ក្នុងសេចក្ដីប្រកាសថ្ងៃទី១៦ ខែកក្កដា ក្រសួងអេកូឡូស៊ី និងបរិស្ថាន ទីផ្សារជួញដូរកាបូនជាតិដែលធ្វើតាមអនឡាញចាប់ផ្ដើមហើយ ដែលជាការបោះជំហានសំខាន់ក្នុងការកាត់បន្ថយការបញ្ចេញកាបូន និងសម្រេចគោលដៅអព្យាក្រឹត្យកាបូន។

 

គំនិតជួញដូរកាបូននេះ លេចឡើងតាំងពីមួយទសវត្សរ៍មុនមក។ ប៉ុន្តែដោយសារមានការបញ្ចុះបញ្ចូលពីក្រុមហ៊ុនថាមពលធ្យូងថ្ម និងគោលនយោបាយជាតិដែលផ្ដោតលើការអភិវឌ្ឍជាងបរិស្ថាន ទើបគម្រោងនេះត្រូវបានពន្យារពេលរហូតមកពេលនេះ។ ប្រព័ន្ធជួញដូរដែលទើបដំណើរនេះ នឹងកំណត់កម្រិតបញ្ចេញឧស្ម័នពុលសម្រាប់ក្រុមហ៊ុនថាមពលធំៗ និងអនុញ្ញាតឱ្យក្រុមហ៊ុននានា ទិញយកសិទ្ធិបំពុលបរិយាកាសពីក្រុមហ៊ុនផ្សេងទៀតដែលបញ្ចេញកាបូនក្នុងកម្រិតទាបជាងការកំណត់។

 

ជាជំហានដំបូង ការជួញដូរ នឹងគ្រប់ដណ្ដប់លើក្រុមហ៊ុនថាមពលប្រមាណ២២០០ក្រុមហ៊ុន ដែលបញ្ចេញកាបូន១ភាគ៧នៃការបញ្ចេញកាបូនទូទាំងពិភពលោកពីថាមពលផូស៊ីល។ ក្រុមហ៊ុនទាំងនេះ ក៏ផលិតឧស្ម័នកាបូន៣០ភាគរយនៃឧស្ម័នដែលចិនបញ្ចេញនៅឆ្នាំ២០១៩ ផងដែរ។

 

បើតាមក្រុមហ៊ុន Citigroup នៅឆ្នាំ២០២១ ការទិញសិទ្ធិបញ្ចេញឧស្ម័ននេះនឹងមានតម្លៃ៨០០លានដុល្លារ ហើយហក់ឡើងដល់២៥ពាន់ដុល្លារនៅចុងទសវត្សរ៍នេះ។ ជាមួយទំហំនេះ ប្រព័ន្ធជួញដូររបស់ចិនមានទំហំស្មើមួយភាគបីនៃប្រព័ន្ធជួញដូរនៅអឺរ៉ុប។ យ៉ាងណាមិញ នៅថ្ងៃជួញដូរដំបូងនៅទីផ្សារក្រុងសៀងហៃ កាបូនមួយតោនមានតម្លៃ៨ដុល្លារក្នុងមួយតោន ទាបជាងនៅអឺរ៉ុបដែលកាបូនមួយតោនមានតម្លៃជាមធ្យម៤៩,៤០ដុល្លារឯណោះ។  

 

កាលពីសប្ដាហ៍មុន លោក Zhang Xiliang ដែលជាប្រធានរៀបចំប្រព័ន្ធជួញដូរ និយាយថា នៅជំហានបន្ទាប់ ការជួញដូរនឹងបញ្ចូលក្រុមហ៊ុនផ្សេងទៀតក្រុមហ៊ុនផលិតស៊ីម៉ង់ត៍ និងអាលុយមីញ៉ូមជាដើម៕