លោក រៀម មុនីស៊ីឡុង បានប្រកាសលក់គំនូរមួយផ្ទាំងក្រោមអត្ថន័យទាក់ទងនឹង «ការឡើងកម្ដៅភពផែនដី» ដើម្បីរកថវិកាជួយសាលាអនុវិទ្យាល័យឬស្សីលក ស្ថិតក្នុងភូមិ-ឃុំឬស្សីលក ស្រុកជីក្រែង ខេត្តសៀមរាប។ បច្ចុប្បន្ន សាលានេះកំពុងខ្វះថវិកាចាក់ដីនៅបរិវេណសាលា។ 

 

វិចិត្រករ រៀម មុនីស៊ីឡុង ប្រាប់ថា៖« ដោយសារខាងសាលាខ្វះខាតថវិកាចាក់ដី ព្រោះវិទ្យាល័យបង្កើតថ្មី ឃើញក៏ចង់ជួយ គិតថាគ្មានអីជួយ ក៏គូរគំនូរលក់ដល់អ្នកដែលស្រឡាញ់គំនូរ ការជួយទិញគំនូរដូចបានជួយសាលាដូច្នោះដែរ»។

 

នេះជាលើកទី១ហើយសម្រាប់វិចិត្រក្ររូបនេះ ដែលប្រកាសលក់គំនូរដើម្បីរកថវិកាជួយសាលាក្រីក្រនៅទីជនបទ។ លោក មុនីស៊ីឡុង ពន្យល់ថា ថវិកាដែលទទួលបានលោកនឹងបែងចែកជា៣ចំណែក ដោយ៧០ភាគរយជួយដល់សាលា ១០ភាគរយទៀត សម្រាប់ឧបត្ថម្ភប្រជាពលរដ្ឋនៅឃុំកំពង់ឃ្លាំងដែលកំពុងស្ថិតនៅតំបន់បិទខ្ទប់ និងមានជីវភាពខ្វះខាត ហើយ២០ភាគរយទៀត សម្រាប់ចំណាយលើសម្ភារគូរគំនូរ។ 

 

ចំពោះអត្ថន័យនៃគំនូរវិញ វិចិត្រករ មុនីស៊ីឡុង បកស្រាយថា វាទាក់ទងនឹងការបម្រែបម្រួលអាកាសធាតុ ដែលក្នុងនោះមានមនុស្សទួលសៀវភៅ កាន់ទុយោដើម្បីស្រោចស្រពកម្ពៅផែនដីដែលកំពុងក្ដៅខ្លាំង ហើយមានតែការរួមគ្នាប៉ុណ្ណោះ ទើបអាចជួយភពផែនដីវិញបាន តាមរយៈការដាំដើមឈើឡើងវិញ។ រូបនេះមានទំហំ ១០០cm X ១៥០cm។ 

 

សម្រាប់សាធារណជនដែលចាប់អារម្មណ៍ចង់ជាវគំនូរនេះ អាចទាក់ទងទៅវិចិត្រករលោក មុនីស៊ីឡុង បាន តាមរយៈលេខទូរសព្ទ ០៧៧ ៤៩ ២១ ៩៨ ឬទាក់ទងទៅកាន់នាយកសាលាអនុវិទ្យាល័យឬស្សីលក លោក យង់ លី តាមរយៈលេខទូរសព្ទ ០១១ ៣៣ ៧៥ ៧៥។ លោក មុនីស៊ីឡុង រំពឹងថា សាធារណជននឹងជួយគាំទ្រស្នាដៃសិល្បៈរបស់លោក ក៏ដូចជាសាលារៀនដែលកំពុងខ្វះខាតខាងលើ ដើម្បីអភិវឌ្ឍន៍ចំណេះដឹងដល់ក្មេងៗជំនាន់ក្រោយទៀត៕