ខេត្តកោះកុង បន្តរកឃើញអ្នកឆ្លងកូវីដ-១៩ ចំនួន៧០នាក់បន្ថែមទៀត កាលពីថ្ងៃទី២១ ខែកក្កដា ខណៈខេត្តត្បូងឃ្មុំ មាន៥៦នាក់ដែរ និងមានស្លាប់១ករណី។ ខេត្តកំពង់ចាម ក៏មានអ្នកជំងឺម្នាក់បានស្លាប់ដែរ ហើយអ្នកឆ្លងថ្មីមាន ៤៣នាក់។ ខេត្តកំពង់ឆ្នាំង ក៏រកឃើញអ្នកឆ្លង៤៦នាក់ទៀតដែរ ខណៈខេត្តក្រចេះ ព្រះវិហារ និងស្ទឹងត្រែង មានសរុប១៦ករណីថ្មី។
កោះកុង៖ រកឃើញ៧០នាក់ និងជាសះស្បើយ៦២នាក់
ពលរដ្ឋចំនួន៧០នាក់ទៀត មានវិជ្ជមានកូវីដ-១៩ ខណៈអ្នកជំងឺចំនួន៦២នាក់ បានជាសះស្បើយ។ ក្នុងចំណោមអ្នកដែលទើបរកឃើញ មាន២៨នាក់ជាពលរដ្ឋរស់នៅសង្កាត់ស្មាច់មានជ័យ សង្កាត់ដងទង់ និងសង្កាត់ស្ទឹងវែង ក្រុងខេមរភូមិន្ទ។ ២៤នាក់ជាពលរដ្ឋឃុំប៉ាក់ខ្លង និងឃុំពាមក្រសោប ស្រុកមណ្ឌលសីមា។ ១៣នាក់ជាពលរដ្ឋនៅឃុំកោះស្តេច ស្រុកគិរីសាគរ។ ៣នាក់នៅឃុំអណ្តូងទឹក និងឃុំថ្មស ស្រុកបូទុមសាគរ, ១នាក់ទៀត ជាពលរដ្ឋឃុំស្រែអំបិល ស្រុកស្រែអំបិល ខេត្តកោះកុង និង១នាក់ទៀត មានអាសយដ្ឋាននៅឃុំស្តេចគង់ ខាងត្បូង ស្រុកបន្ទាយមាស ខេត្តកំពត។
ត្បូងឃ្មុំ៖ មាន៥៦នាក់ ជា២៧នាក់ និង១នាក់ស្លាប់
មនុស្សចមនួន ៥៦នាក់បានឆ្លងកូវីដ-១៩ និង២៧នាក់បានជាសះស្បើយ ខណៈ១នាក់ទៀតបានស្លាប់។ ក្នុងចំណោមអ្នកវិជ្ជមានថ្មីនេះ មានពលរដ្ឋដែលរស់នៅក្រុងសួង, ស្រុកក្រូចឆ្មារ, ស្រុកត្បូងឃ្មុំ, ស្រុកមេមត់,ស្រុកអូររាំងឪ, ស្រុកតំបែរ និងស្រុកពញាក្រែក។
កំពង់ឆ្នាំង៖ មាន៤៦នាក់ទៀត និង៤០នាក់ជាសះស្បើយ
រដ្ឋបាលខេត្តកំពង់ឆ្នាំង បន្តរកឃើញពលរដ្ឋចំនួន ៤៦នាក់ទៀត បានឆ្លងកូវីដ-១៩ ខណៈដែលអ្នកជំងឺចំនួន ៤០នាក់បន្ថែមបានជាសះស្បើយ។ អ្នកវិជ្ជមានដែលទើបរកឃើញនោះ មាន១៣នាក់ជាអ្នករស់នៅក្រុងកំពង់ឆ្នាំង, ៧នាក់នៅស្រុកជលគិរី, ១៧នាក់នៅស្រុកទឹកផុស, ៨នាក់នៅស្រុកកំពង់លែង និង១នាក់ទៀតនៅស្រុកកំពង់លែង។
កំពង់ចាម៖ មាន៤៣នាក់ទៀត ជា៤៤នាក់ និងស្លាប់១នាក់
មនុស្សចំនួន ៤៣នាក់ទៀត មានវិជ្ជមានកូវីដ-១៩ ខណៈអ្នកជំងឺចំនួនចំនួន៤៤នាក់បានជាសះស្បើយ និង១នាក់បានស្លាប់។ ក្នុងចំណោមអ្នកវិជ្ជមានដែលទើបរកឃើញ មានពលរដ្ឋនៅក្រុងកំពង់ចាម, ស្រុកជើងព្រៃ, ស្រុកកំពង់សៀម, ស្រុកបាធាយ, ស្រុកកងមាស, ស្រុកព្រៃឈរ, ស្រុកចំការលើ, ស្រុកស្រីសន្ធរ, ស្រុកស្ទឹងត្រង់ និងអ្នកស្រុកកោះសូទិន។ អ្នកវិជ្ជមាន៥នាក់ទៀត ជាអ្នកមកពីខេត្តត្បូងឃ្មុំ។
ចំពោះករណីស្លាប់ គឺជាស្ត្រីវ័យ ៦០ឆ្នាំ រស់នៅភូមិសំពងជ័យ ឃុំសំពងជ័យ ស្រុកព្រៃឈរ ខេត្តកំពង់់់់ចាម។ បច្ចុប្បន្ន អ្នកជំងឺដែលបានជាសះស្បើយសរុបមានចំនួន ២៥១៦នាក់ ខណៈអ្នកជាសរុបមានចំនួន៧៩៩នាក់។
ព្រះវិហារ៖ ឆ្លងថ្មី៩នាក់ទៀត និងជាសះស្បើយ៩នាក់
ខេត្តព្រះវិហារមានអ្នកឆ្លងកូវីដ-១៩ ចំនួន៩នាក់បន្ថែមក្នុងនោះមាន៤នាក់ជាទារក និងកុមារ ខណៈអ្នកជំងឺ៩នាក់ បានជាសះស្បើយ។ ក្នុងចំណោមអ្នកដែលមានវិជ្ជមានកូវីដ-១៩ទាំងនោះ មាន៨នាក់ជាពលរដ្ឋរស់នៅសង្កាត់កំពង់ប្រណាក និងសង្កាត់ប៉ាលហាល ក្រុងព្រះវិហារ។ អ្នកឆ្លងម្នាក់ទៀត រស់នៅភូមិត្រពាំងធំ ឃុំទឹកក្រហម ស្រុកជាំក្សាន្ត ខេត្តព្រះវិហារ។
មកទល់បច្ចុប្បន្ន ខេត្តព្រះវិហារ មានអ្នកកើតកូវីដ-១៩ ចំនួន៣៩២នាក់ ក្នុងនោះ ១៩៤នាក់បានសះស្បើយចំនួន១៩៤នាក់, ១នាក់ស្លាប់ និងអ្នកជំងឺ១៩៧នាក់ទៀតកំពុងសម្រាកព្យាបាល។
ក្រចេះ៖ ឆ្លងថ្មី៦នាក់ និង៨នាក់បានជាស្បើយ
អ្នកជំងឺចំនួន៨នាក់បន្ថែមបានជាសះស្បើយ ខណៈអ្នកឆ្លងថ្មីមាន៦នាក់ ដោយក្នុងនោះមាន២នាក់ជាកុមារ។ ក្នុងចំណោមអ្នកវិជ្ជមានថ្មីនេះ មាន៤នាក់ជាពលរដ្ឋរស់នៅសង្កាត់ក្រចេះ និងសង្កាត់អូរឫស្សី ក្រុងក្រចេះ ខេត្តក្រចេះ។ អ្នកឆ្លង២នាក់ទៀត រស់នៅភូមិក្បាលស្នួល ឃុំស្នួល ស្រុកស្នួល ខេត្តក្រចេះ។ គិតត្រឹមថ្ងៃទី២១ កក្កដា ខេត្តក្រចេះ មានអ្នកវិជ្ជមានកូវីដ-១៩ សរុប២៤៦នាក់ ក្នុងនោះ១៤៦នាក់ បានជាសះស្បើយ ស្លាប់៥នាក់ និងអ្នកដែលកំពុងសម្រាកព្យាបាលមានចំនួន ៩៥នាក់។
ស្ទឹងត្រែង៖ មាន១ករណីជាបុរសវ័យ ២៧ឆ្នាំ
អ្នកវិជ្ជមានម្នាក់នៅខេត្តស្ទឹងត្រែងនេះ ជាបុរសវ័យ ២៧ឆ្នាំ រស់នៅភូមិខាំផាន់ សង្កាត់សាមគ្គី ក្រុងស្ទឹងត្រែង។ គិតត្រឹមថ្ងៃទី២១ ខែកក្កដា ខេត្តស្ទឹងត្រែង រកឃើញអ្នកឆ្លងកូវីដ-១៩ ចំនួន ៤៥៩នាក់ ក្នុងនោះ៣៣៩នាក់បានជាសះស្បើយ,១នាក់ស្លាប់ និង១១៩នាក់ទៀតកំពុងបន្តការព្យាបាល។
បន្ទាយមានជ័យ៖ មាន៧៧នាក់ទៀត និងជា១៥៧នាក់
រដ្ឋបាលខេត្តបន្ទាយមានជ័យ ប្រកាសរកឃើញអ្នកឆ្លងថ្មីមាន៧៧នាក់បន្ថែម កាលពីថ្ងៃទី២១ ខែកក្កដា ខណៈអ្នកជាសះស្បើយ មានចំនួន១៥៧នាក់។ នៅថ្ងៃទី២២ ខែកក្កដានេះ ក៏មានអ្នកសះស្បើយ ១៤៦នាក់បន្ថែមទៀតដែរ។ នេះបើតាមសេចក្តីប្រកាសព័ត៌មានរបស់រដ្ឋបាលខេត្ត នៅថ្ងៃទី២២ ខែកក្កដានេះ។
ក្នុងចំណោមអ្នកឆ្លងថ្មីទាំង ៧៧នាក់នោះ មាន១២នាក់ជាកុមារ។ អ្នកដែលឆ្លងទាំងនោះភាគច្រើនមានអាសយដ្ឋាននៅក្រុងប៉ោយប៉ែត និងក្រុងសិរីសោភ័ណ ខេត្តបន្ទាយមានជ័យ។ ក្រៅពីនេះមានអ្នកស្រុកភ្នំស្រុក, អូរជ្រៅ និងស្រុកមង្គលបូរី។
ស្វាយរៀង៖ ករណីថ្មី ៧៩នាក់ ជា៦៨នាក់ និងស្លាប់២នាក់
មនុស្សចំនួន ៧៩នាក់ទៀត បានឆ្លងកូវីដ-១៩ ខណៈអ្នកជាសះស្បើយមានចំនួន ៦៨នាក់បន្ថែម។ អ្នកជំងឺ២នាក់ ក៏បានស្លាប់ដោយសារតែកូវីដ-១៩ដែរ។ ក្នុងចំណោមអ្នកដែលទើបរកឃើញទាំងនោះមានពលរដ្ឋដែលរស់នៅក្រុងស្វាយរៀង, ក្រុងបាវិត, ស្រុករមាសហែក, ស្រុកកំពង់រោទិ៍, ស្រុកស្វាយទាប, ស្រុកស្វាយជ្រំ, ស្រុកចន្ទ្រា និងស្រុករមាសហែក។ ចំពោះករណីស្លាប់ គឺជាស្ត្រីវ័យ ៦០ឆ្នាំ រស់នៅភូមិពោធិ៍តាហោ សង្កាត់ពោធិ៍តាហោ ក្រុងស្វាយរៀង។ ម្នាក់ទៀតជាស្ត្រីវ័យ ៦៩ឆ្នាំ រស់នៅភូមិចេក ឃុំសំរោង ស្រុកចន្ទ្រា ខេត្តស្វាយរៀង។ គិតត្រឹមថ្ងៃទី២២ កក្កដា ខេត្តស្វាយរៀងមានអ្នកវិជ្ជមានកូវីដ-១៩ សរុប ៤២១៨នាក់ ក្នុងនោះ៣៤៣៣នាក់បានជាសះស្បើយ ស្លាប់៦៧នាក់ និងអ្នកជំងឺកំពុងសម្រាកព្យាបាលមានចំនួន៧០៦នាក់។