ថ្លែងប្រាប់សារព័ត៌មានថ្មីៗតាមទូរសព្ទនៅរសៀលថ្ងៃទី១១ ខែកញ្ញា ឆ្នាំ២០២១ អភិបាលខេត្តសៀមរាប លោក ទៀ សីហា មានប្រសាសន៍ថា រដ្ឋបាលខេត្តបានពន្យារពេល៧ថ្ងៃ ដើម្បីបើកសាលារៀនក្នុងក្រុង ខណៈពេលបច្ចុប្បន្ននេះ អាជ្ញាធរបានសម្រេចបិទខ្ទប់ និងដាក់ក្រុងជាតំបន់លឿងទុំ។ លោកបញ្ជាក់ថា ប្រសិនមួយសប្ដាហ៍ទៀត ស្ថានការណ៍នឹងល្អប្រសើរវិញ នោះខេត្តនឹងពិចារណាដើម្បីបើកសាលាឡើងវិញ។

 

យ៉ាងណា លោក ទៀ សីហា ប្រាប់ថា ចំពោះតំបន់ពុំមានហានិភ័យ ឬតំបន់ឆ្ងាយៗ អាចបើកបង្រៀនឡើងវិញតាមការស្នើសុំ ហើយមកដល់ពេលនេះ លោកក៏មិនទាន់ទទួលបានរបាយការណ៍ពីចំនួនសាលារៀនដែលស្នើបើកបង្រៀនឡើងវិញនោះដែរ។ លោកបន្ថែមថា ការបើកឡើងវិញនេះ ក៏ត្រូវអនុវត្តតាមគោលការណ៍ណែនាំរបស់ក្រសួងអប់រំ យុវជន និងកីឡា ផងដែរ ដោយក្នុងមួយបន្ទប់មិនតម្រូវឱ្យបង្រៀនលើសពី១៥នាក់ឡើយ និងត្រូវឆ្លាស់វេនគ្នារៀន៕