លោក ផាម មិញឈិញ នាយករដ្ឋមន្ត្រីវៀតណាម បានជួបលោក សុង ប៉ អគ្គរដ្ឋទូតចិនប្រចាំវៀតណាមនៅវិមានរដ្ឋាភិបាលនៅថ្ងៃទី២៤ ខែសីហា។ ជំនួបនេះ ត្រូវបានដឹងថា មិនមានគ្រោងទុកមុនឡើយ។ 

 

បើតាមកាសែតរដ្ឋាភិបាលវៀតណាម ក្នុងជំនួបនេះលោក ឈិញ បានអរគុណចិនដែលផ្ដល់ជំនួយវ៉ាក់សាំងបង្ការជំងឺកូវីដ-១៩ ដល់វៀតណាមចំនួន២លានដូសនាពេលកន្លងមក។ ប្រមុខរដ្ឋាភិបាលវៀតណាម ចាត់ទុកជំនួយនេះ ជាការឆ្លុះបញ្ចាំងទំនាក់ទំនងប្រពៃណីប្រទេសទាំងពីរក្នុងគ្រាលំបាក ហើយក៏ស្នើឱ្យចិនបន្តជួយផ្គត់ផ្គង់វ៉ាក់សាំង និងផ្ទេរបច្ចេកវិទ្យាផលិតវ៉ាក់សាំង និងឱសថដល់វៀតណាម ក៏ដូចជាប្រាប់ពីបទពិសោធដោះស្រាយវិបត្តិកូវីដ-១៩ ផងដែរ។

 

នាជំនួបនេះ នាយករដ្ឋមន្ត្រីវៀតណាម ក៏ប្រាប់អ្នកការទូតចិនពីគោលនយោបាយការបរទេសរបស់វៀតណាមដែលប្រកាន់ខ្ជាប់គោលការណ៍ឯករាជ្យ ពឹងផ្អែកខ្លួនឯង ពិពិធកម្មទំនាក់ទំនងក្រៅប្រទេស និងចូលរួមយ៉ាងសកម្មក្នុងសមាហរណកម្មអន្តរជាតិ។ ត្រង់នេះ កាសែតរដ្ឋាភិបាលវៀតណាមស្រង់សម្ដីលោក ឈិញ ថា៖ «វៀតណាម មិនចូលរួមក្នុងសម្ព័ន្ធណាមួយ ឬចាប់ប្រទេសណាមួយដើម្បីប្រឆាំងប្រទេសមួយទៀតឡើយ។»

 

មេដឹកនាំវៀតណាម ទំនងជាចង់ប្រាប់តំណាងទីក្រុងប៉េកាំងថា បើទោះជាខ្លួនកំពុងមានទំនាក់ទំនងជិតស្និទ្ធជាមួយអាមេរិកក្ដី វៀតណាមនៅតែរក្សាចំណងមិត្តភាពជាប្រពៃណីជាមួយចិន។ ដោយចិនជាដៃគូយុទ្ធសាស្រ្តកិច្ចសហប្រតិបត្តិការគ្រប់ជ្រុងជ្រោយរបស់វៀតណាម វៀតណាមចាត់ទុកទំនាក់ទំនងជាមួយចិនជាជម្រើសអាទិភាពក្នុងគោលនយោបាយការបរទេសរបស់ខ្លួន។

 

ជំនួបរវាងនាយករដ្ឋមន្រ្តីវៀតណាម និងអគ្គរដ្ឋទូតចិន ធ្វើឡើងមុនដំណើរទស្សនកិច្ចរបស់លោកស្រី កាម៉ាឡា ហារីស អនុប្រធានាធិបតីអាម៉េរិកនៅទីក្រុងហាណូយ។ ដំណើរទស្សនកិច្ចនេះ ត្រូវមើលឃើញថា​ ជាការប្រឹងប្រែងរបស់រដ្ឋការក្រុងវ៉ាស៊ីនតោនក្នុងទាក់ទាញប្រទេសក្នុងតំបន់ក្នុងការប្រឈមមុខនឹងចិន ខណៈដែលវៀតណាមមានបញ្ហាជាមួយចិនរឿងសមុទ្រចិនខាងត្បូងផងនោះ។ ទំនាក់ទំនងរវាងវៀតណាម និងអាម៉េរិក ក៏ជិតស្និទ្ធខ្លាំងក្នុងរយៈពេលចុងក្រោយនេះដែរ។

 

លោកស្រី ហារីស បានទៅដល់វៀតណាមនៅយប់ថ្ងៃទី២៤ ខែសីហាដើម្បីធ្វើទស្សនកិច្ចបីថ្ងៃ។ លោកស្រីក៏នឹងអញ្ជើញបើកដំណើរការទីស្នាក់ការប្រចាំតំបន់អាស៊ីអាគ្នេយ៍របស់មជ្ឈមណ្ឌលបង្ការជំងឺឆ្លងអាមេរិក (CDC) ផងដែរ៕