មន្រ្តីនៃរដ្ឋបាលស្រុកបន្ទាយស្រី លោក ហេង ពិសិដ្ឋ បានឱ្យដឹងថា បន្ទាប់ពីដាំផ្កាកូស្មូ២លើកមក រដ្ឋបាលស្រុកបានដូរមកដាំស្រូវនៅរង្វង់មូលម្ដង ដើម្បីទាក់ទាញទេសចរ និងពេលបានផលសម្រាប់ចែកពលរដ្ឋក្រីក្រ។ ជំនួយការអភិបាលស្រុករូបនេះបញ្ជាក់ថា ផ្ទៃដីដែលរៀបចំដាំស្រូវនេះប្រហែលជាង ១ហិកតា ដែលចាប់ផ្តើមដាំឬច្រឹង (ដាំបែបបុរាណ) នៅអំឡុងដើមខែ មិថុនា។ ដោយសារដាំប្រភេទស្រូវធ្ងន់ ដូច្នេះត្រូវបានប្រើ៦ខែដើម្បីទទួល ដែលអាចបានផលអំឡុងខែ មករា ឆ្នាំក្រោយ។ 

 

លោក ហេង ពិសិដ្ឋ បានបន្ថែមថា៖« ហេតុផលដែលយើងប្តូរពីផ្កាមកជាស្រូវ គឺដើម្បីបានផលយកទុកចែកប្រជាពលរដ្ឋក្រីក្រក្នុងមូលដ្ឋាន ព្រោះជុំមុនៗយើងដាំជាផ្កា ពេលដែលខូចទៅ គឺអត់ទទួលបានផលអីទេ តែរដូវកាលនេះគឺជារដូវកាលធ្វើស្រែផង ឆ្លៀតឱកាសនេះយើងដាំលម្អទៅតាមរដូវ និងដើម្បីផលប្រយោជន៍ទុកចែកប្រជាពលរដ្ឋផង»។

 

គួររំលឹកថា រដ្ឋបាលស្រុកបន្ទាយស្រី ក្រោមអាណត្តិលោក ឃឹម ហ្វីណង់ បានចាប់ផ្តើមរៀបចំកែលម្អរង្វង់មូលបន្ទាយស្រីនេះ នៅខែធ្នូ ឆ្នាំ២០២០ ដោយមានរៀបចំជាផ្លូវទម្រង់ផ្កាឈូក។ អំឡុងពេលដាំស្រូវនេះ មានការបន្ថែមផ្លូវឥដ្ឋក្រហម ដើម្បីងាយស្រួលដើរ  ហាត់ប្រាណ និងទាក់ទាញភ្ញៀវដើរបន្ថែម៕

  រូបថត៖ ហ្វេសប៊ុករដ្ឋបាលស្រុកបន្ទាយស្រី