អន្តរជាតិ
មេទ័ពចិន និងឥណ្ឌាជួបគ្នាដើម្បីបន្ធូរជម្លោះព្រំដែន បឹង Pangong Pso នៅផ្នែកខាងទឹកដីចិន។ រូបថត Xinhua
× មេបញ្ជាការយោធាជាន់ខ្ពស់ចិន និងឥណ្ឌា បានជួបគ្នានៅថ្ងៃទី៣១ ខែកក្កដានៅឯព្រំដែនរវាងមហាយក្សទាំងពីរ ដើម្បីដោះស្រាយជម្លោះព្រំដែនកន្លងមក។ ព្រំដែនចិន និងឥណ្ឌារាប់ពាន់គីឡូម៉ែត្រ មិនទាន់ត្រូវបានកំណត់ជាក់លាក់ឡើយ ដែលជាមូលហេតុនាំឱ្យមានការប៉ះទង្គិចគ្នាជារឿយៗ។
អ្នកនាំពាក្យកងទ័ពឥណ្ឌាបញ្ជាក់ថា មេទ័ពចិន និងឥណ្ឌាជួបគ្នាក្នុងទឹកដីចិននៅតំបន់ Ladakh នៅថ្ងៃទី៣១ ខែកក្កដា ហើយបន្តជួបគ្នានៅថ្ងៃទី១ ខែសីហានេះទៀត។ ការបន្ធូរបន្ថយកម្ដៅតាមព្រំដែនជារបៀបវារៈសំខាន់ក្នុងជំនួបកម្រិតមេបញ្ជាការលើកទី១២ ដែលធ្វើឡើងរាល់៣ខែម្ដង។
ជំនួបមេបញ្ជាការនេះ ធ្វើឡើងក្រោយជំនួបប្រមុខការទូតឥណ្ឌា និងចិននៅតាហ្ស៊ីគីស្ថានកាលពីថ្ងៃទី១៥ ខែកក្កដាកន្លងទៅ។ អំឡុងជំនួបនោះ រដ្ឋមន្រ្តីការបរទេសឥណ្ឌា S Jaishankar ប្រាប់សមភាគីចិន វ៉ាង យី ថា ការអូសបន្លាយជម្លោះនៅតាមព្រំដែន មិនមែនជារឿងល្អសម្រាប់ប្រទេសទាំង២ឡើយ តែក៏ឆ្លៀតព្រមានថា ការប៉ុនប៉ងផ្លាស់ប្ដូរដោយឯកតោភាគីពីសំណាក់ចិន ជារឿងមិនអាចទទួលបានបានដាច់ខាត។
កាលពីខែកុម្ភៈ ចិន និងឥណ្ឌាបានដកកងទ័ពរៀងៗខ្លួន និងយុទ្ធោបករណ៍នានាចេញពីតំបន់ជម្លោះនៅបឹង Pangong Tso ។ ក្នុងការចរចាលើកនេះ ភាគីទាំងពីរ នឹងផ្ដោតលើការបន្ធូរបន្ថយភាពតានតឹងនៅផ្នែកផ្សេងតាមព្រំដែនក្នុងតំបន់ Ladakh ដូចជាចំណុច Hot Springs, Gogra និង Depsang ជាដើម។
ទាំងចិន ទាំងឥណ្ឌា ពង្រាយកងទ័ពរាប់ម៉ឺននាក់ជាមួយនឹងរថក្រោះ និងយន្តហោះចម្បាំងរាប់សិបគ្រឿងនៅតាមព្រំដែនដែលមិនទាន់កំណត់ជាក់លាក់ ហើយស្ថិតក្រោមការគ្រប់គ្រងជាក់ស្ដែងរបស់ភាគីទាំងពីរប៉ុណ្ណោះ។ ខ្សែព្រំដែនជាក់ស្ដែង ដែលខណ្ឌចែកចិន និងឥណ្ឌា មានប្រវែងប្រមាណ៣ពាន់គីឡូម៉ែត្រឯណោះ។
កាលពីឆ្នាំ២០២០ ការប៉ះទង្គិចគ្នាមួយប្រាវ បានសម្លាប់ទាហានឥណ្ឌា២០នាក់ និងចិន៤នាក់នៅព្រំដែនក្នុងតំបន់ Ladakh នេះ ដែលជាការប៉ះទង្គិចដ៏បង្ហូរឈាមមួយរវាងមហាអំណាចទាំងពីរ៕
© រក្សាសិទ្ធិដោយ thmeythmey.com