ឧត្តមសេនីយ៍ផ្កាយបួន Austin Miller ក្លាយជាមេទ័ពអាមេរិកចុងក្រោយដែលឈរជើងនៅអាហ្វហ្កានីស្ថានក្នុងសង្រ្គាម២០ឆ្នាំ ដែលចាប់ផ្ដើមនៅឆ្នាំ២០០១ មក។ ក្នុងពិធីនៅទីក្រុងកាប៊ុលនៅថ្ងៃទី១២ ខែកក្កដា លោក Miller ដែលកាន់តំណែងនៅឆ្នាំ២០១៨ បានលាលែងពីតំណែងមេបញ្ជាការកងទ័ពអាមេរិកប្រចាំអាហ្វហ្កានីស្ថាន។

 

 

 

តាមពិតទៅ តាំងពីខែឧសភាមក លោក Miller ត្រូវបានប្រធានាធិបតី ចូ បៃឌិន ចាត់តាំងឱ្យដឹកនាំកិច្ចការដកទ័ពពីអាហ្វហ្កានីស្ថានឱ្យអស់នៅថ្ងៃទី១១ ខែកញ្ញា។ ជាងពីរខែមកនេះ ទ័ពអាមេរិកសឹងទាំងអស់ ត្រូវបានដកចេញ ព្រមគ្នានិងកម្លាំងសម្ព័ន្ធមិត្តណាតូផងដែរ ដែលផែនការដកទ័ពត្រូវពន្លឿនមកត្រឹមថ្ងៃទី៣១ ខែសីហា។ អាមេរិកនឹងរក្សាទុកកងទ័ពមួយចំនួនដើម្បីការពារស្ថានទូតអាមេរិកដ៏ធំក្នុងទីក្រុងកាប៊ុល។  

 

ចាប់ពីពេលនេះដល់ថ្ងៃដកទ័ព ឧត្តមសេនីយ៍ Kenneth McKenzie មេបញ្ជាការយោធាអាមេរិកតំបន់កណ្ដាលដែលទទួលបន្ទុកប្រតិបត្តិការយោធានៅមជ្ឈិមបូព៌ា នឹងកាន់ការងារទ័ព ក៏ដូចជាប្រតិបត្តិការដែនអាកាសណាមួយនៅអាហ្វហ្កានីស្ថាន។ ថ្លែងក្នុងពិធីដែលរៀបចំនៅបរិវេណតំបន់បៃតងក្នុងរដ្ឋធានីកាប៊ុល លោក McKenzie ប្រាប់មេដឹកនាំអាហ្វហ្កានីស្ថានថា អាហ្វហ្កានីស្ថានអាចពឹងពាក់អាមេរិកក្នុងកាលៈទេសៈលំបាកនៅថ្ងៃខាងមុខ។

 

ការដកទ័ពរបស់អាមេរិក រងការរិះគន់ខ្លាំង ព្រោះក្រុមតាលីបង់នៅតែមានឥទ្ធិពល ហើយកំពុងពង្រីកតំបន់គ្រប់គ្រងរបស់ខ្លួនបន្តបន្ទាប់។ ក្រុមនេះអះអាងថា បានត្រួតត្រាទឹកដីអាហ្វហ្កានីស្ថានប្រមាណ៨០ភាគរយ ប៉ុន្តែរដ្ឋាភិបាលក្រុងកាប៊ុលឆ្លើយតបថា ក្រុមជ្រុលនិយមមួយនេះពន្លើសតួលេខ។