២គ្រាប់របស់ក្រុមជម្រើសជាតិព័រទុយហ្គាល់ គឺរកបានដោយ Ronaldo ក្នុងការប្រើក្បាលតែតបាល់បញ្ចូលទីក្រុមអៀឡង់ នៅចុងវគ្គទី២ នៃការប្រកួត គឺនៅទី៨៩ និង៩០ បូក៦នាទី ។ តាមពិតទៅ Ronaldo អាចមានឱកាសធ្វើបាន Hat Trick ដែរ ប៉ុន្តែរូបគេបែរជាខកខានទៅវិញ ដោយសារស៊ុតបាល់ប៉េណាល់ទី មិនចូលនៅនាទី១៥ ដើមតង់ទី១ មុនពេលកីឡាករJohn Egan ស៊ុតបញ្ចូលទី១គ្រាប់ ជួយឱ្យអៀឡង់ នាំមុខព័រទុយហ្គាលបណ្ដោះអាសន្ននេះ។
 

តែយ៉ាងណាការវាយបករបស់ព័រទុយហ្គាល់ ដែលសម្រេចបានដោយ Ronaldo ទាំង២គ្រាប់នេះ បានជួយឱ្យរូបគេក្លាយជាកីឡាកររកគ្រាប់បាល់បានច្រើនជាងគេ សម្រាប់ជម្រើសជាតិ ហើយបានបំបែកកំណត់ត្រាពិភពលោក របស់អតីតខ្សែប្រយុទ្ធអ៊ីរ៉ង់ Ali Daei ផងដែរ។
 

គិតត្រឹមការប្រកួតនេះ ខ្សែប្រយុទ្ធវ័យ៣៦ឆ្នាំ Ronaldo បានលេងឱ្យក្រុមជម្រើសជាតិព័រទុយហ្គាល់ ចំនួន១៨០លើក ដោយស៊ុតបញ្ចូលទីបាន១១១គ្រាប់ លើសគ្រាប់បាល់ Ali Daei ចំនួន២គ្រាប់។ Ali Daei ដែលលេងឱ្យក្រុមជម្រើសជាតិអ៊ីរ៉ងពី១៩៩៣ ដល់២០០៦ នោះរកគ្រាប់បាល់បាន១០៩គ្រាប់។
 

កន្លងមកRonaldo បានបំបែកកំណត់ត្រាអ្នកស៊ុតបញ្ចូលទីច្រើនជាងក្នុងព្រឹត្តិការណ៍អឺរ៉ុបនេះ ពីអតីតខ្សែប្រយុទ្ធបារាំងលោក Michel Platini រួចទៅហើយ។ មកដល់ពេលនេះ Ronaldo រកបាន១៣គ្រាប់ ដោយនាំមុខ Platini ដែលរកបាន៩គ្រាប់។ មិនតែប៉ុណ្ណោះ Ronaldo ក៏ក្លាយជាកីឡាកររកគ្រាប់បានច្រើនជាងគេបំផុតលើលោកបូកបញ្ចូលគ្នាទាំងនៅពានអឺរ៉ុប Euro និង World Cup សរុប២០គ្រាប់ នាំមុខអតីតខ្សែប្រយុទ្ធអាល្លឺម៉ង់ Miroslav Klose ដែលធ្វើបាន១៩គ្រាប់។

១- Cristiano Ronaldo (ព័រទុយហ្កាល់) ១០៩គ្រាប់ ក្នុងការបង្ហាញខ្លួន១៨០ប្រកួត

២- Ali Daei (អ៊ីរ៉ង់) ១០៩គ្រាប់ ក្នុងការបង្ហាញខ្លួន១៤៩ប្រកួត

៣- Mokhtar Dahari (ម៉ាឡេស៊ី) ៨៩គ្រាប់ ក្នុងការបង្ហាញខ្លួន១៤២ប្រកួត

៤- Ferenc Puskás (ហុងគ្រី) ៨៤គ្រាប់ ក្នុងការបង្ហាញខ្លួន៨៥ប្រកួត

៥- Godfrey Chitalu (សំប៊ី) ៧៩គ្រាប់ ក្នុងការបង្ហាញខ្លួន១១១ប្រកួត

៦- Hussein Saeed (អ៊ីរ៉ាក់) ៧៨គ្រាប់ ក្នុងការបង្ហាញខ្លួន១៣៧ប្រកួត

៧- Pelé (ប្រេស៊ីល) ៧៧គ្រាប់ ក្នុងការបង្ហាញខ្លួន៩២ប្រកួត

៨- Ali Mabkhout (អេមីរ៉ាតអារ៉ាប់រួម) ៧៦គ្រាប់ ក្នុងការបង្ហាញខ្លួន៩២ប្រកួត

៩- Lionel Messi (អាហ្សង់ទីន) ៧៦គ្រាប់ ក្នុងការបង្ហាញខ្លួន១៥១ប្រកួត

១០- Kunishige Kamamoto (ជប៉ុន) ៧៥គ្រាប់ ក្នុងការបង្ហាញខ្លួន៧៦ប្រកួត

១១- Bashar Abdullah (កូវ៉ែត) ៧៥គ្រាប់ ក្នុងការបង្ហាញខ្លួន១៣៤ប្រកួត៕