ក្រុមហ៊ុន Tesla នឹងសហការជាមួយអាជ្ញាធរនៅជុំវិញពិភពលោកដើម្បីធានាសុវត្ថិភាពទិន្នន័យពីយានយន្តស្វ័យប្រវត្តិ។ នេះជាការអះអាងរបស់លោក Elon Musk នាសន្និសីទ World New Energy Vehicle Congress ដែលរៀបចំនៅខេត្តហៃណាន ប្រទេសចិន។
 

យោងតាម Bloomberg News លោក Musk បានសម្តែងនូវការគោពខ្ពស់ចំពោះបណ្តាក្រុមហ៊ុនផលិតយានយន្តចិនដែលបានជំរុញការអភិវឌ្ឍន៍បច្ចេកវិទ្យាយានយន្តអគ្គិសនី ដោយវាយតម្លៃថា ផលិតផលចិនជាសក្តានុពលដ៏អស្ចារ្យនៅលើទីផ្សារយានយន្តអគ្គិសនី។
 

កាលពីឆ្នាំ២០១៩ Tesla បានរោងចក្រមួយនៅក្រុងសៀងហៃ ហើយបានបង្កើតការប្រកួតប្រជែងជាមួយក្រុមហ៊ុនក្នុងស្រុកមួយចំនួនដូចជា Nio Inc. និង Li Auto Inc. ជាដើម។ ក្នុងឆ្នាំ២០២០ Tesla លក់រថយន្តបាន ១៤៧ ៤៥៥គ្រឿងនៅក្នុងប្រទេសចិន ដែលស្មើ៣០ភាគរយនៃទីផ្សារសាកលរបស់ក្រុមហ៊ុនមួយនេះ។
 

ជាមួយគ្នានេះ លោក Musk បានកត់សម្គាល់ពីកំណើននៃការព្រួយបារម្ភអំពី ការប្រមូលទិន្នន័យពីសំណាក់យានយន្តស្វ័យប្រវត្តិ ហើយលោកអះអាងថា Tesla នឹងធ្វើការជាមួយអាជ្ញាធរជាតិតាមបណ្តាប្រទេសនានា ដើម្បីធានាពីសុវត្ថិភាពទិន្នន័យ និងបញ្ហាផ្សេងៗពាក់ព័ន្ធរថយន្ត។
 

កាលពីដើមឆ្នាំ លោក Musk ក៏បានចេញមុខបដិសេធផងដែរទាក់ទងនឹងការបំពាក់កាម៉េរាក្នុងរថយន្តដែលអាចបញ្ជូនរូបភាពវីដេអូរស៊ើបទៅរដ្ឋាភិបាលអាម៉េរិក។ ករណីដែលប្រទាំងប្រទើសកន្លងមកនេះ គឺបន្ទាប់ពីមានរបាយការណ៍ថា ចិនបានហាមឃាត់សមាជិកយោធា និងបុគ្គលិករដ្ឋមួយចំនួន កុំឲ្យប្រើប្រាស់ Tesla។
 

លោក Musk បានអះអាងថា៖ «យើងយកចិត្តទុកដាក់ខ្លាំងណាស់ចំពោះបញ្ហានេះ យើងគោរពគោលការណ៍ និងរក្សាការសម្ងាត់រាល់ព័ត៌មានទាំងអស់»៕