ស្មៅប្រមាត់មនុស្ស មានសារធាតុ andrographolide ដែលការពារកោសិកាពីវីរុស និងទប់ស្កាត់វីរុសមិនឱ្យបង្កើនបរិមាណក្នុងខ្លួនមនុស្ស។ អ្នកនាំពាក្យរងរដ្ឋាភិបាលថៃ Rachada Dhnadirek បញ្ជាក់បែបនេះក្នុងសន្និសីទសារព័ត៌មានមួយ ក្រោយគណៈរដ្ឋមន្រ្តីថៃផ្ដល់ភ្លើងបៃតងឱ្យប្រើប្រាស់ថ្នាំផលិតចេញពីស្មៅប្រមាត់មនុស្សដើម្បីព្យាបាលអ្នកជំងឺកូវីដ-១៩ ដែលមានស្ថានភាពស្រាល។

 

 

 

តាមពិតទៅ ថៃ ទទួលជោគជ័យក្នុងការប្រើប្រាស់ថ្នាំនេះលើអ្នកទោសដែលមានផ្ទុកវីរុសបង្កជាជំងឺកូវីដ-១៩ រួចហើយដែរ។ អ្នកនាំពាក្យខាងលើលើកឡើងថា នាយកដ្ឋានកែប្រែ បានឱ្យថ្នាំនេះទៅអ្នកទោសឆ្លងជំងឺនេះចំនួន១១៨០០នាក់ ហើយក្នុងនោះ៩៩,០២ភាគរយ បានសះស្បើយ។ នេះបើតាមការផ្សាយរបស់កាសែតបាងកកប៉ុស្តិ៍។

 

បើតាមក្រសួងឧត្តមសិក្សា វិទ្យាសាស្រ្ត ស្រាវជ្រាវ និងនវានុវត្តន៍របស់ថៃ អ្នកជំងឺអាចប្រើសារធាតុ andrographolide ចំនួន១៨០មីលីក្រាមក្នុងមួយថ្ងៃ។ ចំណែកនាយកដ្ឋានកែប្រែ ក៏គ្រោងផលិតឱសថនេះឱ្យបានច្រើនដើម្បីបង្កើនការប្រើប្រាស់ឱ្យកាន់តែទូលំទូលាយផងដែរ។

 

ស្ថានភាពជំងឺកូវីដ-១៩ នៅថៃ នៅតែស្ថិតក្នុងសភាពធ្ងន់ធ្ងរដដែល បើទោះជារដ្ឋាភិបាលនាយករដ្ឋមន្រ្តី ប្រាយុទ្ធ ចន្ទអូចា ចាត់វិធានការតឹងរ៉ឹងក្ដី។ នៅថ្ងៃទី២៨ ខែកក្កដា ថៃរាយការណ៍ចំនួនអ្នកឆ្លងប្រចាំថ្ងៃខ្ពស់បំផុត ដល់ទៅ១៦,៥៣៣នាក់ឯណោះ ដែលធ្វើឱ្យករណីឆ្លងសរុបមានដល់៥៤៣,៣៦១ករណី។ អ្នកស្លាប់សរុបមាន៤៣៩៧នាក់៕