កម្ពុជា មានអ្នកស្លាប់​ដោយសារជំងឺកូវីដ-១៩ ចំនួន ៧៩២នាក់ នៅក្នុងខែកក្កដាកន្លងទៅ ខណៈ ករណីឆ្លងក្នុងខែដដែល មានចំនួន ២៦.៥២៨នាក់ និងមានករណីជាសះស្បើយសរុប ២៥.៨៩៦នាក់វិញដែរ។

ករណីស្លាប់សរុបនៅក្នុងខែកក្កដា គឺជាចំនួនក៏ខ្ពស់បើធៀបនឹងខែកន្លងទៅ ស្របពេលដែលកម្ពុជាបានរកឃើញមេរោគបំប្លែងថ្មីជាបន្តបន្ទាប់សរុប ១៤២ករណី គិតចាប់ពិថ្ងៃទី៣១ ខែមីនា ដល់ថ្ងៃទី ២៥ ខែកក្កដា។

 

ករណីអ្នកស្លាប់ដោយសារជំងឺកូវីដ-១៩ បានកើតឡើងជារៀងរាល់ថ្ងៃក្នុងខែកក្កដា ដែលយ៉ាងហោចណាស់ករណីទាបបំផុតមានមនុស្ស ១១នាក់ បានស្លាប់កាលពីថ្ងៃទី២៨។ ចំណែក ករណីខ្ពស់បំផុតមានមនុស្ស ៣៩នាក់បានស្លាប់នៅថ្ងៃទី១៤។ ចំនួនអ្នកស្លាប់ជាបន្តបន្ទាប់បានធ្វើឱ្យ រយៈពេល៣១ថ្ងៃខែកក្កដា មានអ្នកស្លាប់ដោយសារជំងឺកូវីដ-១៩សរុប ៧៩២នាក់។ 
 

ក្រៅពីអ្នកស្លាប់ ករណីវិជ្ជមានជំងឺកូវីដ-១៩ ក្នុងខែកក្កដា មានការកើនឡើងគួរឱ្យសម្គាល់ដែរ។ ករណីដែលទាបបំផុតមានអ្នកវិជ្ជមានកូវីដ-១៩ ចំនួន ៦៥៨នាក់នៅថ្ងៃទី៣០ និងជាទូទៅមានករណីវិជ្ជមានចន្លោះពីជិត៧០០ ដល់ក្បែរ១,០០០នាក់ ។ ករណីនេះបានធ្វើឱ្យខែកក្កដាមានអ្នកកើតជំងឺកូវីដ-១៩ ចំនួន ១៨,៣៩៦នាក់ឆ្លងក្នុងសហគមន៍ ខណៈករណីនាំចូលមាន ៨,១៣២នាក់។ 
 

ជាមួយគ្នានេះករណីសះស្បើយក៏មានចំនួនច្រើនផងដែរ គឺមានដល់២៥, ៨៩៦នាក់។ កាលពីថ្ងៃទី១២អ្នកសះស្បើយមាន១,០០២នាក់ ថ្ងៃទី១៨ មាន១,០៨៧នាក់។

និយាយរួមករណីសះស្បើយប្រចាំថ្ងៃមានយ៉ាងហោចណាស់ក៏ខ្ទង់៦០០នាក់ផងដែរ។ ក្នុងរយៈពេល៣១ថ្ងៃកន្លងមកមានចំនួន៦ថ្ងៃ ដែលករណីសះស្បើយច្រើនជាង១,០០០នាក់។ 

គួរបញ្ជាក់ផងដែរថា មកទល់ពេលនេះ កម្ពុជាមានអ្នកវិជ្ជមានកូវីដ-១៩សរុប  ៧៧,៩១៤ នាក់ ក្នុងនោះ១០,៨០២ នាក់ ជា​ករណី​នាំចូល​។ អ្នកជា​សះស្បើយ​មាន៧០,៧៥៤ នាក់ និង​ស្លាប់​សរុប ១,៤២០នាក់​៕