កីឡាជាតិ
ជាតិ
អូឡាំពិក៖ ប៉ែន សុគង់ ចាញ់កំណត់ត្រាផ្ទាល់ខ្លួនលើវិញ្ញាសារត់ល្បឿន១០០ម៉ែត្រ
× កីឡាករអត្តពលកម្មកម្ពុជា ប៉ែន សុគង់ សម្រេចក្នុងថិរវេលា១១.០២វិនាទីក្នុងការប្រកួតវិញ្ញាសារត់ល្បឿនចម្ងាយ១០០ម៉ែត្រនាព្រឹត្តិការណ៍កីឡាអូឡាំពិកក្រុងតូក្យូ (Tokyo 2020) ព្រឹកថ្ងៃសៅរ៍ ទី៣១ ខែកក្កដានេះ។
កំណត់ត្រាចាស់របស់ ប៉ែន សុគង់ គឺ ១០.៨៧វិនាទី នាព្រឹត្តិការណ៍កីឡាស៊ីហ្គេមឆ្នាំ២០១៩ នៅហ្វីលីពីន។ សម្រាប់វិញ្ញាសារត់ល្បឿនចម្ងាយ១០០ម៉ែត្រក្នុងអូឡាំពិក កាលពីឆ្នាំ១៩៧២ នាព្រឹត្តិការណ៍នៅអាល្លឺម៉ង់ខាងលិច កីឡាករ ម៉ៅ សំផុន សម្រេចបានក្នុងថិរវេលា ១០.៩៥វិនាទី។ នៅឆ្នាំ២០០៤ នាក្រុងអាតែន ប្រទេសក្រិក ភោគ សុភ័ក្ត្រ សម្រេចបានក្នុងថិរវេលា ១១.៥៦វិនាទី។
ក្នុងការប្រកួតអូឡាំពិកក្រុងតូក្យូនេះ សុគង់ បញ្ចប់ចំណាត់ថ្នាក់លេខ៦ក្នុងចំណោមអត្តពលិក៩នាក់។ កីឡាករស៊ីមបាវ៉េ Makusha Ngoni, កីឡាករតូហ្គោ Dabla Fabrice និងកីឡាករនីហ្គារ៉ាហ្គោ Romero Yeykell Eliuth ឈានទៅវគ្គបន្ត។
បច្ចុប្បន្នកីឡាករហ្សាម៉ៃអ៊ីក Ulsan Bolt គឺជាម្ចាស់កំណត់ត្រាលើវិញ្ញាសារត់ល្បឿនចម្ងាយ១០០ម៉ែត្រ គឺ ៩.៦៣វិនាទីក្នុងព្រឹត្តិការណ៍អូឡាំពិក និងជាម្ចាស់កំណត់ត្រាពិភពលោកក្នុងថិរវេលា៩.៥៨វិនាទីផងដែរ៕
© រក្សាសិទ្ធិដោយ thmeythmey.com