លោក ផៃ ស៊ីផាន បានបញ្ជាក់ថា រដ្ឋាភិបាលបានសម្រេចលុបការឈប់នៅថ្ងៃបន្ទាប់ សម្រាប់ថ្ងៃឈប់សម្រាកបុណ្យជាតិ ឬបុណ្យអន្តរជាតិ ដែលប្រព្រឹត្តិឡើងចំថ្ងៃអាទិត្យ ដើម្បីសម្រួលដល់ការរកស៊ីរបស់វិនិយោគិននៅកម្ពុជា ។  

 

អ្នកនាំពាក្យរដ្ឋាភិបាលរូបនេះ បានបញ្ជាក់ប្រាប់សារព័ត៌មានThmeyThmeyតាមទូរសព្ទ នារសៀលថ្ងៃទី៩កក្កដាដូច្នេះ៖«តាមរយៈការធ្វើវិសោដនកម្មនេះ រដ្ឋាភិបាលសម្រេចលុបថ្ងៃឈប់សម្រាកសងនៃពិធីបុណ្យជាតិនិងអន្តរជាតិ ដល់កម្មករ និយោជិត រួមទាំងបុគ្គលិកនានានៅក្នុងវិស័យឯកជន»។ 

 

លោក ផៃ ស៊ីផាន បន្ថែមថា ការសម្រេចលុបថ្ងៃឈប់សម្រាកសងនេះ គឺដើម្បីឆ្លើយតបទៅនឹងការវិវឌ្ឍផ្នែកសង្គម-សេដ្ឋកិច្ចកម្ពុជា សំដៅលើកកម្ពស់ផលិតភាពការងារ និងពង្រឹងភាពប្រកួតប្រជែងសេដ្ឋកិច្ចកម្ពុជាទាំងក្នុងតំបន់និងសកលលោក។

 

កន្លងមករដ្ឋាភិបាល ក៏សម្រេចមិនឱ្យមន្ត្រីរាជការ ឈប់សម្រាកសងថ្ងៃបុណ្យ ចំថ្ងៃអាទិត្យនេះដែរ៕