«ក្នុងចំណោមរូបថតជាច្រើន Reuters បានជ្រើសរើសយករូបមួយនេះ ដែលត្រឹមតែបង្ហាញឲ្យឃើញថា ពួកគេពិតជាអាក្រក់។ សូមកុំយកនយោបាយ និងមនោគមន៍វិជ្ជាទៅឡូកឡំជាមួយកីឡា ហើយហៅ ខ្លួនឯងថា ជាស្ថាប័នព័ត៌មានឯករាជ្យ។ ពិតជាគួរឲ្យខ្មាស់អៀនណាស់។ សូមគោរពស្មារតី កីឡាអូឡាំពិក»។ 

 

សំណេរនៅលើ Twitter កាលពីថ្ងៃទី២៤ ខែកក្កដា កន្លងមកនេះ គឺស្ថានទូតចិនប្រចាំស្រីលង្កា សំដៅលើការដាក់រូបកីឡាការិនី Zhihui Hou ដែលបានឈ្នះមេដាយមាសកីឡាលើកទម្ងន់៤៩គីឡូក្រាម ដោយរូបថតដែល Reuters បង្ហាញពីទឹកមុខដ៏អាក្រក់របស់ម្ចាស់មេដាយមាស។

 

ក្រោយមក ស្ថានទូត បានយករូបកីឡាករ Hou ភ្ជាប់ជាមួយជ័យលាភីផ្សេងទៀតដែលមានទឹកមុខ ខុសគ្នា ដោយបានសរសេរថា «ថ្ងៃដូចគ្នា អូឡាំពិកដូចគ្នា រ៉យទ័រដូចគ្នា ប៉ុន្តែមុខផ្សេងគ្នា។ ប្រហែលជាអ្វីៗទាំងអស់ដែលល្អក្នុងជីវិត មានភាពងាយស្រួលជាងសម្រាប់ក្រុមស្បែកសលោកខាងលិច? យើងនិយាយបានថា ប្រព័ន្ធផ្សព្វផ្សាយលំអៀងទាំងនោះ គឺអាក្រក់ណាស់ មិនមែនអត្តពលិកឡើយ។ ពួកគេស្រស់ស្អាត ទោះបីជាពួកគេមានពណ៌សម្បុរ ឬសញ្ជាតិអ្វីក៏ដោយ»។

 

ក្រៅពី Reuters ស្ថានទូតចិននៅស្រីលង្កា ក៏បានរិះគន់ CNN ផងដែរ ការសរសេរចំណងជើងលើព័ត៌មាន Updates អូឡាំពិកថា «មេដាយមាសសម្រាប់ចិន...និងករណីកូវីដ-១៩ បន្ថែមទៀត» (Gold for China…and more Covid-19 cases)។