បាតុកម្មប្រឆាំងរដ្ឋាភិបាលថៃដែលរៀបចំដោយសកម្មជនវ័យក្មេងគាំទ្រប្រជាធិបតេយ្យ គ្រោងដង្ហែរក្បួនពីវិមានប្រជាធិបតេយ្យទៅកាន់វិមានរដ្ឋាភិបាលក្នុងរាជធានីបាងកក។ បាតុកម្មនេះនៅតែធ្វើឡើង បើទោះរដ្ឋាភិបាលថៃនៅថ្ងៃទី១៦ ខែកក្កដា ប្រកាសហាមឃាត់ការជួបជុំទូទាំងប្រទេសក្ដី។ នៅទីក្រុងបាងកក និងខេត្តជុំវិញ ការជួបជុំលើស៥នាក់ មិនត្រូវបានអនុញ្ញាតឡើយ ខណៈនៅខេត្តផ្សេងទៀត ការជួបជុំដែលអាចនាំដល់ការចម្លងវីរុស ឬបង្កបញ្ហាដល់សង្គម ក៏ត្រូវហាមឃាត់ដែរ។

 

ដើម្បីទប់ស្កាត់ការដង្ហែរក្បួន ក្រុងបាងកកបានត្រៀមប៉ូលិសដើម្បីពង្រាយតាមផ្លូវនានាក្នុងគម្រោងបាតុកម្ម។ ស្នងការរងប៉ូលិសក្រុងបាងកក លោក Piya Tawichai និយាយថា ការិយាល័យប៉ូលិសក្រុង នឹងពង្រាយប៉ូលុស២២៥០នាក់ដើម្បីរក្សាសន្តិភាព និងសណ្ដាប់ធ្នាប់អំឡុងការតវ៉ា និងនៅតាមកន្លែងសំខាន់ដែលជាគោលដៅរបស់ក្រុមបាតុករ។ នេះបើតាមកាសែតបាងកកប៉ុស្តិ៍។

 

ក្នុងការប្រកាសលើហ្វេសប៊ុកនៅថ្ងៃទី១៧ ខែកក្កដា ក្រុមយុវជនសេរីដែលរៀបចំបាតុកម្មប្រឆាំងរដ្ឋាភិបាលលោក ប្រាយុទ្ធ ចន្ទអូចា ជាច្រើនលើកមកហើយនោះ នឹងប្រមូលផ្ដុំអ្នកគាំទ្រខ្លួននៅពេលរសៀលថ្ងៃទី១៨ ខែកក្កដា ដើម្បីតវ៉ាបញ្ហាអសមត្ថភាពរបស់រដ្ឋាភិបាលក្នុងការទប់ស្កាត់ការរាលដាលជំងឺកូវីដ-១៩ ។ 

 

នៅថ្ងៃទី១៨ ខែកក្កដានេះ ថៃ បានបំបែកករណីឆ្លងប្រចាំថ្ងៃ ដោយមានដល់ទៅ១១៣៩៧នាក់ និងស្លាប់១០១នាក់។ ករណីឆ្លងសរុបឡើងដល់៣៧៤៥២៣នាក់។ ដោយសារការឆ្លងនៅមានតួលេខខ្ពស់ ថៃក៏ប្រកាសហាមឃាត់ការជួបជុំទ្រង់ទ្រាយដើម្បីទប់ស្កាត់ការរាលដាល។

 

លើសពីនោះ មជ្ឈមណ្ឌលគ្រប់គ្រងស្ថានការណ៍កូវីដ-១៩ ក៏ពិចារណាដាក់វិធានការកាន់តែតឹងរ៉ឹងទៀតដូចជាបិទអាជីវកម្មស្ទើរទាំងស្រុងនៅទីក្រុងបាងកក និងខេត្តជុំវិញផងដែរ៕