លោក Jovenel Moise ត្រូវបានបាញ់សម្លាប់ក្នុងគេហដ្ឋានផ្ទាល់ខ្លួនរបស់លោកនៅថ្ងៃទី៧​ ខែកក្កដាក្នុងរដ្ឋធានីព័រអូប្រាំង។ ភរិយារបស់លោក រងរបួសក្នុងហេតុការណ៍នេះ និងកំពុងសម្រាកព្យាបាលក្នុងមន្ទីរពេទ្យ។ 

 

ក្រោយការបាញ់សម្លាប់ប្រធានាធិបតី ប៉ូលិសហៃទី ក៏បើកប្រតិបត្តិការតាមចាប់ជនសង្ស័យ ដោយបានសម្លាប់មនុស្សបួននាក់ដែលប៉ូលិសអះអាងថា ជាទាហាស៊ីឈ្នួល និងចាប់ខ្លួនបានពីរនាក់ទៀត។ បើតាមទីភ្នាក់ងារព័ត៌មាន AFP ប៉ូលិសហៃទី មិនបញ្ចេញអត្តសញ្ញាណជនសង្ស័យឡើយ ឬក៏ហេតុផលនៅពីក្រោយការធ្វើឃាតនេះដែរ។

 

នាយករដ្ឋមន្ត្រីស្ដីទី Claude Joseph អះអាងថា ជនដៃដល់ ប្រើប្រាស់ភាសាអង់គ្លេស និងអេស្ប៉ាញ។ចំណែកអគ្គរដ្ឋទូតហៃទីប្រចាំវ៉ាស៊ីនតោន លោក Bocchit Edmond លើកឡើងថា ខ្មាន់កាំភ្លើង ជាទាហានស៊ីឈ្នួលដ៏ជំនាញ ហើយបន្លំខ្លួនជាភ្នាក់ងាររបស់ស្ថាប័នបង្រ្កាបគ្រឿងញៀនអាមេរិកទៀតផង។ 

 

ក្រុមប្រឹក្សាសន្តិសុខអង្គការសហប្រជាជាតិ នឹងកោះប្រជុំបន្ទាន់លើបញ្ហាហៃទីនៅយប់ថ្ងៃទី៨ ខែកក្កដា។ នៅហៃទីវិញ លោក Joseph ប្រកាសកាន់កាប់អំណាច និងដាក់ប្រទេសក្នុងភាពអាសន្ន។ ព្រលានយន្តហោះក្នុងរដ្ឋធានី ត្រូវបានបិទ ហើយទីក្រុងទាំងមូលមានសភាពស្ងប់ស្ងាត់។ 

 

សូមបញ្ជាក់ថា លោក Moise ដឹកនាំហៃទីដែលជារដ្ឋក្រីក្រជាងគេនៅទ្វីបអាមេរិក តាំងពីឆ្នាំ២០១៧ មក។ ក្រោយការបោះឆ្នោតសភាត្រូវបានពន្យារពេលតាំងពីឆ្នាំ២០១៨ លោកដឹកនាំហៃទីដោយក្រឹត្យ ដែលការណ៍បង្កការមិនពេញចិត្តខ្លាំងក្នុងចំណោមប្រជាជន។ កន្លងមក ការតវ៉ាក៏កើតមានមិនចេះដាច់ប្រឆាំងការដឹកនាំរបស់លោក Moise ដែលអស់អាណត្តិទៅហើយ៕