អតីតខ្សែប្រយុទ្ធក្រុមកាំភ្លើងធំ Arsenal រូបនេះ បានចូលរួមជាមួយក្រុមការងារលោក Roberto Martinez គ្រូបង្វឹកជម្រើសជាតិបែលហ្ស៊ិក កាលពីការប្រកួត Euro ២០២០មក ហើយទើបបានការផ្តល់ទំនុកបន្ថែមជាមន្ត្រីពេញសិទ្ធិ រហូតដល់ខែធ្នូ ឆ្នាំ២០២២។

 

តាមពិតទៅ Henry ធ្លាប់បានចូលរួមការងារជាមួយក្រុមជម្រើសជាតិបែលហ្ស៊ិក កាលពីខែសីហា ២០១៦ម្ដងហើយ ក្នុងនាមជាជំនួយការទី២ ខណៈលោក Graeme Jones ជាជំនួយការទី១ គ្រូបង្វឹក លោក Roberto Martinez ។ ក្រុមការងារនេះ បានជួយក្រុមជម្រើសជាតិបែលហ្ស៊ិក ឡើងទៅកាន់វគ្គពាក់កណ្ដាលផ្ដាច់ព្រ័ត្រ ពានរង្វាន់បាល់ទាត់ពិភពលោក ២០១៨ផងដែរ។

 

ក្រោយមក អតីតវីរៈបុរសArsenal វ័យ៤៤ឆ្នាំរូបនេះ ក៏បានសម្រេចចិត្តលាឈប់ពីតួនាទីជំនួយការក្រុមបែលហ្ស៊ិក នៅខែតុលា ឆ្នាំ២០១៨ ដើម្បីទៅដឹកនាំក្រុម Monaco នៅ League 1 របស់បារាំង ក្នុងនាមជាអ្នកចាត់ការក្រុម។ ប៉ុន្តែក្រោយមកអតីតខ្សែប្រយុទ្ធសញ្ជាតិបារាំងរូបនេះ ក៏ត្រូវបានបណ្ដេញពីតួនាទីអ្នកចាត់ការ នៅខែមករា ២០១៩ ក្រោយដឹកនាំ Monaco ឈ្នះតែ៤ប្រកួតប៉ុណ្ណោះ ខណៈក្រុមស្ថិតនៅក្នុងតំបន់ដែលត្រូវកាត់ចោល។

 

ក្រោយមក Henry បានចូលរួមជាមួយក្រុម Montreal នៅខែវិច្ឆិកាឆ្នាំ ២០១៩ ហើយបានដឹកនាំពួកគេទៅកាន់ការប្រកួតជម្រុះដំបូងរបស់ពួកគេ ។ ក្រោយដឹកនាំមិនបានជោគជ័យទៀត Henry បានដើរចេញពីក្រុមនេះ នៅខែកុម្ភៈ ឆ្នាំ ២០២១ ៕