ជាតិ
នយោបាយជាតិ
ខួប៣ឆ្នាំនៃជ័យជម្នះក្នុងការបោះឆ្នោត លោក ហ៊ុន ម៉ានី អរគុណអ្នកបោះឆ្នោត
× ថ្ងៃទី២៩ខែកក្កដាឆ្នាំ២០១៨ គណបក្សប្រជាជនកម្ពុជាបានទទួលជ័យជម្នះ ក្នុងការបោះឆ្នោតដោយទទួលបានអាសនៈរដ្ឋសភាទាំង១២៥។ ឆ្នាំទី៣នៃនីតិកាលទី៦នេះ លោក ហ៊ុន ម៉ានី ដែលជាកម្មាភិបាលនៃគណបក្សប្រជាជនកម្ពុជា និយាយអរគុណដល់អ្នកគាំទ្រផង និងបង្ហាញពីការទទួលខុសត្រូវ របស់គណបក្សលោកដែលកំពុងដឹកនាំរដ្ឋាភិបាល។
ជាសមាជិកនៃគណៈកម្មការកណ្ដាលនៃគណបក្សប្រជាជនកម្ពុជា លោក ហ៊ុន ម៉ានី បានអរគុណអ្នកបោះឆ្នោត៧៦ភាគរយ ដែលបានគាំទ្រគណបក្សគណបក្សលោក នៅក្នុងសម័យបោះឆ្នោតនីតិកាលទី៦ ថ្ងៃទី២៩ ខែកក្កដា ឆ្នាំ២០១៨។ អ្នកនយោបាយបន្តវេនបានចាត់ទុកការផ្តល់សេចក្តីទុកចិត្តពីអ្នកបោះឆ្នោតទាំងនោះ ថាជាការផ្តល់យុត្តិធម៌ និងការលើកទឹកចិត្តដល់មេដឹកនាំរបស់ខ្លួន ដែលលះបង់ និងស្វែងរកសន្តិភាពពេញលេញដល់ប្រទេសកម្ពុជា។ លោក ម៉ានី បានសរសេរសារទាំងនោះ នៅលើទំព័រហ្វេសប៊ុករបស់លោក ដើម្បីរម្លឹកខួប៣ឆ្នាំ នៃជ័យជម្នះរបស់គណបក្សលោកក្នុងនីតិកាលទី៦នេះ។
តំណាងរាស្ត្រមណ្ឌលកំពង់ស្ពឺ បានលើកឡើងផងដែរថាគណបក្សរបស់លោក ដែលកំពុងដឹកនាំរដ្ឋាភិបាល កំពុងតែបន្តបម្រើប្រជាជន ពិសេសក្នុងដំណាក់នៃការឆ្លងរាលដាលនៃជំងឺកូវីដ-១៩ ដ៏គ្រោះថ្នាក់នេះ។
លោក ហ៊ុន ម៉ានី បានសរសេរយ៉ាងដូច្នេះ៖«តាំងពីពេលចាប់ផ្តើមដំបូងនៃការផ្ទុះការឆ្លងរាលដាលនៃជំងឺកូវីដ-១៩ រាជរដ្ឋាភិបាល ក៏ដូចជារដ្ឋបាលថ្នាក់ក្រោមជាតិ ក្រោមការដឹកនាំយ៉ាងម៉ឺងម៉ាត់ជាប់ជាប្រចាំ របស់សម្តេចនាយករដ្ឋមន្ត្រី បានចាត់ទុកសុខុមាលភាព សុវត្ថិភាពប្រជាពលរដ្ឋជាអាទិភាពខ្ពស់បំផុត។ ជាមួយគ្នានោះ ប្រជាពលរដ្ឋដែលមានការងារទទួលរងផលប៉ះពាល់ពីជំងឺរាតត្បាតនេះ ជាពិសេស កម្មករនិយោជិតក្នុងវិស័យទេសចរណ៍ កាត់ដេរ និងអ្នកប្រកបអាជីវកម្មប្រចាំថ្ងៃដែលប៉ះពាល់ធ្ងន់ បានទទួលនូវការឧបត្ថម្ភសាច់ប្រាក់ ជាបន្តបន្ទាប់ពីរាជរដ្ឋាភិបាល បើទោះបីជាមិនស្មើនឹងចំណូលដែលពួកគាត់រកបានមុនពេលមានជំងឺកូវីដ ១៩ ក្តី តែនេះជាការរួមចំណែកមួយយ៉ាងសំខាន់សម្រាប់ពួកគាត់។»។
តំណាងរាស្ត្រ ម៉ានី បានបញ្ជាក់ផងដែរថា កម្ពុជាក៏បានបង្កើតកំណត់ត្រាក្នុងការអនុវត្តយុទ្ធសាស្ត្រ និងយុទ្ធនាការចាក់វ៉ាក់សាំងរបស់ខ្លួន ដែលមកទល់ពេលនេះ កម្ពុជាទទួលបានវ៉ាក់សាំងគ្រប់គ្រាន់ដែលមានប្រភពពីប្រទេសផ្សេងៗលើសកលលោក សម្រាប់ចាក់ជូនប្រជាពលរដ្ឋយ៉ាងតិច ១០ លាននាក់។
«ចំនួនវ៉ាក់សាំងដែលកម្ពុជាបាន និងកំពុងទទួលជាបន្តបន្ទាប់ និងកំពុងត្រៀមបញ្ជូនមក អាចធានាបានថា យុទ្ធនាការចាក់វ៉ាក់សាំងអាចប្រព្រឹត្តទៅបានដោយរលូន និងដោយគ្មានការបារម្ភពីបញ្ហាខ្វះវ៉ាក់សាំងចាក់នោះទេ។ ខ្ញុំសូមថ្លែងអំណរគុណដ៏ស្មោះស្ម័គ្រចំពោះសាធារណរដ្ឋប្រជាមានិតចិន និងប្រទេសជប៉ុន ដែលបានផ្តល់នូវវ៉ាក់សាំងជាបន្តបន្ទាប់ ដែលអាចអនុញ្ញាតឱ្យកម្ពុជាមានលទ្ធភាព ផ្តល់ខែលការពារដល់ប្រជាពលរដ្ឋខ្លួន បញ្ចៀសបាននូវការធ្លាក់ខ្លួនឈឺធ្ងន់ដោយសារជំងឺកូវីដ-១៩។ ខ្ញុំក៏សូមវាយតម្លៃខ្ពស់ចំពោះមិត្តភក្តិបរទេសដទៃទៀតដែលបានសន្យានូវការបរិច្ចាកវ៉ាក់សាំងបង្ការកូវីដ ១៩ ទោះតាមយន្តការទ្វេរភាគី ឬទាំងយន្តការ Covax ក្តី ហើយយើងសង្ឃឹមថាយើងនឹងទទួលបានវ៉ាក់សាំងនេះក្នុងដៃដើម្បីអាចបន្តការចាក់ជូនប្រជាពលរដ្ឋបន្ថែមទៀត។»។ នេះជាការកត់សម្គាល់របស់លោក ហ៊ុន ម៉ានី៕
© រក្សាសិទ្ធិដោយ thmeythmey.com