ស្តេចប្រដាល់ហ្វីលីពីន Manny Pacquiao បានប្រកាសចាកចេញពីអាជីពកីឡាប្រដាល់ហើយ។ នេះបើតាមការចុះផ្សាយរបស់សារព័ត៌មានហ្វីលីពីន Rappler។

«អាជីពប្រដាល់របស់ខ្ញុំ គឺត្រូវបានបញ្ចប់ហើយ»។ Pacquiao បាននិយាយបែបនេះ ប្រាប់ទៅតារាសម្ដែងស្រីសញ្ជាតិហ្វីលីពីនម្នាក់ ឈ្មោះ Toni Gonzaga នៅក្នុងកម្មវិធីជជែកពិភាក្សា តាមយូធូបរបស់នាង កាលពីថ្ងៃទី១៩ កញ្ញា។

អាជីពប្រដាល់នេះ បានជួយ Pacquiao តាំងពីគ្រាលំបាករហូតមកដល់ជាបេក្ខភាពប្រធានាធិបតីហ្វីលីពីនឆ្នាំ ២០២២។ Rappler បានស្រង់សម្តីស្ដេចប្រដាល់ហ្វីលីពីន ដូច្នេះថា៖«វាគឺល្អហើយ ពីព្រោះខ្ញុំបានប្រដាល់អស់ជាច្រើនឆ្នាំហើយ ហើយគ្រួសារខ្ញុំក៏បាននិយាយថា (អាជីពប្រដាល់)វាគ្រប់គ្រាន់ហើយ។ ខ្ញុំគ្រាន់តែនៅបន្ត (សកម្មភាពប្រដាល់) ព្រោះខ្ញុំងប់ងុល នឹងកីឡា»។


ដ្បិតប្រកាសបែបនេះក្តី តែPacquiao មិនចាកចេញពីសកម្មភាពប្រដាល់ទាំងស្រុងនោះទេ។ «ខ្ញុំនឹងបន្តគាំទ្រកីឡាករប្រដាល់យើងផ្សេងទៀត ដើម្បីជួយឱ្យពួកគេក្លាយជាម្ចាស់ជើងឯក»។ នេះជាការបញ្ជាក់របស់ស្ដេចប្រដាល់ហ្វីលីពីន ដែលកំពុងឈរជាបេក្ខភាពប្រធានាធិបតី នៅឆ្នាំ២០២២។