លោក ចាប ឌីណា នាយករដ្ឋបាលសាលាខណ្ឌដូនពេញ បានបញ្ជាក់ថា អាជ្ញាធរបានបញ្ជូនជនអនាថា ចំនួន៥៣នាក់ទៅធ្វើចត្តាឡីស័ក នៅវិទ្យាល័យប៊ុនរ៉ានីហ៊ុនសែនវត្តភ្នំ។ ចំណែកអ្នកវិជ្ជមានកូវីដ-១៩ គឺអាជ្ញាធរបានបញ្ជូនទៅសម្រាកព្យាបាល នៅមណ្ឌលព្យាបាលជំងឺកូវីដ-១៩ ក្នុងរាជធានីភ្នំពេញ។ 

 

បើតាមលោក ចាប ឌីណា ក្រោយជនអនាថាទាំងនោះចេញពីមណ្ឌលចត្តាឡីស័ក និងព្យាបាលជាសះស្បើយរួចហើយ អាជ្ញាធរនឹងបញ្ជូនពួកគេទៅមន្ទីរសង្គមកិច្ច អតីតយុទ្ធជន និងយុវនីតិសម្បទារាជធានីភ្នំពេញ។ 

 

លោកនាយករដ្ឋបាលសាលាខណ្ឌដូនពេញ បានលើកឡើងថា ការប្រមូលសំណាកជនអនាថាដែលរស់នៅតាមរបងផ្ទះ របងវត្ត និងតាមចិញ្ចើមថ្នល់ នៅក្នុងក្របខណ្ឌដូនពេញនេះ គឺដើម្បីឲ្យពួកគេមានសុវត្ថិភាព និងរក្សាសណ្តាប់ធ្នាប់សាធារណៈ។

 

«ពួកគាត់ដើរពាសវាសពាសកាល ធ្វើឲ្យប៉ះពាល់ដល់ភ្ញៀវទេសចរជាតិ និងអន្តរជាតិ។ យើងក៏គិតគូរដល់សុវត្ថិភាពសុខភាពរបស់ពួកគាត់។ យើងប្រមូលសំណាកពួកគាត់ដើម្បីធានាសុវត្ថិភាពដល់ពួកគាត់។ បើពួកគាត់គ្មានកូវីដទេ យើងនឹងបញ្ជូនពួកគាត់ទៅមន្ទីរសង្គមកិច្ចដើម្បីបណ្តុះបណ្តាលពួកគាត់»។ នេះជាការលើកឡើងរបស់លោក ចាប ឌីណា។

 

 

មកទល់ពេលនេះ កម្ពុជាមានអ្នកឆ្លងកូវីដ-១៩ សរុប៦១,៨៧០ នាក់ ក្នុងនោះ ៤,៨៧៣នាក់ករណីនាំចូល។ អ្នកជាសះស្បើយមាន៥៣,៤៧៧ និងស្លាប់សរុប៩២៥នាក់៕