គិតត្រឹមថ្ងៃទី២៧កក្កដា ឆ្នាំ២០២១ កម្ពុជា បានចាក់វ៉ាក់សាំងបង្ការជំងឺកូវីដ-១៩ ជូនដល់លោកតា-លោកយាយដែលមានអាយុជាង១០០ឆ្នាំ បានចំនួន២៣នាក់។ ចំពោះលោកតា-លោកយាយដែលបានស្ម័គ្រចិត្តទៅចាក់វ៉ាក់សាំងបង្ការជំងឺកូវីដ-១៩ គឺស្ថិតនៅក្នុងចំណោមពលរដ្ឋសរុបជាង៦,៨លាននាក់​ ដែលបានចាក់វ៉ាក់សាំងបង្ការកូវីដ-១៩នៅទូទាំងប្រទេស។ 

 

 លោកស្រី ឱ វណ្ណឌីន បានបញ្ជាក់ប្រាប់សារព័ត៌មាន ThmeyThmey នាល្ងាចថ្ងៃទី២៧កក្កដា ​ថា ចំពោះលោកតា-លោកយាយមានអាយុលើសពី១០០ឆ្នាំ ដែលបានចាក់វ៉ាក់សាំងបង្ការជំងឺកូវីដ-១៩នេះ គឺទទួលថវិកាចំនួន៣លានរៀល ក្នុងម្នាក់ៗ ព្រមទាំងទទួលសម្ភារជាគ្រឿងឧបភោគ បរិភោគមួយចំនួនថែមទៀត។  

 

នៅថ្ងៃទី២៧កក្កដានេះ រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩រូបនេះ បានយកថវិការបស់សម្តេច ហ៊ុន សែន ទៅប្រគល់ជូនលោកតា-លោកយាយ អាយុជាង១០០ឆ្នាំ ចំនួន៥នាក់ដែលបានស្ម័គ្រចិត្តចាក់វ៉ាក់សាំងបង្ការជំងឺកូវីដ-១៩ នៅខេត្តកំពង់ចាម និងត្បូងឃ្មុំ៕ 

 

 

 

 

 

​