ចំពោះករណីនេះ លោក Mark Bullingham នាយកប្រតិបត្តិសហព័ន្ធកីឡាបាល់ទាត់អង់គ្លេស (FA) បានសុំអភ័យទោសចំពោះអ្នកគាំទ្រស្របច្បាប់ តែនឹងដាក់ពិន័យអ្នកបង្កបញ្ហាមិនឱ្យរួចខ្លួនឡើយ។
 

ដោយសារភាពរញ៉េរញ៉ៃអំឡុងពេលការប្រកួតជើងឯកអឺរ៉ុបរបស់អ្នកគាំទ្រអង់គ្លេស FA ត្រូវរងការចោទប្រកាន់ចំនួន៤ករណី ដែលទាក់ទងនឹងការរំខានអំឡុងពេលគោរភ្លេងជាតិ បាញ់ពន្លឺឡាស៊ែរលើមុខអ្នកចាំទីដាណឺម៉ាក Kasper Schmeichel ដុតកាំជ្រួច និងការលុកលុយរបស់អ្នកគាំទ្រក្នុងកីឡដ្ឋាន។
 

បន្ថែមពីលើនេះ UEFA អះអាងថា ក្រុមការងារសីលធម៌ និងវិន័យត្រូវបានចាត់តាំងឱ្យស៊ើបអង្កេតវិន័យលើព្រឹត្តិការណ៍នានាដែលពាក់ព័ន្ធនឹងអ្នកគាំទ្រដែលបានកើតឡើងនៅខាងក្នុងនិងជុំវិញកីឡដ្ឋាន Wembley។
 

ដោយឡែក FA ក៏នឹងដាក់ពិន័យអ្នកគាំទ្រដែលស្រវឹងជាច្រើននាក់ ហើយព្យាយាមសម្រុកចូល Wembley ដោយគ្មានសំបុត្រ។ ស្ថាប័នគ្រប់គ្រងកីឡាបាល់ទាត់អង់គ្លេស នឹងធ្វើការជាមួយប៉ូលីសដើម្បីហាមឃាត់អ្នកទាំងនោះនៅព្រឹត្តិការណ៍ក្រោយៗ។
 

Downing Street បានធ្វើការរិះគន់ចំពោះអ្នកដែលសម្រុកចូលកីឡដ្ឋានដោយគ្មានសំបុត្រ។

អ្នកនាំពាក្យផ្លូវការរបស់លោកនាយករដ្ឋមន្រ្តីបានមានប្រសាសន៍ថា“ ឈុតឆាកទាំងនោះមិនអាចទទួលយកបានទេហើយយើងថ្កោលទោសចំពោះអំពើហឹង្សាឥរិយាបទប្រឆាំងនឹងសង្គមនិងការរំលោភបំពានក្នុងន័យដែលអាចធ្វើទៅបាន” ។
 

FA ត្រូវបាន UEFA ពិន័យចំនួន៣ម៉ឺនអឺរ៉ូ (ជាង៣៥០០០ដុល្លារ) រួចមកហើយទាក់ទងនឹងទង្វើមិនគប្បីចំនួន៣ចំណុចដែលក្រុមអ្នកគាំទ្របង្ករឡើងនាជំនួបវគ្គពាក់កណ្តាលផ្តាច់ព្រ័ត្រ Euro 2020 ជាមួយដាណឺម៉ាក៕