លោក អេរីវ៉ាន់ យូសូហ្វ ត្រូវបានជ្រើសរើសជាប្រេសិតពិសេសអាស៊ានសម្រាប់កិច្ចការមីយ៉ាន់ម៉ាអំឡុងកិច្ចប្រជុំរដ្ឋមន្ត្រីការបរទេសអាស៊ាននៅដើមសប្ដាហ៍នេះ។ លោកស្ថិតក្នុងចំណោមបេក្ខជនយ៉ាងតិច៤នាក់ដែលត្រូវជ្រើសរើសឱ្យកាន់តំណែងនេះជាលើកដំបូង ខណៈអាស៊ានព្យាយាមដោះស្រាយវិបត្តិនយោបាយមីយ៉ាន់ម៉ាដែលសមាជិកមួយរបស់ខ្លួន។

 

 

 

ដើម្បីបំពេញការងាររបស់ខ្លួន លោក យូសូហ្វ អះអាងថា លោកគួរតែអាចជួបគ្រប់ភាគីពាក់ព័ន្ធទាំងអស់នៅមីយ៉ាន់ម៉ាពេលធ្វើទស្សនកិច្ចនៅទីនោះ។ ប៉ុន្តែក្នុងសន្និសីទសារព័ត៌មានថ្ងៃទី៧ ខែសីហា លោក យូសូហ្វ ដែលជារដ្ឋមន្រ្តីការបរទេសទី២ របស់ព្រុយណេ មិនបានផ្ដល់កាលបរិច្ឆេទពីដំណើរទៅកាន់មីយ៉ាន់ម៉ាឡើយ ទីដែលមេដឹកនាំរដ្ឋាភិបាលស៊ីវិល អ៊ុងសាន ស៊ូជី និងមន្រ្តីជាច្រើនទៀតកំពុងជាប់ឃុំខ្លួននោះ។

 

ជាបេសកជន អ្នកការទូតព្រុយណេរូបនេះ មានការងារច្រើនដូចជាសម្របសម្រួលវិបត្តិនយោបាយ បញ្ចប់អំពើហិង្សា បើកផ្លូវដល់កិច្ចសន្ទនារវាងយោធា និងក្រុមប្រឆាំងរបបយោធា ដែលការណ៍នេះតម្រូវឱ្យលោកត្រូវជួបគ្រប់ភាគីទាំងអស់។ លោក យូសូហ្វ ក៏មានភារៈមើលការខុសត្រូវការផ្ដល់ជំនួយមនុស្សធម៌ដល់មីយ៉ាន់ម៉ាដែលកំពុងរងការប្រហារខ្លាំងដោយជំងឺកូវីដ-១៩ និងគ្រោះធម្មជាតិមានទឹកជំនន់ជាដើម។

 

«គម្រោងទស្សនកិច្ចនៅមីយ៉ាន់ម៉ា ស្ថិតក្រោមការរៀបចំ។ អ្វីដែលយើងត្រូវធ្វើ គឺធានាថា យើងត្រៀមខ្លួនជាស្រេចពេលទៅដល់មីយ៉ាន់ម៉ា»។ លោក យូសូហ្វ បញ្ជាក់បែបនេះ។ 

 

យ៉ាងណាមិញ ការចង់ជួបគ្រប់ភាគីទាំងអស់នោះ ទំនងជាពិបាកកើតឡើង ព្រោះរបបយោធាទំនងជាមិនអនុញ្ញាតឱ្យប្រេសិតអាស៊ានក្រុមប្រឆាំងឡើយ កុំថាឡើយជួបលោកស្រី ស៊ូជី នោះ។ ចំណែកក្រុមប្រឆាំងរដ្ឋាភិបាលយោធា ក៏ជំទាស់ការតែងតាំងលោក យូសូហ្វ ដែរ ព្រោះអាស៊ានមិនបានជជែកជាមួយសមាសភាពប្រឆាំងយោធា និងភាគីពាក់ព័ន្ធឯទៀត៕