ដោយសារប្រតិបត្តិការដកកងទ័ពពីអាហ្វហ្កានីស្ថានមានដំណើរការរលូន អាមេរិក នឹងបញ្ចប់ប្រតិបត្តិការនេះមុនថ្ងៃកំណត់។ ប្រធានាធិបតីអាមេរិក ចូ បៃឌិន ប្រកាសនៅថ្ងៃទី៨ ខែកក្កដា ថា បេសកកម្មកងទ័ពអាមេរិកនៅអាហ្វហ្កានីស្ថាន នឹងបញ្ចប់នៅថ្ងៃទី៣១ ខែសីហា ជិត២០ឆ្នាំក្រោយអាមេរិកឈ្លានពានប្រទេសនេះនៅឆ្នាំ២០០១ ។ លោក បៃឌិន និងអនុប្រធានាធិបតី កាម៉ាឡា ហារីស បានទទួលរបាយការណ៍សន្តិសុខ មុនប្រកាសកាលបរិច្ឆេទនេះ។

 

ពីសេតវិមាន លោក បៃឌិន អះអាងថា យោធាអាមេរិកសម្រេចគោលដៅរបស់ខ្លួនហើយពេលចូលធ្វើប្រតិបត្តិការនៅអាហ្វហ្កានីស្ថានកាលពីជិត២០ឆ្នាំមុន។ នោះគឺការសម្លាប់មេដឹកនាំអាល់កៃដា អូសាម៉ា ប៊ីនឡាឌិន ការធ្វើឱ្យក្រុមអាល់កៃដាចុះខ្សោយ និងការទប់ស្កាត់មិនឱ្យមានការវាយប្រហារភេរវកម្មនៅទឹកដីអាមេរិក។

 

«យើងកំពុងបញ្ចប់សង្រ្គាមវែងជាងគេរបស់អាមេរិក។ ស្ថានភាពបច្ចុប្បន្នមិនមែនជាជម្រើសឡើយ។» លោក បៃឌិន បញ្ជាក់បែបនេះដោយសំដៅការរក្សាកងទ័ពនៅអាហ្វហ្កានីស្ថាន មុនបន្តថា លោកនឹងមិនបញ្ជូនកងទ័ពអាមេរិកជំនាន់ថ្មីទៅអាហ្វហ្កានីស្ថានឡើយ។ 

 

ប្រធានាធិបតីអាមេរិករូបនេះ ក៏សង្កត់ធ្ងន់ដែរថា អាមេរិកទៅអាហ្វហ្កានីស្ថាន មិនមែនដើម្បីទៅជួយកសាងប្រទេសនេះឡើយ។​ ត្រង់នេះ លោក បៃឌិន និយាយច្បាស់ៗថា វាជាសិទ្ធិ និងការទទួលខុសត្រូវរបស់ប្រជាជនអាហ្វហ្កានីស្ថានតែមួយគត់ក្នុងការសម្រេចអនាគតរបស់ខ្លួន។ ប៉ុន្តែលោកក៏សន្យាបន្តជួយគាំទ្ររដ្ឋាភិបាលអាហ្វហ្កានីស្ថាន និងកម្លាំងទ័ពប្រទេសនេះ ក៏ដូចជាផ្ដល់ជម្រកសម្រាប់អ្នកបកប្រែអាហ្វហ្កានីស្ថានដែលជួយអាមេរិកកន្លងមក។

 

ខណៈអាមេរិកកំពុងដកទ័ព​ កម្លាំងក្រុមតាលីបង់ ក៏អាចដណ្ដើមយកស្រុកជាបន្តបន្ទាប់ពីកម្លាំងអាហ្វហ្កានីស្ថាន។ គេបារម្ភថា ពេលអាមេរិកចេញផុត ក្រុមនេះនឹងអាចយកឈ្នះកម្លាំងរដ្ឋាភិបាល ហើយឡើងគ្រប់គ្រងអាហ្វហ្កានីស្ថានដូចមុនឆ្នាំ២០០១ មិនខាន។ យ៉ាងណាក្ដី លោក បៃឌិន ជឿជាក់លើកម្លាំងទ័ពអាហ្វហ្កានីស្ថានក្នុងការតស៊ូប្រឆាំងក្រុមតាលីបង់៕