កម្ពុជា ក៏ស្ថិតនៅក្នុងប្រទេសជាដៃគូពិភាក្សាជាមួយរដ្ឋាភិបាលអូស្ត្រាលី អំពីការផ្ដល់ទិដ្ឋាការកសិកម្មអូស្ត្រាលី( Australian Agriculture Visa)   នេះដែរ។ នេះបើតាមក្រសួងការងារ ដោយបានបញ្ជាក់ថា ក្រសួងនឹងចរចាជាមួយរដ្ឋាភិបាលអូស្ត្រាលី ដើម្បីបញ្ជូនពលករខ្មែរទាំង២ភេទ ទៅធ្វើការងារផ្នែកកសិកម្មនៅទីនោះ។ 

 

«ក្រសួងការងារ នឹងបន្តសហការជាមួយក្រសួងការបរទេសនិងសហប្រតិបត្តិការអន្តរជាតិ ក្នុងការចរចាជាមួយរដ្ឋាភិបាលអូស្ត្រាលី ដើម្បីឱ្យមានការទទួលយកពលករ ទេសន្តរប្រវេសន៍ពីកម្ពុជាក្រោមទិដ្ឋាការអន្តរកម្មអូស្ត្រាលី»។ នេះជាការអះអាងរបស់ក្រសួងការងារ នៅក្នុងសេចក្ដីជូនដំណឹង កាលពីថ្ងៃទី៣០ សីហា។ 

 

បើតាមក្រសួងការងារ កិច្ចការចរចាដើម្បីបញ្ជូនពលករកម្ពុជា ទៅធ្វើការងារផ្នែកកសិកម្មនៅប្រទេសអូស្ត្រាលីនេះ គឺត្រូវបានជជែកពិភាក្សាទ្វេរភាគី តាំងពីឆ្នាំ២០១៧មកម្លេះ ប៉ុន្តែទើបតែទទួលបានភ្លើងខៀវ ពីរដ្ឋាភិបាលអូស្រា្តលី កាលពីពេលថ្មីៗនេះ។ 

 

ទន្ទឹមនឹងការទទួលបានភ្លើងខៀវពីរដ្ឋាភិបាលអូស្រ្តាលីនេះ ក្រសួងការងារ ក៏ឆ្លៀតក្រើនរំឭកឱ្យពលរដ្ឋ ប្រុងប្រយ័ត្នខ្ពស់ចំពោះរាល់ការផ្សព្វផ្សាយជ្រើសរើស និងបញ្ជូនពលករខ្មែរ ទៅធ្វើការនៅប្រទេសអូស្ត្រាលី តាមរយៈទីភ្នាក់ងារ ឬអង្គភាពជ្រើសរើសជាដើម។ ការដាស់តឿនរបស់ក្រសួងការងារនេះ គឺដោយសារតែរដ្ឋាភិបាលអូស្ត្រាលី ពុំទាន់សម្រេចក្នុងការផ្តល់ទិដ្ឋាការជូនកម្ពុជានៅឡើយទេ។

 

បើតាមក្រសួងការងារកម្ពុជា រាល់ការបញ្ជូនពលករទៅធ្វើការងារនៅក្រៅប្រទេស គឺត្រូវតែមានកិច្ចសន្យាត្រឹមត្រូវ ដែលទទួលស្គាល់ដោយក្រសួងការងារ ។ ជាមួយគ្នានេះ ក្រសួងមានសមត្ថកិច្ចក្នុងការគ្រប់គ្រងលើការបញ្ជូនពលករខ្មែរ ទៅធ្វើការនៅបរទេស ដោយធ្វើកិច្ចសហការជាមួយក្រសួង និងស្ថាប័នពាក់ព័ន្ធ៕