អស់រយៈកាលប្រមាណ៥ខែមកហើយ ដែលអាជ្ញាធរជាតិអប្សរា ចាប់ផ្តើមគម្រោងជួសជុល និងលើកតម្លៃប្រាសាទបាយក្អែកឡើងវិញ។ មកដល់ពេលនេះ ការជួសជុលសម្រេចបានប្រមាណ៧០ភាគរយ ហើយគ្រោងនឹងបញ្ចប់នៅចុងខែ កញ្ញាខាងមុខនេះ។

 

បុរាណវិទូនៃអាជ្ញាធរជាតិអប្សរា លោក ស្រ៊ុន តិច បានឱ្យដឹងថា គម្រោងជួសជុលប្រាសាទបាយក្អែក ត្រូវបានលើកឡើង ស្របពេលដែលអាជ្ញាធរជាតិអប្សរាកំពុងដំណើរការរៀបចំ និងលើកតម្លៃបរិស្ថានមុខប្រាសាទអង្គរវត្តឡើងវិញ។ 

  រូបភាព អាជ្ញាធរជាតិអប្សរា

អ្នកជំនាញនៃអាជ្ញាធរជាតិអប្សរា រៀបរាប់ថា ការជួសជុលប្រាសាទបាយក្អែកនេះ ហាក់មានការលំបាកបន្ដិច ពិសេសការឱ្យប្រាកដលើការគោរពតាមរចនាសម្ព័ន្ធទម្រង់នៃប្រាសាទនេះ ដ្បិតថា មានភស្ដុតាងតិចតួចបំផុតចំពោះព័ត៌មាននៃប្រាសាទមួយនេះ។ លោក ស្រ៊ុន តិច មានប្រសាសន៍ថា៖« ការជួសជុលមិនអាចធ្វើឱ្យដូចទម្រង់រចនាសម្ព័ន្ធដើមវិញទេ ដោយសារយើងគ្មានភស្ដុតាងច្បាស់លាស់ អ្វីដែលកំពុងជួសជុលនេះ គឺតាមឯកសាររបស់បារាំង ដែលគាត់បានកត់ត្រា ការធ្វើកំណាយ គូសប្លង់អី នៅឆ្នាំ ១៩៤៥ របស់លោក ហង់រីម៉ាហ្សាល ពេលគាត់មកដល់ គាត់ឃើញតែខ្លោងទ្វារ ហើយអ្វីៗធ្លាក់អស់»។

 រូបភាព អាជ្ញាធរជាតិអប្សរា

យ៉ាងណាក្ដី លោក ស្រ៊ុន តិច បញ្ជាក់ថា ដ្បិតយោងលើឯកសារមួយសន្លឹករបស់បារាំងក៏ពិតមែន តែក្រុមការងាររបស់លោក នឹងគោរពតាមបច្ចេកទេសជួសជុល តាមអនុសាសន៍របស់អ្នកជំនាញការ អាយស៊ីស៊ី-អង្គរ ដោយព្យាយាមប្រើប្រាស់ថ្មចាស់ៗឱ្យអស់លទ្ធភាព និងជំនួសថ្មីថ្មឱ្យបានតិចបំផុត គឺត្រឹម១០ ទៅ១៥ភាគរយប៉ុណ្ណោះ។

 

អ្នកស្រាវជ្រាវ បានយោងលើក្បាច់លើសសរពេជ្រដែលនៅជាប់ខ្លោងទ្វារប្រាសាទនេះ ដោយបញ្ជាក់ថា វាអាចសាងសង់ដំណាលគ្នាទៅនឹងប្រាសាទអង្គរវត្តដែរ គឺអំឡុងសតវត្សទី១២។ លោក ស្រ៊ុន តិច ពន្យល់ថា៖« សសរពេជ្រទាំង២ ក៏ខុសគ្នាទៀត មួយធំមួយតូច បើមើលបច្ចេកទេស ការឆ្លាក់អត់ទាន់ហើយទៀត មិនទាន់រំលេចជាក្បាច់ តែអាចមើលទម្រង់សសរពេជ្រ មាន១៦ជ្រុង បើធៀបនឹងប្រាសាទដទៃ ធៀបនឹងរចនាប័ទ្មអង្គរ វាស្ថិតនៅរចនាប័ទ្មដូចគ្នាន គឺសតវត្សទី១២»។

 

ក្នុងនាមជាអ្នកកាន់ការងារជួសជុលឡើងវិញ លោក ស្រ៊ុន តិច រំពឹងថា ភ្ញៀវទេសចរនឹងចាប់អារម្មណ៍ចូលទស្សនាប្រាសាទបាយក្អែកឡើងវិញ ក្រោយការជួសជុលរួច៕