ភ្នំពេញ៖ អាជ្ញាធរខេត្តបាត់ដំបង សម្រេចបិទខ្ទប់ផ្សារចំនួន២៧ស្ថិតក្នុងភូមិសាស្រ្តខេត្ត រយៈពេល១៤ថ្ងៃ ចាប់ពីថ្ងៃទី១សីហា ដល់ថ្ងៃទី១៤សីហា។
វិធានការបិទខ្ទប់ផ្សារនេះ គឺដើម្បីទប់ស្កាត់ការឆ្លងរាលដាលក្នុងសហគមន៍ ពិសេសមេរោគបំប្លែងថ្មីប្រភេទដែលតា (Delta)។ នេះបើតាមសេចក្ដីសម្រេចស្ដីពីការអនុវត្តវិធានការរដ្ឋបាលចុះហត្ថលេខាដោយលោក ងួន រតនៈ អភិបាលខេត្តបាត់ដំបង នៅថ្ងៃទី៣១ កក្កដានេះ។
ផ្សារចំនួន ២៧ទីតាំងដែលស្ថិតនៅក្រុងបាត់ដំបង, ស្រុកថ្មគោល, ស្រុកសង្កែ,ស្រុកមោងឫស្សី និងស្រុកកំរៀង ត្រូវបានអាជ្ញាធរខេត្តបាត់ដំបងបិទខ្ទប់បណ្ដោះអាសន្នរយៈពេល១៤ថ្ងៃ ចាប់ពីថ្ងៃទី១-១៤ សីហា។ បើតាមរដ្ឋបាលខេត្តការកើនឡើងនូវចំនួនអ្នកវិជ្ជមានកូវីដ-១៩ ក្នុងភូមិសាស្រ្តខេត្តបាត់ដំបងតម្រូវឱ្យអាជ្ញាធរសម្រេចបិទទីតាំងផ្សារទាំងនេះ ដើម្បីទប់ស្កាត់ការឆ្លងរាលដាលក្នុងសហគមន៍ពិសេសមេរោគបំប្លែងថ្មី ប្រភេទDelta។
ផ្សារទាំង២៧ ដែលត្រូវបិទខ្ទប់រួមមានផ្សារធំបាត់ដំបង, ផ្សារបឹងឈូក, ផ្សារអប្សរាផ្សារលើ, ផ្សារ ១៣ មករា, ផ្សាររោងល្ខោន, ផ្សារភូ ពុយ, ផ្សារវត្តលៀប, ផ្សារពោធិវង្ស, ផ្សារថ្មីថ្មគោល, ផ្សារជ្រៃ, ផ្សារបាសែត, ផ្សារតាប៉ុន,
ផ្សារនរា, ផ្សារខ្វែង, ផ្សារកំពង់ព្រៀង, ផ្សារអន្លង់វិល, ផ្សារមោងឫស្សីចាស់, ផ្សារមោងឫស្សីថ្មី, ផ្សារព្រៃស្វាយ, ផ្សារក្រឡោមភ្លុក, ផ្សារថ្នល់បត់, ផ្សារជ្រៃរុន, ផ្សារដើមចាន់, ផ្សារតាលាស់, ផ្សារកូនខ្លុង, ផ្សារ KRD និងផ្សារកំប្រង់។
ដើម្បីសម្រួលដល់ការទិញទំនិញរបស់ប្រជាពលរដ្ឋអាជ្ញាធរខេត្តបាត់ដំបង នឹងរៀបចំទីតាំងលក់ដូរបណ្ដោះអាសន្នសម្រាប់ការលក់ដូរគ្រឿងឧបភោគបរិភោគ បន្លែ ត្រី សាច់និងសម្ភារប្រើប្រាស់ប្រចាំថ្ងៃចាំបាច់។ ជាមួយគ្នានេះ អ្នកលក់ដូរទាំងអស់ត្រូវមានគម្លាតទីតាំងលក់ដូរពី២ម៉ែត្រ ទៅ២ម៉ែត្រកន្លះ, ត្រូវពាក់ម៉ាស់និងមានទឹកអាល់កុលទាំងអ្នកលក់ និងអ្នកទិញ។
សូមបញ្ជាក់ថា គិតត្រឹមថ្ងៃទី៣០កក្កដា ខេត្តបាត់ដំបង មានអ្នកឆ្លងកូវីដ-១៩ សរុប ៣,១៦៦នាក់ ជាសះស្បើយចំនួន ១,៩៣០នាក់ និងស្លាប់ មានចំនួន ៤០នាក់៕