឆ្នាំមកហើយ បើបន្តធ្វើឱ្យស្ថានភាពនេះមិនអាចដោះស្រាយបញ្ហាអ្វីនោះទេ ដូច្នេះត្រូវតែស្វែងរកនូវការរួបរួមមួយ ដើម្បីបង្កើតជាកម្មវិធីអ្វីមួយឡើង»។

 

លោកទូតមានប្រសាសន៍ទៀតថា បើទោះបីស្ថានការណ៍នៅពេលនេះហាក់លំបាកបន្ដិចមែន តែលោកជឿជាក់ថា ក្រោយចប់វិបត្តិជំងឺកូវីដ១៩ វិស័យនានារួមនិងវិស័យទេសចរណ៍ដែលជាវិស័យស្នួលនៅខេត្តសៀមរាប នឹងដំណើរការល្អប្រសើរឡើងវិញ ក្នុងនោះប្រជាជននៃប្រទេសកម្ពុជា-ឥណ្ឌូណេស៊ី ក៏បានត្រៀមខ្លួនរួចរាល់សម្រាប់ការធ្វើដំណើរទៅកម្សាន្តទៅវិញទៅមកផងដែរ។

 

ព្រឹត្តិការណ៍ជិះកង់ក្រោមកិច្ចសហប្រតិបត្តិការរវាងស្ថានទូតសាធារណរដ្ឋឥណ្ឌូណេស៊ី ក្រសួងទេសចរណ៍ និងក្រសួងវប្បធម៌ និងវិចិត្រសិល្បៈ មានអ្នកចូលរួមសរុបប្រមាណ៦០នាក់។ ថ្លែងក្នុងពិធីដែលធ្វើនៅព្រឹកព្រលឹមថ្ងៃទី៣០ មិថុនា រដ្ឋលេខាធិការក្រសួងទេសចរណ៍ លោក ប៉ាក់ សុខុម មានប្រសាសន៍ថា ព្រឹត្តិការណ៍បានបង្ហាញពីការផ្លាស់ប្ដូរ ភាពប្រហាក់ប្រហែលគ្នាលើផ្នែកវប្បធម៌ អារ្យធម៌ រវាងប្រទេសទាំងពីរដែលមានជាយូរលុងមកហើយ។ លោកបន្ថែមថា ព្រឹត្តិការណ៍នេះនឹងជំរុញលើកិច្ចសហប្រតិបត្តិការ ចំណងមិត្តភាព ពិសេសលើវិស័យទេសចរណ៍រវាងប្រទេសទាំងពីរ ឱ្យកាន់តែល្អប្រសើរបន្ថែមទៀត៕